39
David: Ii pujutringkia wári amukatnuitai timiauri
1 Pasé aints ainau wina jiiru pujuinaing,
wikia wiki nintimsan:
Nekasan pengker pujustatjai tau asan,
pasé chichamnasha pengké chichakchatatjai timiajai.
2 Tura asan wikia pasé chichamnasha chichatsuk,
tura pengker chichamnasha chichatsuk takamtaik pujusmajai.
Turayatun atsantrachmin nekapeakun,
3 wina nintir ji keawa nunisnak nekapeakun,
wina Yusrun kakarman untsuakun:
4 “Apuru ¿wina jakatniur warutik at? tusam nekaamtikruata.
Turasha ¿warutam kintak iwiaaku pujustaj? tusan nekaatasan wakerajai”,
timiajai.
5 Wina pujutruka ame surusmiame nuka wári mengkaakatnuitai.
Tura asamtai nukap kinta pujuschamin nekapeajai.
Aintsti pujutri kichik mayatmaujai metekaitai.
6 Tura mash aints ainauti mikin wári mengkawa tumawaitji.
Tumau asar ii warinchuri untsuri kiaungkar pujayatrik,
ii jakaakrincha yáki nuna jukit tusarsha nekatsji.
7 Tu pujau asan ¿wisha itiurkatjak? tusan Apuru aminak nakajme.
8 Wina tunaarunia angkanmamtikruata.
Tura nintinchau ainau wina wishikrurarai tusam surimrukta.
9 Ami turamurmin nintimsan,
chichatsuk takamtaik pujusmajai.
10 Wina wait wajaktin surusu asakmin,
wikia jakamin nekapeajai.
Tura asamtai wait aneasam winaka wait wajaktinka nukapka surusaip.
11 Aints ainauti tunau asakrin:
Tunaarum inaisataram tusam,
wait wajaktin sukartame.
Aintstikia mash nangkamir nintimsar pujau asakrin,
warí nukap wakeraji nuka nungka tsetseria tumau ati tusam tsairtinuitme.
12 Tura asam wi seajme nu anturtukta Apuru.
Juutmaur antukam,
wina neaikir jiisam airkata.
Ameka chikich aints wainchatiya nunismek winaka jiirme.
Tura asakmin ii juuntri yaanchuik pujuarmia nunisketjai.
Tura asan chingki taa keemtsuk weawa nunisketjai.
13 Wikia jaatsuk pujaing,
winaka kajertukaip.
Tura wi jaatsaing jumchik iwiaaku pujusti tusam tsangkatrukta.