18
Apu David ni nemase ainaun nepetak kantamamuri
1 Apuru wina kakarmarka ametme.
Tura asakmin wikia aneajme.
2 Ametme wina ayamtikrurtin.
Ametme wina uwemtikrurtin.
Ametme wina angkanmamtikruatin.
Ametme wina Yusur.
Ameka pampa muchkachminua tumawaitme.
Tura asakmin amin jean ayamsamnawaitjai.
Ameka tantaara tumawaitme.
Tura asam ami kakarmarmijai wina uwemtikrurtinuitme.
Ame mash ainia nu nangkakau asam,
wina ejarkatnuitme.
3 Apuru amin mash aints ainau:
Ameketme juuntam turamiartinuitai.
Wina nemasur wininamtai,
wi amin untsuam uwemtikrame.
4 Mangkartin ainau timiá untsuri wina mantuwartas winitrinamtai,
wikia jakatatjapi tusan shamkamiajai.
5 Jata achirkawa nunisnak,
tura kuntin ejatkanam achikmawa nunisnak nekapmamramiajai.
6 Tura timiá shamakun Apurun:
Yainkata tusan untsukmiajai.
Tura ni pujamurinia wina Yusur untsumaurun anturtukmiayi.
7 Wi turamtai nungka kakar uurkamiayi.
Tura uurmatai mura ainau kakarman muchitkarmiayi.
Yus pasé aints ainaun kajerkau asa nungkan muchkamiayi.
8 Ni nujinia mukunit shamai jiinua tumauyayi.
Tura ni jangkenia ji kairia nunisang meskartin jiinua tumauyayi.
9 Nayaimpinam pujuutiat Yus kuanki mukunit shuwinnum wajawa tumauyayi.
10 Tura ni awemamuri querubínnum keemas Yus nanamua tumauyayi.
Tura querubínkia nanapejai nasenam pachinak nanaamiayi.
11 Tura mukunit shuwinnum yumi jiturtas kajintramunam Yus anumkawa tumauyayi.
12 Turasha Yus ni pujutirin keemas charim kakar etsantua tumauyayi.
Turamtai mukuntiunmaya micha kaya tumau ji kairi ainaujai pachimramu kakeerarmiayi.
13 Yus nayaimpinam puja nu ipiamtajai ni chichaamurin antumtikiamiayi.
Turamtai mukuntiunmaya micha kaya tumau ji kairi keemakmau ainaujai kakeerarmiayi.
14 Tura chaarim nangkia tumau ayaararti tusa akupkamiayi.
Turamtai wina nemasur ainauka shaminak atu atu tupikiararmiayi.
15 Yus kakar chichaak nasen timiá kakarman umpumtikiam,
juun entsa kunari warukuita tusa paan wainmamtikiamiayi.
Turasha juun entsa nitkarinini nungka paan amiayi.
16 Nunia Yus nayaimpinam pujus tsuntsuma aints juun entsanam jakenaun achikiar juwina nunisang ni uwejen kutsmar wina achirak nemasur ainamunmaya uwemtikrurmiayi.
17 Tura nemasur ainauka timiá kakaram armia nuka wina kajertukar pujuinamunmaya uwemtikrurmiayi.
18 Wina nemasur ainau nepetukartas wakerinamtai,
pengké uwemrachmin pujai,
Apurka winaka yainkamiayi.
19 Tura angkanmamtikruamiayi,
tura wina anentu asa Yus uwemtikrurmiayi.
20-21 Wikia Yusrunka pengké ukukchamiajai.
Tura Yusnaka umirtan nakitajai pengké tichauyajai.
Wi pengker pujau asan,
tura Yuse jintin amaku asamtai,
Apur winaka pengker awajtusmiayi.
22 Ni umirkatin chichamnasha kajinmichuitjai.
Tura nu chichamnasha pengké inaisachuitjai.
23 Tura nekasan Yusen nintimsan tuke pengker pujuyajai.
Tura asan tunaunaka nakitnuyajai.
24 Wi Yusen nintimsan pengker pujau asamtai,
winaka pengker awajtusmiayi.
25 Apuru amin umirtaminauka amesha ajapamka ukuatsme.
Tura amin pengker awajtaminak pujuinauka amesha pengker awajme.
26 Tura ame pengké anangkartichu asam,
anangkartichu ainauka tuke yayaame.
Antsu anangkartin ainau aminu nekamtairumjai nepeteame.
27 Ameka mianchau ainau uwemtikratnuitme.
Antsu wikia miajuitjai tumamin ainau mianchau arti tusam inatsaartinuitme.
28 Apuru ame ji kapawa nunisketme.
Yusru wikia itiurkachminum pujamtai,
winaka paan nintimtikrurtinuitme.
29 Tura asakmin ami yaimkemjai wina nemasur ainaun nepetkatnuitjai.
Tura ni yaktari wenurmau wainiatnak wayaatnuitjai.
30 Yuse jintingkia nekas pengkeraitai.
Yuse chichamengka nekas waitchau ainawai.
Aints ainau niin nekasampita tusar nintiminaunka Yus ejaktinuitai.
31 ¿Chikich yus iin ayamrutmaktincha awak?
Atsa, chikich yuska ii Apurijai metekka pengké atsawai.
32 Wina kakarmarun surustinka Yusketai.
Wina pujutru iwiasmatrukchatnuka nuketai.
33 Japa tsekengki wekaawa nunisang wina kakamtikrurtinka Yusketai.
Tura mura wakancha ayaatsuk wekaamtikrustinka nuketai.
34 Wi mesetnum weamtai:
Tu maaniata tusa wina jintintruatnuka Yusketai.
Tura kunturun kakamtikrurtincha nuketai.
35 Yusru ame wina uwemtikrinuyame.
Tura untsur uwejmijai wina inantinuyame.
Tura wait anentruram wina pengker awajtinuyame.
36 Wi wekaamtai angkan wekaasata tusam waitkamiame.
Turasha nungkanam ayaaraim tusam nawer kakamtikrurume.
37 Tura asakmin wina nemasur ainaun papeekan amankiamiajai.
Tura mash amukan waketkimiajai.
38 Niin charukarmau asar pengké nantakcharmiayi.
Antsu wina nawerun ayaamsar ayaararmiayi.
39 Yusru wi mesetnum weamtai ame kakamtikrurmiame.
Tura asakmin wina umirtutan nakitin ainau wina tsuntsumrutawarmiayi.
40 Wina nemasur ainau winiangka tupikiakiarti tusam tsangkamkamiame.
Nu tsangkamkau asakmin,
wina kajertin ainaun amukmiajai.
41 Ayamrutkata tinamaitiatang,
aints kichkisha ayamrukcharmiayi.
Tura Yusnasha untsuinamaitiat niisha aikchamiayi.
42 Tura asamtai wikia nase umpuak nungka tsetserin juwawa nunisnak nu aints ainaun nepetkan turan nungka mirachia nunisnak najarmiajai.
43 Tura asamtai ame Apuru nu aints amin umirtamchau ainamunmaya uwemtikrurmiame.
Tura nu nungkanmaya ainau apuri ati tusam inaitukmiame.
Tura asakmin wainchati aints ainauka wina inatir ainawai.
44 Turasha wina chichamrun antukar umirtinawai.
Tura chikich nungkanmaya ainausha wina pengker awajtinawai.
45 Nu aints ainauka sapijminawai.
Tura kurainak ni anumkamurinia jiininawai.
46 Ii Apuringkia tuke pujuuwitai.
Iin Ayamtikiartin asa,
timiá pengkeraitai tajai.
Turasha wina Yusur wina uwemtikrurtin asamtai,
ameketme juuntam tajai.
47 Yus chikich nungkanmaya ainaun nepetkau asa,
wina nemasur ainaunka yapaijkiamiayi.
48 Wina nemasur ainau kajertinamunmaya Yus wina uwemtikrurmiayi.
Tura chichaman umichu ainau wina nepetukartas wakerutiarmia nu aintsnumia ayamtikrurmiayi.
Ame Apuru mangkartin ainamunmaya tuke uwemtikrame.
49 Tura asakmin mash nungkanmaya ainau iruntramunam amin:
Ameketme juuntam tajame.
Tura amin naarmin pachisan kantan kantamruatjame.
50 Ame apu ata tusam wina inaituku asam,
wina nemasur ainau nepetkata tusam kakamtikrinuyame.
Tura asam winasha tura wina wear ainausha tuke ami anengkratairumjai pengker awajnuyame.