11
Uisneno In mafefa kninuꞌ tuaf nua, reꞌ maꞌtainꞌ ein
1 Rarit sin nnonaꞌ kau hau ukur noon es, reꞌ amnaun ii neeh jes. Onaim Uisneno naprenat kau mnak, “Yohanis, amfeen nai he mnao mꞌukur Au Uim Onen Uuf nok in mei fuat, et kota Yerusalem. Ma msoiꞌ areꞌ tuaf-tuaf reꞌ sin ar-arsin anꞌoen ein nbin bare naan.
2 Mes kais amꞌukur Uim Onen naan in kintal, natuin bare naan manonaꞌ nrair neu uuf ma pah bian reꞌ ka nahiin Kau fa. Sin of anteir hae ma nꞌoemetab Au kota naan, tar antean funan boꞌ haa-mnua (es reꞌ neno niufn es natun nua mboꞌ nee—1.260)
3 Au of aꞌreek haef tuaf nua ꞌeu bare naan he sin njarin Au mafefa kniunꞌ ein. Sin of anpaken tai-nukat, rarit anꞌeut ma natoon rais manbaꞌan naꞌko Kau, tar antea neno niufn es natun nua mboꞌ nee naan namsopun.”
4 Uisneno In mafefa kninuꞌ naiꞌ Sakarias antui nrair naꞌko afi unuꞌ anmatoom nok mafefa kninuꞌ tua nuaꞌ ein ia. In npaek uab nak, anmuiꞌ hau saitun ꞌuꞌu nua nok baer toras paku reꞌ anbain ein nꞌain Uisneno, es reꞌ mansian pah-pinan sin Usin.
5 Karu nmuiꞌ tuaf reꞌ anroim he nsirakab Uisneno In mafefa kniunꞌ ein ia, of anmuiꞌ ai anpoi naꞌko sin feefk ein ma nout nakratiꞌ sin muusn ein ok-okeꞌ. Nok ranan naan, areꞌ tuaf reꞌ he nhaꞌmuiꞌ sin, ro tebes anmaten.
6 Oras sin nua sin anjarin Uisneno In mafefa kniunꞌ ein anbin pah-pinan, In nfeen sin kuasa he nꞌekaꞌ uran. In anfee kuasa msaꞌ he nmoeꞌ oe maat ein anjarin naaꞌ, ma kuasa he neik rais haꞌmuꞌit humaꞌ-humaꞌ nbi pah-pinan, natuin sin roimk ein kuuk.
7 Karu sin oras he natoon Uisneno In rais manbaꞌan naan namsoup, of muiꞌ fui apisut es anpoi naꞌko nuat haꞌmuꞌit reꞌ ka maꞌuꞌu fa naan. In of anmakeen nok tua nuaꞌ ein naan, tar antea in niis naan sin, ma naꞌmaet sin.
8-9 Nok ranan naan, sin nua sin anmaten anbin kota koꞌu reꞌ afi unuꞌ te, biak ein anroor niis sin Uisn ee nbi hau nehe. Kota naan, anjari nrair koot maufinu on reꞌ Sodom ma Masir afi unuꞌ. Onaim sin of anporin napoitan mafefa kniunꞌ ein naan sin aok amaets ein naan anbin ranan, tar antea neno teun ma stenaꞌ. Rarit mansian naꞌko areꞌ kanan uuf ma pah, ma uab, ma ꞌpen-pene, neman ma nkius tua nua amaets ein naan. Sin ka nfeen fa mainuan he nsuub sin imsaꞌ,
10 natuin sin nmarinan he nkius kuuk tua nua amaets ein naan. Fin sin nua sin es reꞌ nok-noik mansian pah-pinan sin tenab. Onaim sin ar-arsin anmoꞌen fesat, ma anmaꞌook soun ein es nok es.
11 Mes neno teun ma stenaꞌ naan namsopu te, of Uisneno anfee snasaf neu sin, he sin nmoni nfanin. Rarit areꞌ kanan mansian reꞌ niit sin on naan ate, naꞌtaꞌin me-meot goah.
12 Rarit mafefa kniun nuaꞌ ein naan of annenan hanaf maꞌtain es naꞌko neon goe, reꞌ anreek sin am nak, “Hae! Hi nua ki msae iim nai!” Onaim sin nua sin naꞌait ok ansaen on neno ma noep je anꞌaum naan sin. Ankius nitan on naan ate, sin muusn ein antakaꞌnaan ein.
13 Nok askeken ate, auf gui naꞌbekoꞌ maꞌtaniꞌ. Karu hit tsoiꞌ umin anbin kota naan, naꞌko umi boꞌes, uim jes antaikoib. Ma anmuiꞌ tuaf nifu hiut anmaten. Tuaf bian reꞌ ka nmaten fa, namtaun nmaten. Mes sin of anhormaat Uisneno, natuin In es reꞌ annaaꞌ aprenat nbi sonaf neno tunan.
14 Nok ranan naan, siraak no nuan ii namsoup goen. Mes ampaant om, oo! Siraak no teun ii he neem een.
Anfuu toꞌis no hiutn ii — Uisneno ma Yesus Kristus annaꞌan aprenat anbin pah-pinan
15 Rarit Uisneno In ameput naꞌko sonaf neno tunan no hiutn ii nfuu in toꞌis. Nok askeken ate, au ꞌneen aꞌroots ii neman naꞌkon sonaf neno tunan am nak,
“Oras ia, anaaꞌ aprenat anbi pah-pinan,
suma arahaa Uisneno ma Yesus Kristus,
es reꞌ Tuaf reꞌ Uisneno npiir ma mbetis nain Je naꞌko afi unuꞌ.
Uisneno of annaaꞌ aprenat piut-piut on reꞌ Usif, tar antea nabar-baar.”
16 Amnasit tuaf boꞌ nua mhaa reꞌ antokon nbin aꞌtoko preent ein anbin Uisneno In human ma In matan naan, sin nnenan haanf ein naan amsaꞌ. Rarit sin nriꞌtuun, ma naikas naꞌratan Uisneno,
17 neik siit pures-boꞌis am nak,
“Koi, Uisneno!
Hai Usiꞌ!
ma hai Amaꞌ Uisneno!
Ho es reꞌ muprenat areꞌ saaꞌ-saaꞌ.
Ho es reꞌ amkuaas areꞌ saaꞌ-saaꞌ.
Ho es reꞌ muꞌko un-unuꞌ te, ambi main naa.
Ho es reꞌ oras eti ia ambi naa msaꞌ.
Hai mtoit makasi meu Ko, tua,
natuin Ho mpaek Ho kuasam reꞌ maꞌtaniꞌ,
he mnaaꞌ aprenat ambi pah-pinan.
18 Mes uuf ma pah sin natoꞌon,
natuin sin ka nromin fa he natuin Ko, tua.
Mes oras ia, Ho mutoꞌo msaꞌ,
natuin sin ka nromin fa he nahiin Ko.
Oras ia in oors ee ntea goen,
he Usiꞌ amhukun tuaf-tuaf reꞌ ka nroim he ntoe natuin Ko fa, tua.
Oras ia in oors ee ntea goen,
he Usiꞌ mureuꞌ miis tuaf-tuaf reꞌ nareuꞌ niis tuaf bian sin.
Oras ia in oors ee ntea goen,
he Usiꞌ amparikas amaets ein sin rais saant am penu sin, tua.
Oras ia in oors ee ntea goen,
he Usiꞌ ambaras Uisneno In ameupt ein sin maskeet.
Es reꞌ Ho mafefa kniunꞌ ein,
ma Ho ngguin,
anaꞌ-koꞌu, mnasif-mainukiꞌ.
Usiꞌ ambaras meu sin arsin,
reꞌ anhormaat Ho kaanm aan, tua.”
19 Rarit au ꞌiit aꞌbi sonaf neno tunan, Usiꞌ In Uim Onen In eonꞌ ee masoitaꞌ. Onaim au ꞌiit peit-kere reꞌ afi unuꞌ sin natunuꞌ Uisneno In preent ein reꞌ matuꞌi nbi fatu. Rimat sin nariman ma nmatarun neu-mneman, pah ii naꞌbekoꞌ, ma uran eis faut maꞌfenaꞌ nmoufun naꞌkon neon goe tnanan.