42
José Yachii Ainau Ejipto Nungkanam Wemauri
1 Jacob Canaán nungkanam pujus, Ejiptonam trigo awai tamaun antuk, ni uchiri ainaun chicharak: —¿Warukaya jiinisha pujarme?
2 Ejiptonam trigo awai tinamun antukjai. Iisha tsukajai jakarai tusaram, werum trigo sumataram, —timiayi.
3 Tamati ni uchiri diez armia nuka trigo sumatai tusar Ejiptonam wearmiayi.
4 Antsu Benjamínnaka, José nekas pataa yachinka jintá itiurkachminum jeai tusa akupkachmiayi.
5 Canaán nungkanam tsuka asamtai, nu nungkanmaya ainau yutain sumaktasar wenamtai, Israela uchiri ainausha niijai tsaniasar wearmiayi.
6-8 Tura jear, José Ejipto nungka wainin asa, aints ainau trigon sumaktasar kaunkaru ainaun ningki suruktin asamtai, nekainachu asar, ii yachiintai tutsuk nijajin nungkan antitnak Josén tsuntsumruawarmiayi. Antsu José ni yachii ainaun: Yatsur ainawai tusa nekaayat, nekachua nunisang niin kakar chicharak: —¿Atumsha tuniayaintrume? —timiayi. Tu iniam aiminak: —Iikia Canaán nungkanmayainji, tura trigo sumaktasar winaji, —tiarmiayi.
9 Tinamtai José yaanchuik karanam wainkamurin anear, niin chicharak: —Atsa, atumka anangmakrum: Ejipto nungkanam itiur pujuinawa tusaram wekaarme. ¿Tura asaram ukunam meset najanami tusaram wekaatsrumek? —timiayi. Tamaitiat nii aainak:
10 —Atsa, apuru, antsu aya trigon sumaktasar winiji.
11 Iikia kichik aintsu uchirinji. Nekasar pengke aintsuitji. Tura asar nungka nekaataram tusar akupkamuka ainatsji, —tiarmiayi.
12 Tinamtai José chicharak: —Atsa, nekasrum anangmakrum ju nungka nekaatasrum wekaarme, —timiayi.
13 Tamaitiat niisha ataksha aainak: —Atsa, apuru, iikia kichik aintsu uchirinji. Canaán nungkanam pujuuwitji. Iikia doce yachintin ayatrik, ii yachii ekeringkia ii aparijai juwakmayi. Antsu kichka mengkakawaitai, —tiarmiayi.
14 Tinamaitiat José ayaak: —¡Aichua taja! Atumka nekasrum anangmakrum ju nungkanam wekaarme.
15 Antsu yamaikia nekapsatjarme: Apu Faraóngka naarijai tajarme: Atumi yachii ekeri juni taachmataikia, atumka juniangka pengké jiinkishtinuitrume.
16 Watska, nekasrum waitrutsuk takurmeka, atumnia kichik atumi yachii ekeri utiti. Antsu chikich ainautirmeka juni achikmau karsernum pujustatrume. Atum nekasrumeash waitrutsuk chichaaram nuka nekaami. Antsu waitruarmeka nuniangka nekasrum anangmatasrum uumkuram wekaarme tusan nekawaintjai. Faraónka naarijai nekasan tajarme, —tusa José ni yachii ainaun timiayi.
17 Nuna tusa ni yachii ainaun mash tres kintan karsernum engkeamiayi.
18 Tura tres kinta kanur tsawaar, ni yachii ainaun jiiki chicharak: —Wikia nekasan Yusen umirnuitjai. Tura asan wi titatjarme nu turakrumka jakashtatrume.
19 Watska, atum nekasrum wait chicham chichachu akurmeka, atumi yachi kichik karsernam ukuakrum, chikich ainautirmeka atumi weari yuatniuri jukiram wetaram.
20 Tura ataksha winakrum atumi yachi ekeri ayaktaram. Turakrumin atum nekasrum waitrutsuk chicharme tusan nekaaratjarme. Antsu waitrakrumningkia mantamawartinuitai, —timiayi. Tamati ayu tiarmiayi.
21 Tura mai nuamtak chicharnainak: —Nekasar yaanchuik ii yachiin pase awajsau asar, iiksarik yamaikia wait wajaji. Ii yachi wait wajak: Wait anentrurtaram turamu wainiatur, iikia pachischamiaji. Tura asakrin nu tunau jurumaji, —tunainiarmiayi.
22 Tinamtai Rubén chicharak: —Natsa pase awajsairap tusan wi tamaitiatrum anturtukchamiarume. Tura yamaikia ni jakamurin pachisar itiurkachmin pujuinaji, —timiayi.
23 Tamati Joséka ni chichainamunka mash antayat, antukchawa nunisang wajasmiayi. Kame, José ni yachi ainaun Ejipto chichamejai chichaamtai, chikich Ejipto aints chichaman mai nekau asa, José yachiin: Nuna taku tawai tusa ujakmiayi.
24 Tura ni yachii chichainamun antuku asa, José nunia jiinki juutmiayi. Tura ataksha waketki taa, yachii ainaun mash jiis, Simeónkan inakmas ni inatirin chicharak: —Au achikrum, karsernum engkeataram —timiayi. Tamati chikich yachii ainau wainmaunum Simeónkan jingkiawarmiayi.
25 Nunia José ni yachii antinachmaunam ni iniatiri ainaun chicharak: —Au aintsu costalrin trigo chumpiataram. Turasha kuikiarisha costalnum engkeataram. Turaram jintá yuwatniusha susataram —timiayi. Tamati José yachiinkia wainchamunmak turawarmiayi.
26 Turawaramtai José yachii ainau ni costalrin jukiar, burrorin antskar waketkiarmiayi.
27 Tura jinta kanurtinnum jear, kichik ni burrorin yuratas costalrin urak, kuikiarin patatek engketun wainkamiayi.
28 Tura wainak ni yachii ainaun mash ujak: Jiistaram, kuikiarnaka awangturkiari, costalnum engketun wainkajai, —timiayi. Tamati mash sapijmiakar kúra kúra wajainak: —¿Yuska junasha warukamtai jutikrama? —tunaij wajarmiayi.
29 Nunia Canaánnum jear, ni aparin ni turunamurin mash ujakarmiayi. Tura chicharinak:
30 —Ejiptonmaya apuri iin kakar chichartamak: Atum aya anangmatasrum wekaarme turammiaji.
31 Turammatai iikia: Pengke aintsuitji, tura asar anangmatasrikia wekaatsuji.
32 Iikia kichik aintsu uchirinji. Yaanchuikkia doce yachintin ayatrik, kichka mengkakawaitai. Tura ii yachi ekeringkia ii aparijai Canaánnum juwakmayi, timiaji.
33 Tu tinu asakrin, iin chichartamak: Watska, nekasrum wait chicham chichachu akurmeka, atumi yachi kichik wijai pujusti tusaram ukuakrum, chikich ainautirmeka atumi weari yuwarti tusaram, trigo jumchik jukirum wetaram.
34 Tura ataksha winakrum, atumi yachi ekeri ayaktaram. Turakrumin atumka nekasrum pengke aintsuitrume, tura anangkatasrumka wekaatsurme tusan nekaaratjarme. Nuniangka atumi yachiin karsernumia jiiktatjai. Tura atumnasha ju nungkanam angkan wekaasatniun tsangkatkatnuitjai turammaji, —tiarmiayi.
35 Tura costalrin atiatatkamawar, ni kuikiari ijiamu engketun wainkarmiayi. Turawaramtai apari tura niisha mash sapijmiakarmiayi.
36 Tura Jacob ni uchiri ainaun chicharak: —Winaka pengké uchirtichu awajtusrume. Joséka mengkaakawaitai. Tura Simeónsha atsawai. Tura nuna nangkamasrumek yamaisha Benjamín jurutkitasrum wakerarme. ¡Chua, aitkau asakrumin, wikia itiurkachmin nekapeajai! —timiayi.
37 Tamati Rubén aparin chicharak: —Napchauka nintimtsuk asata, apaachi. Wikia Benjamínkan tenapkesan wainkatatjai. Tura ataksha awaingkin itartatjame. Antsu niin itaachmataikia, wina uchir jimiar aina nu maata, —timiayi.
38 Tamaitiat Jacob ayaak: —Uchir Benjaminnaka pengké akupkashtatjai. José jakau asamtai, ningki juwakuitai. Jinta weamunam uchir mengkatrukakrumningkia, wi juuntach asan, timiá wake mesekan jakatatjai. Antsu atumka wiasmamkatnuitrume, —timiayi.