35
David Yusen: Yainkata tusa seamuri
1 Yusru wina nepetukartas wakerutina nuka amek nepeturkata.
Tura wijai maanitan wakerina nujaisha amek maanikta.
2 Aminu tantaarum jukim wina yainkatasam winita.
3 Tura nangkiram achikiam,
wina mantuwartas papeetkiar winina nuka maawarai tusam surimrukta.
Tura wiitjai amin uwemtikratnunka turuttia.
4 Yusru wina mantuwartas wakerutina nuka natsaarar tupikiakiarti.
Tura wina pasé awajtusartas wakerutinausha nunisarang natsaarar waketkiarti.
5 Tura nase umpuak chirichri kaarun juwawa nunisang ami awemamuram ainau nu aints ainaunka jukiar arák ajapawarti.
6 Turinamu asar ni teenam wekaasar jinta chungkap amaunum ayaararti.
Tura ami awemamuram niin papeekarti.
7 Kuntinun achikiartas ejatkan ejatinawa nunisarang nu aints ainauka nangkamiar wina achirkartas ejatkan pujtursarmayi.
Tura ayaarti tusar waan tautriniarmayi.
8 Turinau asaramtai aneachmau nu waanmaka ayaarar mengkakarti.
Tura ejatkan ningki puusarma nunisha achimkar,
wait wajakarti tusan amin seajme.
9 Antsu wina uwemtikruru asakmin,
maaketai tusan warastatjai.
10 Tura wina nintirjai warasan:
Amijai metek chikichkisha atsawai titatjai.
Nekas kakaram ainau mianchau ainaun tura yuuminauncha nangkamiar takamtikinawai.
Tura wainiatum nu aints ainamunmaya ame angkanmamtikiatnuitme.
11 Tsanumin aints ainauka wajakiar,
wi nekachmaun pachisar inintrinawai.
12 Wikia niin pengker awajnuyajai.
Tura waitinayat winaka pasé awajtusarmayi.
Tura asar wina wake mesemtikrukarmayi.
13 Yaanchuik nu aints ainau jaak tepeenamtai,
wikia wake mesekan yutsuk pujuyajai.
Tura amin tuke nintirjai nu aints ainaun pachisan seayajme.
14 Aints ni nukuri,
tura ni amikri tura ni nekas yachí jakamtai,
wake mesek pujawa nunisnak wisha ni jaak tepaun wainkau asan,
napchau nintimsan pujuyajai.
15 Antsu wi pasé pujau asamtai,
nu aints ainau mash iruntrar wishikrin armayi.
Tura wainchatiya nunisarang tuke inaitutsuk winaka pasé awajtusarmayi.
16 Tura wina itit awajtusar tura wishikrinak tura kajertinak jiiru awajtiarmayi.
17 Apuru ¿nu aints ainau warutam kinta jiiame?
Nu aints ainau juun yawaaya nunisarang shiniinak,
wina mantuwartas wakerutina nuniangka uwemtikrurta.
18 Turakmin aminu aintsrum untsuri iruntramunam amincha maaketai titatjame.
19 Wina nemasur ainau nangkamiar kajertina nuka warascharti tusan seajme.
20 Nu aints ainauka maanitsuk pujusartatkamawar tujintinawai.
Antsu aints angkan pengker nintimsar pujuinaun pachisar anangkinak chichaman najatinawai.
21 Tura jangken awarar:
“Iisha ni turamuri wainkawaitji.
Atumsha nekaataram”,
nangkamiar waitrinak tinawai.
22 Tu tinau wainiatum,
ame Apuru ni turamuringkia wainkawaitme.
Tura asam ame takamtaikia pujusaip.
Tura wina ajapruamka ukurkiip.
23 Yusru wina Apur asam,
anearam wajakim wina turamur nekartuam ayamrutkata.
24 Yusru ameka wina Apuruitme.
Tura pengké tunaarinchau asam,
wina tunaar atsuash tusam jiirtusta.
Tura wishikrarai tusam amek surimrukta.
25 Wina pachitsar:
Tu wait wajakti tusar iikia wakerukmaji.
Nuka yamaikia mesraji turutiarai tusam surimrukta.
26 Tura wi wait wajamtai,
wina jiirsar waraina nuka inatsarta.
Tura wina pachitsar:
Nuka mianchawaitai turutinauka tuke natsaaminak pujusarti tusam inatsaarta.
27 Antsu wina pengker nintimtursar:
Ni nemase ainaun nepetkati turutinauka warainak untsumkarti.
Turasha tuke Yus juuntaitai,
tura ni inatiri pengker pujusti tiarti.
28 Ni turutinamtai wikia ame pengker turamurmin pachisan chichastatjai.
Tura kintajai metek:
Ameketme pengkeram titatjame.