14
Yisu Inang Garam Rinin Idaum da Gubuꞌ Sabat
1 Gubuꞌ Sabat mangan da Yisu ifa i gada nam mingꞌa garam gudzun Farisai mangan ungaran. Da ribarangan itsanga Yisu ragun i bungꞌ anang nam faingꞌ.
2 Da garam mangan fagan da bangin fupan impa Arangan maran.
3 Da Yisu igut i rib Farisai da garam gudzupuꞌ i nan faidagin, “Amaꞌ, nan faidagin ini i isangꞌ i nanga garam gingꞌa rinin dauman da gubuꞌ Sabat, ma imaꞌ?”
4 Da bitsintaꞌ tuas arangan ibugin nida nan mungaꞌ da impa frap nufan angu. Da Yisu igif garam ugu da rinin idaum da Arangan ini da ifan.
5 Da Yisu igut i ribarangan, “Bida agam mangan narunggan ma makau gan mangan ruaꞌa ntsuf guntiꞌ bingan da gubuꞌ Sabat, da arangan anungꞌ isangꞌ uriꞌa sung angu i fada i dzungꞌa gin yaban, ma?”
6 Da ribarangan wasangꞌ i nida nan mungaꞌ u.
Nan Rasuda Runggan
7 Yisu itsangan ampi waꞌa i gada nam igi da yus-yusa ruan i mpada mumai miamun. Da Arangan ini nan raman ani da ribarangan:
8 “Bida rib fain rima nan i agu i fada i nam gadan bingsuda i garam da sagat uda ruan, da anungꞌ mpada mumai miamun u. I bida nuꞌa garam mangan tsarifa yusa agu mpruꞌan,
9 da garam wain nuꞌa agam igi bungꞌ aba da nani da agu, ‘Wauriꞌ i mumai igi da aruani nampa gin.’ Da u bungꞌ auriꞌ nafa mpa bampan ruta rini miaꞌ.
10 Da bitsintaꞌ bida rib fain nuꞌa agu da wampai mumai bampan bingan. I bida garam nuꞌa agu igi badan da tsanganda agu, da bungꞌ ani, ‘Raingꞌ, wauriꞌ da wamungꞌ afa mumai bini aga.’ Bidanigi mingꞌa rib santan mpadan igi marangan da bungꞌ atsarif agu.
11 Garam tsarifa runggan da Anutu bungꞌ arasu arangan da garam rasuda runggan da Anutu bungꞌ araꞌ i arangan.”
12 Ida Yisu itip ini nan da garam nuꞌa Arangan badan ibiani, “U nida suda nam gadan tsiraꞌ mangan, da anungꞌ nuꞌa rinum rusam, ma raim rusam, ma rini gisinggam, ma garam nam bunump mpada uts da agu u. Bida u nanga bida nigi, da ribarangan mani bungꞌ atip anang nam igi mungaꞌ da agu.
13 Da bitsintaꞌ bida u nida suda nam gadan tsiraꞌ da warim nan i garam sauda runggan, da garam ngump bigruꞌ, da garam gasriꞌan, da garam maran gampaman.
14 Da nugum watsiaꞌ i ribarangan anungꞌ isangꞌ i rima nam mungaꞌ da agu. I wain ibi Anutu bungꞌ arim nam mungaꞌ da agu da gubuꞌ garam muarutsan santan muntida marataꞌ.”
Nan Raman i Nam Gadan Tsiraꞌ
15 Garam ruta Yisu gada nam igi gan bits iringant i nan igi da ini da Yisu, “Rib aru gada nam mingꞌa Anutu nanggan mpada tayangꞌ gan garaman igi nugun natsiaꞌ.”
16 Da Yisu ini nan mungaꞌ ibiani: “Garam mangan ini gada nam tsiraꞌ da irim sisingꞌ i garam ampi bingan.
17 Waꞌa gubuꞌ gada nam da arangan itip itangin mamaꞌ guman mangan ifa i nida nan da rib aru rima nan gin ugu, ‘Agam waba, i itip nam gadan sib.’
18 “Da bitsintaꞌ ribarangan ini nan gaiba ruan mara maran i mamida i badan. Miamun ini, ‘Dzi nagaib runggaꞌ i dzi bungꞌ iyu intap gum faꞌ mangan da dzi nafa tsangan, ibinigi da dzi wasangꞌ i biaꞌan u.’
19 “Da mangan ini, ‘Dzi bungꞌ iyu makau 10 i nanga gum in, da dzi bungꞌ afa intsaꞌ ribarangan i nanga gum. Da wafa ni dzi nanggaꞌ gampunda ruangꞌ igi.’
20 “Da mangan ini, ‘Dzi gampun runggangꞌ da agu i dzi bungꞌ iyu fininggaꞌ da dzi wasangꞌ i biaꞌan.’
21 “Da mamaꞌ gum itip iba da ifis i nan santan igi da garam gudzun gan. Da ungar rinunggan igi nugun itsakia wasi da itip iwat mamaꞌ guman da ini, ‘Wafa sung sanampun tsiraꞌ da isiꞌ mingꞌa gamp da wais bangim i garam sauda runggan da garam faga bigruꞌ da maran gampaman da gasriꞌan.’
22 “Raiyi da mamaꞌ gum itip iba da ini, ‘Tsiraꞌ, nan idzuwai u nidan, da dzi nang sib, da bitsintaꞌ mumai rumingꞌ.’
23 “Da garam gudzun ini da mamaꞌ guman, ‘Wafa sanab tsiraꞌ da sanab mingꞌa gum wasaꞌ, da wani da rib fain u waꞌa rutin da naba i dzi ungarangꞌ fungꞌan.
24 Dzi nani da agam, garam tuas aru dzi nuꞌa mungꞌ ugu gan mangan wasangꞌ i ntanga nifun i dzi nam gadan gaꞌ igi.’ ”
Sanab Suda Yisu Garaman Atsungꞌa Gin
25 Utup tsiraꞌ bingan yatsungꞌ Yisu da Arangan iparim i ruan da ini da ribarangan,
26 “Bida mangan nida atsungꞌa dzi, da mamida buginda gan ramanggan da rinanggan da fininggan da narun rusan da rain rusan da nafun rusan da mamida nida mais i runggan, da arangan wasangꞌ i suda dzi garamangꞌ atsungꞌa i dzi.
27 Garam mangan mamida buaringꞌa gai mpara i ruan gan da atsungꞌa dzi, da anungꞌ isangꞌ i suda dzi garamangꞌ atsungꞌa i dzi u.
28 “Bida agam mangan maran furan i rima ungar guntiꞌ antungꞌa yaban, da arangan nampa mungꞌ da narants uwayant i ungar igi nam bunumpan, i tsanganda bida moni gan isangꞌ i ntsupa ungar igi sib ma imaꞌ.
29 Da bida arangan mamida nanga bida nigi, da arangan rafa dubung sib da sintunga uru angu da mamida ntsupa ungar igi sib, da rib santan tsangandan igi bungꞌ arubungꞌ arangan da bungꞌ ani da ruan,
30 ‘Garam aruani buni rima ungar da moni gan imaꞌ i ntsupa sib.’
31 “Ma bida king manga garaman singaari 20,000 bada i ruta king manga garaman singaari 10,000 isa ruan, da king garaman singaari 10,000 natip nan mungꞌ i sruꞌagin bida garaman singaari isangꞌ i muntida mungꞌ i garam singaari 20,000 igi ma.
32 Bida arangan tsanganda runggan bida mamida sangꞌan, da aru garam ipiap rumingꞌa guntiꞌ badan, da arangan natangin garam yafada nan nafa i tipa nan mpada bini.
33 Ibinigi da u wasangꞌ i suda dzi garamangꞌ atsungꞌa i dzi bida u mamida i tanginda nam bunumpam santan intap ani rai.
34 “Iriꞌ igi nam ngarubini bingan. Da bitsintaꞌ bida gamiꞌ adzuꞌan da giriripan gan maꞌan, da wasangꞌ tipa nanga nam manga i iriꞌ igi i tipa giriripan u. Imaꞌ.
35 Da iriꞌ giriripan maꞌan igi da anungꞌ isangꞌ i rima intap ma nam ragin ufuman sib i suda nagaran. Imaꞌ, bungꞌ atapu rai. Rib ringa bampun gan ringantagin mingꞌan da narim ringan i nan igi bini.”