44
Yus yainkata tusar seamu
1 Yusru ii juuntri ainau iincha ame yaanchuik turamurmin pachisar ujatmakaru asaramtai,
iisha nuka antukuitji.
2 Tura asakrin amin umirtamchau ainia nuka ami kakarmarmijai ni nungkarinia jiikim wait wajaktin susam,
ii juuntri ainau nuni pujusarti tusam,
nu nungkaka ni susawitme.
3 Antsu ni kakarmarijaingkia tura ni nangkirijaingkia ni nemase ainaunka nepetchau armiayi.
Tura ningkikia ni nemase nungkarincha atankichu armiayi.
Antsu ii juuntri ainau aneau asam paaniunam pujusam,
ami kakarmarmijai turamiame.
4 Apuru ameka wina Yusruitme.
Tura asam ami aintsrum ainauka ni nemase nepetkarti tusam,
ami kakarmaram suyame.
5-6 Tura asakmin iinu tishimkuri tura iinu nangkirisha nintimsar:
Nujaingkia ii nemase ainaunka nepetkatatjiapi,
tuuka nintimchau ayaji.
Antsu ame iinka yaingkratkau asakmin,
iin nepetamkartas wakeriarmia nuka ami chichammijai nepetnuyaji.
7 Ii nemase ainau nepetnuyame nuka ametme.
Tura iin suwirpiaku jiirmin armia nu inatsartinmeka ametme.
8 Iisha ame pachisar tuke:
Ameketme Yusem titinuitji.
Turasha tuke ami naaram pachisar:
Ameketme juuntam titinuitji.
9 Antsu iinka nakikratkum inatskartame.
Tura yamaikia ii suntari ainaujaingkia mesetnumka weatsme.
10 Tura asakmin ii nemase ainau jiisar shamakur tuntupear ukuaji.
Tura asakrin iin kajertaminak pujuinauka ii jeen wayaawar kasartaminak ni wakerina nuna juwinawai.
11 Tura asamtai uwijan maawartas juwina nunisarang iincha juramkiarti tusam tsangkamkartukmiame.
Turasha amin umirtamchau ainamunam pachinkaram pujustaram tusam iinka ukukratkimiame.
12 Tura ami aintsrum ainautin ii nemase nepetkarti tusam tsangkamkartukmame.
Turayatum ameka aints ni warinchurin akikchaujai surawa nunismek iin surukratkamiame.
13 Tura iin pachitmasar pasé chichasarti tusam tsangkamkartukmame.
Tura asakmin iin irutkau ainausha iincha itit awajtaminak wishikraminaji.
14 Tura amin umirtamchau ainau iin wishikrarti tusam tsangkamkartukmame.
Tura asakmin nu aints ainau iin waitmakar muuken pearar wishikraminaji.
15-16 Tura wina nemasur ainau wina yapaijtukartas itit awajtusar pasé chichartinau asaramtai,
wikia tuke natsaamakun pujajai.
Tura nukap natsaamau asan,
yapirka kapantran pujajai.
17 Antsu iikia aminu chichamem tuke umirnuyaji.
Tura ameka kajinmichuyaji.
Tura waininayat iinka pasé awajtamsarmiaji.
18 Tura wainiatrik ame ukutka nakitnuyaji.
Tura asar aminu jintimin tuke wekainuyaji.
19 Tura wainiatum ameka ajapkartuam ukukratkimiame.
Tura asakmin iikia teenam pujuinawa nunisrik pujumiaji.
20 Yusru iikia ame kajinmakir chikich yus,
Yuschau wainiatur seakrincha,
21 ameka mash aints ainau nintimaurisha nekau asam,
nusha amek nekaamnawaitme.
22 Antsu ame nemarin asakrin,
uwijan maawartas juwinawa nunisarang kintajai metek iincha mantamawartas wakerutminaji.
23 Apuru wait aneasam shintaram anturtukta.
¿Waruka kanurua nunismeksha pujame? Turam iincha tuke ajapkartuamka ukukratkiip.
24 ¿Waruka aints anumak pujawa nunismeksha pujame? ¿Waruka ii timiá wait wajarnisha kajinmakratkinua nunismeksha pujame?
25 Iikia maach nungkanam tepawa nunisrik natsaamakur napchau nintimsar pujaji.
26 Apuru wajakim yaingkratkata.
Tura iin nukap anengkratau asam,
uwemtikiartukta tusan seajme.