19
Pukan asiit koꞌu ansiin nbin sonaf neno tunan
1 Ameput sonaf neno tunan naan naꞌuab anrair on naan ate, au ꞌneen hanaf kouꞌ goes nahuum on reꞌ pukan asiit koꞌu, ansiin et sonaf neno tunan. Sin nsiin am nak,
“Haleluya! Haleluya!
Hit tait siit pures-boꞌis teu hit Uisneno,
natuin In mapinaꞌ-makrahaꞌ.
Haleluya! Haleluya!
Hit tait siit pures-boꞌis teu hit Uisneno,
natuin In kuun, ro akuasat anneis-neisi.
Uisneno es reꞌ ansoi nafetin kit,
naꞌko areꞌ kanan hit saant am penu sin.
Uisneno es reꞌ nanoon ma naneo kit,
naꞌko areꞌ kanan monit apenut-abeot.
2 Hit tait siit pures-boꞌis teu hit Uisneno,
natuin In nafeek rasi, ro natai.
Hit tait siit pures-boꞌis teu hit Uisneno,
natuin In es anhukun ate, ro batuur.
Uisneno nasanut hukun neu bifee aꞌhakeꞌ naan,
natuin in nfuriꞌ ma nkopoꞌ tuaf-tuaf anbi pah-pinan,
he nmakaken nabu-buan nok ne,
ma natun-tuin ein ahaa in maufinu.
Uisneno anbaras anrair bifee maufinu naan,
natuin in nroor naꞌmaet,
Uisneno in aan renuꞌ-aan reek ein.”
3 Rarit sin nsiin nteinꞌ ein siit bian anbin sonaf neno tunan am nak,
“Haleluya! Pures ma boꞌis meu Uisneno!
Haleluya! Maikas miꞌrat-ratan In kanan!
Natuin masuꞌ naꞌko ai reꞌ nout niis bifee naan in aon amates,
nsae piut-piut ma ka natfeek niit fa.
Ma masuꞌ naꞌko ai reꞌ nout niis kota maꞌtaniꞌ naan,
ansae piut-piut ka nasnaas niit fa.”
4 Rarit amnasit tuaf boꞌ nua mhaa nok muiꞌ maꞌtain haaꞌ ein naan, nriꞌtuun ma naꞌruir ein naꞌbesan neun Uisneno In aꞌtoko prenat. Sin anbaisenun neik rais hormaat am nak,
“Batuur! Iim nai he hit arkit atpures ma tboꞌis Uisneno!
Haleluya! Iim nai he hit arkit tait ma ttunaꞌ taꞌratan In kanan!”
ꞌBib-kaes Anaꞌ In fesat kabin
5 Rarit au ꞌneen aꞌtein hanaf es naꞌko ꞌtoko prenat naan am nak,
“Hae, aan renuꞌ-aan rekaꞌ Uisneno arki!
Hae, anah-anah Uisneno ki!
Iim he hit ttunaꞌ taꞌrat-ratan Uisneno In kanan.
Iim arki, anaꞌ-koꞌu, mnasif-mainukiꞌ, he tpures ma tboiꞌs Ee.”
6 Rarit au ꞌneen on reꞌ too mfaun naꞌuab ein. Sin haank ein on reꞌ oe ꞌboniꞌ, ma koꞌu on reꞌ ꞌrotos naꞌroot ka natfeek fa. Sin naꞌuab ein am nak,
“Haleluya! Hai msii ma mboꞌis Uisneno.
Haleluya! Hai mtunaꞌ miꞌrat-ratan In kanan.
Natuin In kuun es reꞌ akuaas reꞌuf.
Ma In kuun es reꞌ naprenat areꞌ kanan saaꞌ-saaꞌ.
7 Oras ia, hit neek ein anmarinan.
Oras ia, hit bisa tkumain ma thumaꞌmoe.
Hit tpures ma tboiꞌs Ee,
natuin ꞌBib-kaes Anaꞌ naan In oras he nkabin, antea nrair.
Hit ttunaꞌ taꞌrat-ratan In kanan,
natuin ꞌBib-kaes Anaꞌ naan In baroit ee nabarab anrair.
8 Uisneno nfee nrair ne tais ma paek baroit, reꞌ mamasaꞌ ma maꞌosaꞌ.
Uisneno nfee nrair ne tais ma pake reꞌ muit okas arimat.”
(Tais ma pake reꞌ muit okas arimat naan, es reꞌ Uisneno Iin na reꞌ sin aꞌmoeꞌ rekon.)
9 Onaim ameput sonaf neno tunan naan natoon kau mnak, “Yohanis! Ho ro he mtui mmak, on nai:
‘Areꞌ kanan tuaf reꞌ napein haan askaut ma undangan he nkoen on neem nok anbi ꞌBib-kaes Anaꞌ In fesat kabin naan, sin of anꞌua rekon batuur!’ ”
Rarit ameput naan antuta ntein in uban naan am nak, “Uisneno In Kabin ma Prenat reꞌ ia, ro batuur!”
10 Onaim au ꞌriꞌtuu he uꞌbesan ameput naan. Mes in nakain kau mnak, “Kais muꞌbesan kau on naan! Fin au Uisneno In aan renuꞌ-aan rekaꞌ amsaꞌ on reꞌ ho, ma ho aok-bian sin reꞌ nasinaꞌ ma natoon rasi anmatoom nok Naiꞌ Yesus. Mafefa kninuꞌ reꞌ natoon rais manbaaꞌn ein, sin ar-arsin nakriraꞌ ma natoon anmatoom nok Naiꞌ Yesus, he mansian naꞌruriꞌ ma naꞌbesan neu Ne. Fin reꞌ naan romif naꞌko Asmaan Akninuꞌ on naa. Onaim kais muꞌbesan kau, mes muꞌbesan meu Uisneno nmees jah!”
Usif Yesus ankoen On neem ansae bikaes mutiꞌ
11 Rarit au uꞌaitiꞌ au matak, onaim au ꞌkius ꞌiit sonaf neno tunan natfeꞌi. Nok askeken ate, au ꞌkius ꞌiit bikaes muit es npoi neem. Tuaf reꞌ ansae bikaseꞌ naan, kaan ee, “Tuaf reꞌ Annaaꞌ Rais Manbaꞌan” ma “Tuaf reꞌ Amneot ma Amnonot”. Oras In nafeek rasi, ro natai. Karu In nnao nmakeen, In nnao nok neek amneꞌo.
12 In maatk ein anpinan on reꞌ ai. In npaek ꞌsoeb usif, namfau. In kaan ee matuꞌi et In aon, mes suma In kuun es reꞌ nahiin kanaf naan in oten.
13 In tai-paekn ein, natepaꞌ sin anbin naaꞌ. Atoniꞌ nteek Ee te nak, “Uisneno In Kabin ma Prenat”.
14 Au ꞌkius ꞌiit amsaꞌ soraurs ein naꞌkon sonaf neno tunan ansaen bikaes mutiꞌ he natuin Ee. Sin anpaken tai-pake maꞌosaꞌ reꞌ muit okas amsaꞌ.
15 Anmuiꞌ naan suin ꞌaikan es, reꞌ anboor naꞌko In fefan. In npaek suniꞌ naan, he nnao nmakeen nraban areꞌ kanan uuf ma pah anbi pah-pinan. Rarit In niis nain sin. Onaim In njair Usif neu sin. In naprenat nok feef maputuꞌ ma ꞌniim maputuꞌ, rarit sin nnaben niit Uisneno akuasat In toꞌos. Naan humaꞌ meseꞌ on reꞌ atoniꞌ nteir hau fua anggur he nait anggur oef.
16 Anbi Atoniꞌ naan In tai-paken naan, ma In pusun, anmuiꞌ tuis nak on nai:
Usif ansae faof areꞌ kanan usif,
ꞌNakaf ansae faof areꞌ kanan ꞌnakaf.
Usif Yesus niis naan muiꞌ fui apisut nok nain in soraurs ein
17 Rarit au ꞌkius ꞌiit ameput neno tunan tuaf es anhake nbi manas. Onaim in nkoaꞌ neu areꞌ kanan koro amneuk siis punuꞌ reꞌ natpenen nbin neon goe tnanan am nak, “Iim nai he hi ar-arki mibua mbi bare ia nai, he mbukae mok ambi Uisneno In fesat koꞌu!
18 Hi mipein mainuan he meuk areꞌ kanan amaets ein sin siisk ein: es reꞌ uisf ein, meo-paꞌe sin, ma soraurs ein. Hi bole meuk bikaes ein ma soraurs ein reꞌ ansaen nbin bikaes ein naan sin siisk ein. Hi bole meuk sisi naꞌko ate aiꞌ atoin farei, aiꞌ aꞌnaet ein sin siisk ein. Taꞌparan uab ate tak, hi bole meuk main sisin naan ok-okeꞌ.”
19 Rarit au ꞌkius ꞌiit muiꞌ fui apisut reꞌ neon goes ii, anpoi naꞌko tasi naan. In nnao ma nmaꞌakoran nok areꞌ kanan usif anbi pah-pinan, nok nain sin soraurs ein. Rarit sin nnaon ma nmakenan nraban Atoniꞌ reꞌ ansae bikaes mutiꞌ naan, ma In soraurs ein naꞌkon sonaf neno tunan.
20 Mes Atoniꞌ reꞌ ansae bikaes mutiꞌ naan, anheek naan muiꞌ fui apisut naan ma in mafefaꞌ reꞌ aputa-kriut. Mafefaꞌ naan es reꞌ unuꞌ te anmoeꞌ rasi mkakat ma sanmakat humaꞌ-humaꞌ, he nputa-kriu tuaf-tuaf reꞌ antoup muiꞌ fui apisut naan in marak ma reꞌ naꞌbesan nrarin neu in faut marunaꞌ. Mes oras ia, Atoniꞌ reꞌ ansae bikaes mutiꞌ naan, nnao nporin nain muiꞌ fui apisut naan nok in mafeef ee, neu tais ai bariri reꞌ anpiin piut-piut.
21 Rarit Atoniꞌ reꞌ ansae bikaes mutiꞌ naan, annao ma nroor niis sorarus bian sin, anpaek In suniꞌ reꞌ anpoi naꞌko In fefan. Rarit koron reꞌ amneuk siis punuꞌ neman ma neuk nain aof amaets ein naan ok-okeꞌ.