55
David: Wina nemasur ainaun Yus mengkatrukti tusa seamuri
1 Yusru wi seajme nu anturtukta.
Wi seamur anturtutskeka pujusaip.
2-3 Antsu pengker nintimtursam airkata.
Wi napchau nintimsan pujau asan tajame:
Wina nemasur ainau chichainamurin tura pasé aints ainau shiniinamurin antukan kuraajai.
Nu aints ainauka wait wajaktiniun untsuri surusar,
kajertukar nepetukartas wakerutinawai.
4 Tura asamtai wina nintirka sapijmiakun nukap teetui.
Wikia jakatatjapi tu nintimsan pujajai.
5 Tura tenukap shamau asan,
sapijmiakun kuraajai.
6 Tura asan yapangkam nanamina nunisnak nanamin akunka,
nanaminapi ayamsainja tu nintimsan pujajai.
7 Tura nanamnuitkunka arák wena aints atsamunam pujusminuitjai.
8 Tura nase kakarman nasenmataikia,
tura ipiamtasha untsuri patinamtaisha,
nanamin akunka anumkatasan wári tupikiakminuitjai,
tu nintimsan pujajai.
9 Apuru wikia mangkartin ainau turamurin wainkan,
tura ni maaniamurincha wainkau asamtai,
wina nemasur ainau mengkaakarta,
tura ni chichamesha nuwamtikiarta.
10 Nu mangkartin ainau tsawaisha tura kashisha yaktanam wekajinawai.
Tura asar yaktanam tuke pasé aa nuna turinawai.
11 Nu yaktanmaka aya mangkartutiri tura waitrutiri nukap ainawai.
12 Wina nemasruka winaka paseenaka awajtuscharmayi.
Nu pasé awajtinamtaisha wikia tsantramnauyajai.
Tura wina kajertin ainausha
winaka eatkacharmayi.
Wina eatinamtaisha wikia anumkamnauyajai.
13 Antsu nuka nekas wina tsaniakmauruketai.
Turasha wina nekas amikur ayayi.
14 Nijai pengker nintimsar chichasmi tusar,
tuke Yuse jeen irunnuyaji.
Tura nijai aints iruntramunmasha wekainuyaji.
15 Wina nemasur ainau aneachmau jakaarti.
Ni ninti tunau piaku asaramtai,
iwiaaku ainayatang jakau iwiarsamunam ayaararti.
16 Antsu wikia Yusen seatatjai.
Wi turamtai wina Apur uwemtikrurtatui.
17 Kashiksha tura tsaa tupnisha tura kashisha Apurun untsukan seatatjai.
Wi untsuam wina chichamrun anturtuktatui.
18 Wina nemasur untsuri au wainiatang wina Apurka angkan awajtustatui.
Tura maawarai tusa uwemtikrurtatui.
19 Wina nemasur ainauka Yusnasha nintimtsuk pujuinau asar,
ni pujutrinka yapajiachartin ainawai.
Turinau wainiatang Yus aints ainaun tuke ina nuka wina nemasur ainaun inatsaartatui.
Turak winasha anturtuktatui.
20 Tura amikmami tinayat,
nu chichamnaka umiinatsui.
Antsu ni amikrinak maawartin ainawai.
21 Ni chichamenka jaimiasar chichainayat,
mesetan nintimin ainawai.
Ni chichamenka antujamniau chichainayat,
nangki tsakamua tumau ainawai.
22 Aints Yusen umirak pujaunaka ayaarti tusangka,
Yuska pengké tsangkatkashtatui.
Tura asamtai ame napchau nintimsam pujamurminka ii Apuri jurutkiti tusam tsangkatkata.
Ame turakminka ukurmakchatatui.
23 Yusru mangkartin ainau tura wait chichaman chichau ainau chikich aints ainaujai metekka nukapka pujuschartin ainawai.
Ameka nu aints ainau jakaar iwiarsamunam ayaararti tusam akupkatnuitme.
Antsu wikia amin nintimtajme.