5
Atoin amuꞌit reꞌ anbeon, ro he npaant ok
1-6 Atoin amuiꞌt ein! Ampasan hi ruikm ein he mneen mirek-rekoꞌ! Hi mtahan kai naꞌko tuaf-tuaf reꞌ anmepun hae nmaten neu ki. Oras ia, sin maskeet ein natoon maat-maat hi puta-kriu ngguin naan. Onaim Uisneno Apinat-Akrahat anneen ma niit anrair sakoit naꞌko tuaf-tuaf ameupt ein naan.
Hi meupm ein ambi pah-pinan ia, es reꞌ he miminab hi tuam ein meik rais marinet pah-pinan. Hi on reꞌ bijae paorn es reꞌ suma nahiin he naah aah, reꞌ antea in oors ate, anroro. Hi mhukun ma miꞌmaet atoin rekon, reꞌ ka napenin fa mainuan he namneob ok anbin hi humam ma hi matam.
Atoin amuiꞌt ein! Reko nneis, amkae mpin-pinus nai! Fin maꞌneꞌat humaꞌ-humaꞌ of ro he nsaen ki. Hi ꞌmuiꞌm ein anmurai namreuꞌn een. Ma hi pake-nohas amasat sin, eets ein of ansoor naan sin. Hi noni mnatuꞌ ma mutiꞌ sin ka maꞌoos ein fa goen. Ma sin of naah nafaniꞌ ki, on reꞌ ai ji nout hau metoꞌ. On mee mꞌes pah-pinan ia he namsoup goen, mes hi amtaisiub feꞌ he mibuab bareꞌ ꞌmaten? Hi ꞌmuiꞌm ein of anjarin bukti nak, hi ka mihiin fa mee es reꞌ maꞌosaꞌ nbi Uisneno In human ma In matan.
Amsabaar mbi susat
7 Aok-bian arki! Hi ro he msabaar ambi hatas-paot tar Usiꞌ nkoen On anfain neem. Amkius kiim atoin tani reꞌ anpao nok sabaar neu in reen je afan. Uran ahuunt ee nmouf, rarit in nseen. Rarit in npao nteniꞌ uran reꞌ natorob ma namriab in roet ein. Ka ꞌroo fa te, nasufan ma nafuan. Ma in oors ee ntea te, tuaf naan annao nseki ma noun.
8 Hi ro he msabaar on reꞌ naan amsaꞌ. Amhaꞌtain hi tuam ein, natuin ka ꞌroo fa goen ate, Usiꞌ ankoen On anfain neem!
9 Aok-bian arki! Kais ammaꞌmunuꞌ. Mee he mmaꞌmunuꞌ, mmaꞌmunuꞌ piut. Maut he Uisneno of es anhukun ki! Amkius kiim! Fin Afeek Rasi sonaf neno tuun ee, anhake nrair et hi maatm ein naan.
10 Aok-bian arki! Mituin aꞌtopeꞌ naꞌko Uisneno In mafefa kniunꞌ ein. Maski sin napenin susat ma nanaꞌrenat humaꞌ-humaꞌ, mes sin naarn ein aah.
11 Karu anmuiꞌ tuaf reꞌ bisa naran anbi susat ma nanaꞌrenat, hit troim he tboꞌis taꞌnaeb in kanan. On reꞌ kaꞌo Ayup. In napein susat humaꞌ-humaꞌ, mes in naran maꞌtaniꞌ. Rarit Uisneno neekn ee nmouf neu ne, onaim In nmurai nꞌator neu naiꞌ Ayup saaꞌ-saaꞌ reꞌ reko. Uisneno nmoeꞌ on naan, natuin In Amanekat ma Amahoet.
Rasi anmatoom nok supat
12 Aok-bian arki! Hi kais mihakeꞌ supat. Karu hi he mak, “tua”, mitaah mak “tua” goah. Karu hi he mak, “kahaf”, mitaah mak, “kahaf”. On reꞌ naan ate, noo goah. Kais ambaineis he mihakeꞌ rais supat amteek niutn ee et pah-pinan. Aiꞌ mihakeꞌ supat mak, “nbi Uisneno In kanan” reꞌ anmoin et sonaf neno tunan. Ka nmuiꞌ fa upan saaꞌ-saaꞌ karu mihakeꞌ supat humaꞌ-humaꞌ. Natuin karu on naan ate, of amtoup main ho hukun, natuin ho rais supat sin.
Onen reꞌ matopuꞌ
13 Karu anmuiꞌ tuaf naꞌko ki napein susat, reko nneis in nꞌonen. Ma karu anmuiꞌ tuaf anmariin, reko nneis in nsii ma nboꞌis Uisneno.
14 Karu anmuiꞌ tuaf naꞌko ki napein menas, reko nneis miskau amepu krei ngguin, ma mtoit sin he ntaon minaꞌ nbi amenat naan, ma nꞌoen ein neik Uisneno In kanan, maut he Uisneno narekoꞌ amenat naan.
15 Onaim karu hi mꞌonen amenat, ma mpirsai batuur-batuur meu Uisneno, Uisneno narekoꞌ amenat naan. Karu amenat naan anmoꞌe nsaan, Uisneno of annoes nain in saant ein.
16 Karu naꞌko ki ammoꞌe msaan, hi ro he mmanakuꞌ sanat es nok es. Nok ranan naan, ro hi mꞌonen es nok es ate, maut he hi mjair reko.
Tuaf reꞌ in neekn ee kninuꞌ ma namneo, in nꞌoen ee naheun nok kuasa maꞌtaniꞌ, ma bisa tapein in afan.
17 Tait iꞌtopeꞌ naꞌko kaꞌo Elia. In mansian on reꞌ hit imsaꞌ. Mes oras in nꞌonen he kais naꞌuur antein, uran naan nasnaas nain, ma ka nmouf niit fa tar antea toon teun ma stenaꞌ.
18 Rarit in nꞌonen he ntoit uran, ma uran naan nmouf nain oras naan. Huun ein natoron ma nnoo maten, ma sekit amnonut amsaꞌ.
19 Aok-bian arki! Karu anmuiꞌ tuaf naꞌko ki reꞌ nmoꞌe nsaan ma nasaitan saaꞌ-saaꞌ reꞌ batuur, rarit anmuiꞌ tuaf reꞌ nturun ma nbaab ee nfain neem neu Uisneno In raan amneot, naan reko.
20 Mimnau mirek-rekoꞌ! Karu hi mturun tuaf reꞌ anmoꞌe nsaan, he in nfain neem neu Uisneno, ma in naꞌpiis, hi msoi maan ee, maut he in nmoin piut nok Uisneno. Nok ranan naan, Uisneno nnoes nain in saant ein reꞌ mfau-rutun naan.
On reꞌ naan, tua.
Naꞌko au,
naiꞌ Yakobus kau, tua.