2
Yisu Yitam i Mpui Isu Wain Gurun
1 Gubuꞌ iruꞌ fada sib da nam gadan bintsuda garam da sagat iwaꞌ gamp isiꞌ Kana mingꞌa Galili, da Yisu rinanggan impa nigi.
2 Da rib igi irim nan i Yisu da riban atsungꞌa gin i mpada wasaꞌ i nam gadan bintsuda gin igi mpruꞌan.
3 Da gubuꞌ wain gurun ntsupan da Yisu rinanggan ini da Arangan, “Rib ani wain gurun gan intsup sib.”
4 Da Yisu ini rinanggan nifunggan mungaꞌ ibiani, “Rinangꞌ, anungꞌ dzi nanggangꞌ mangan igi wayu. I dzi gubuꞌ gangꞌ anungꞌ iba warip iwaꞌ u.”
5 Da Arangan rinanggan ini da garam gum ruas igi ibiani, “Agam wanang nam idzuwai arangan nidan da agam i nangan.”
6 Mingꞌa ungar igi da gur tauf 6 ranguda mpui gin rungꞌ imingꞌ i finuꞌa i adzuꞌa bangin da nam fain gin atsungꞌa garam Yuda sanaban nanga wangunggan sapan i Anutu maranggan. Gur tauf igi bitsintaꞌ bitsintaꞌ isangꞌ ranguda mpui bida 100 lita gin.
7 Yisu ini da garam gum ruas ibiani, “Warangu mpui naruꞌ gur santan aga nasangꞌ bafungꞌan.” Ibinigi da tuas arangan irangu mpui i gur santan igi isangꞌ fungꞌa sib.
8 Da ini da tuas arangan ibiani, “Wafinuꞌ mpui ani pas da wayu wafan da garam suda wain i nam gadan bintsuda gin da naintsaꞌ.” Ribarangan inang ibi Yisu nidan.
9 Gubuꞌ garam wain igi intsaꞌa mpui suda wain gurun igi da anungꞌ isruꞌ i wain gurun igi iba imingꞌ anungꞌ. (Da garam gum ruas finuꞌa mpui igi sruꞌ gin.) Ibinigi da garam suda wain i nam gadan bintsudan igi inuꞌ garam uda finin igi ba
10 da ini rutin, “Garam santan rima ampi i wain gurun irim wain gurun ngiban bini isu miamun. Da gubuꞌ garam numa yusan da maran didiruntan da irim wain gurun mamida i ngiban. Da bitsintaꞌ u gantsi wain gurun ngiban bini ani isangꞌ u riman da aruani.”
11 Nigi nam maran mangan miamun Yisu nangan, da inang imingꞌ gamp Kana mingꞌa Galili. Arangan isantingꞌ nampanggan da riniurun gan wasi, da riban atsungꞌa gin imuaruts Arangan.
12 Da gubuꞌ nam bintsudan igi ntsupan da Yisu irut rinanggan da rain rusan da riban atsungꞌa gin iruꞌ gamp Kapenaum, da impai igi gubuꞌ fain.
Yisu Idaru Garam Rantsa Nam Rai Sinungꞌ Ungar Mararam
13 Garam Yuda gubuꞌ gan tsiraꞌ mararam faringꞌa bida Angira Atupa Sib nanga i waꞌan, da Yisu iyab Yerusalem.
14 Da mingꞌa Ungar Mararam ntiangꞌ gan wasaꞌ da Yisu itsanga garam rantsa makau, dumpa, da ngasabusir, da garam suba moni i moni mingꞌa intap fain badan rumpai.
15 Ibinigi da Arangan iyu bruꞌ da ifir impruꞌ ruan da idzibi rib igi da idaru rai sinungꞌ Ungar Mararam impruꞌ da dumpa da makau. Da yitam i garam suba moni igi tiriang gan da iyats i moni gan ararai.
16 Da impiꞌ rib rantsa ngasabusir da ini binaꞌ, “Wau nam santan igi nawaꞌ sinungꞌ mumai ani! Anungꞌ nanga dzi Ramanggangꞌ ungaran ani suda ungar rantsa nam in u!”
17 Gubuꞌ Arangan riban atsungꞌa gin tsangandan da ringantagin da maran ifur nan kakaran mingꞌa Anutu nan gan nida binaꞌ, “Dzi marangꞌ yari tsiraꞌ bingan angu i ungaram ibi dzaf iga imingꞌ dzi wangunggaꞌ wasaꞌ.”
18 Da garam Yuda garam gudzun gan fain igut i Yisu ini binaꞌ, “U bungꞌ anang nam maran mangan idzuwai i santingꞌa bida Anutu irim nampang da agu i nanga nam bida nigi?”
19 Yisu itip ini ribarangan nifunggan mungaꞌ ibiani, “Watawaꞌ ungar mararam ani rai, da gubuꞌ iruꞌ da bits da dzi bungꞌ atip araꞌ gin.”
20 Da rib Yuda igi itip ini Arangan nifunggan mungaꞌ ibiani, “Aꞌuꞌa! Ungar Mararam riman ani iyu udzuf guntiꞌ bingan isangꞌ 46 i rima sib. Da u ni tipa raꞌa gin da gubuꞌ iruꞌ da bits angu, a?”
21 Da bitsintaꞌ ungar mararam Yisu nidan igi ini iyab i rininggan.
22 Ibinigi da gubuꞌ Anutu raꞌa i Arangan sinungꞌ nam mampan, da riban atsungꞌa gin maran ifur nan Arangan nidan ugu. Da ribarangan imuaruts Anutu nan gan da nan santan Arangan nidan ugu.
23 Gubuꞌ Yisu mpada Yerusalem i gubuꞌ mararam tsiraꞌ faringꞌa bida Angira Atupa Sib, da rib ampi bingan itsanga nam maran mangan ampi bingan Yisu nangan mingꞌa nigi da imuaruts Arangan.
24 Da bitsintaꞌ Yisu wamuaruts rib igi u, i Arangan irarab garam santan ratar.
25 Da Arangan wamami ruan i garam mangan tipa nida garam gar wasi da Arangan u, imaꞌ, i Arangan runggan irarab garam gar wangunggan wasaꞌ sib.