4
Sadang Yintsaꞌ Yisu
(Matiu 4:1-11; Markus 1:12-13)
1 Marapayam Mararam isisungꞌ Yisu da itangin mpui Yordan rai. Da gubuꞌ arigi Marapayam yutsungꞌ Arangan ifa nam manaꞌ dadauntan.
2 Da Sadang yintsaꞌ Arangan i nigi isangꞌ gubuꞌ 40. Da gubuꞌ igi ntsupan da mangits irut iyus, i Arangan anungꞌ iga nam mangan u.
3 Da Sadang ini da Yisu, “Bida Anutu Narunggan agu, da wani da tauf ani nasu nam gadan.”
4 Da Yisu ini i nifunggan mungaꞌ ibiani, “Anutu nan gan akaran rumingꞌ ibiani, ‘Garam gar mangan anungꞌ isangꞌ i mpada marataꞌ i nam gadan angu u.’ ”
5 Da Sadang yutsungꞌ Arangan iyab mamai wagungꞌ mangan da sung angu isantingꞌ i gamp santan mingꞌa intap da intap.
6 Da ini rutin, “Nam bunump santan u tsangandan ani dzi su wain gin, da dzi bungꞌ atangin da agu i u suda wain gin, da u bungꞌ au bingan tsiraꞌ gin. Da bida dzi riman da mangan da dzi bungꞌ arim.
7 Ibinigi da bida u idzaꞌa fagam da dzi, da nam santan igi bungꞌ asu agu gam.”
8 Da bitsintaꞌ Yisu ini Sadang nifunggan mungaꞌ ibiani, “Anutu nan gan akaran rumingꞌ ibiani, ‘Watsarif gam Nifutsarifam u Anutu gam da wapumuꞌ Arangan runtaꞌ angu.’ ”
9 Da Sadang itip yutsungꞌ Arangan ifa Yerusalem da imunti Ungar Mararam gudzun wagungꞌ da ini, “Bida agu suda Anutu Narunggan da watup waruꞌ.
10 I Anutu nan gan akaran rumingꞌ ibiani:
‘Arangan bungꞌ awat angira gan
i rima agu sib.
11 Da ribarangan bungꞌ amagangꞌ agu i banginggan sinungꞌ tauf,
da wasangꞌ i u utuda fagam u.’ ”
12 Da bitsintaꞌ Yisu ini, “Anutu nan gan akaran mangan ini binaꞌ, ‘U anungꞌ intsaꞌa i agada Nifutsarif u Anutu gam i atsungꞌa nan ragada sib ugu u.’ ”
13 Gubuꞌ Sadang intsaꞌa Yisu sib da itangin Arangan rai, da Sadang ifangꞌ i gubuꞌ mangan i tipa intsaꞌan.
Ampan Nasaret Irim Barun da Yisu
(Matiu 13:53-58; Markus 6:1-6)
14 Yisu tipa fada Galili da isisungꞌ i Marapayam nampanggan, da Arangan sisingꞌ gan ipuꞌ idzarangꞌ gamp santan mingꞌa Galili.
15 Arangan iyung ifis i nan imingꞌ ungar mpruꞌa ruan gin da garam santan itsarif Arangan.
16 Arangan itip ifa Nasaret, gan gampan wain aru yingꞌa gin ugu. Yisu yatangꞌ ungar mpruꞌa ruan gin da Sabat, gubuꞌ mararam mpada asap, ibi musa nangan da gubuꞌ Sabat santan. Da imunti iyab i faringꞌa nan mingꞌa Anutu nan gan.
17 Da garam mangan irim papiar profet Aisaia nan gan kakaran mingꞌa gin da Arangan. Ibuadza da iwaꞌ da nan da ifaringꞌ ibiani:
18 “Nifutsarif Marapayaman irut dzi
i Arangan ipiriangꞌ dzi
i fisa i gan sisingꞌ bini gan da garam sauda runggan.
Itangin dzi iba i nida nan wasi i garam karabus ruas bungꞌ atangin karabus rai,
da maran gampaman bungꞌ atsanga nam,
da rib mpada wasaꞌ i barabin mpada nugu nufan,
19 da nida Nifutsarif gubuꞌ gan suda maraampi da gan garaman da aruani.”
20 Da Yisu yipingꞌ nan kakaran da itip irim ifan da garam mpada tayangꞌ gin da impa iruꞌ. Da garam santan mpada ungar wasaꞌ igi intrung maran i Arangan.
21 Da Arangan ini da ribarangan ibiani, “Aruani da nan agam ringantagin ani isu nidzun.”
22 Da garam santan irunt fafun da itsauꞌ i nan bini bingan Yisu nidan, da ini nan bini angu i Arangan. Da bitsintaꞌ itip ini da ruan, “Ibi anungꞌ da arangan ifis i nan ibinigi? Yosef narunggan angu igi!”
23 Da Yisu ini da ribarangan, “Nan nidzun, agam bungꞌ ani nan bida ani da dzi, ‘Dudaꞌ, watip runggam!’ Da agam bungꞌ ani nabiani, ‘U madanang nam u nanga mingꞌa Kapenaum, da aga ringantagin ugu, damingꞌ gam gampam ani?’
24 “Da bitsintaꞌ, dzi nani nan nidzun da agam, profet mangan garam gampan anungꞌ itsarif imingꞌ gan gampan wain u.
25 Dzi nani da agam nabinigi, i Eliya gubuꞌ gan ugu da gubuꞌ ifus isangꞌ udzuf 3 da ukam 6 da nam mangits tsiraꞌ iwaꞌ intap Israil santan. Da gubuꞌ aru nigi, sagat yaruf ampi bingan impa Israil.
26 Da bitsintaꞌ Anutu anungꞌ itangin Eliya ifan da gan mangan u, itangin arangan ifan da sagat yaruf mangan imingꞌ gamp Tsarefat mingꞌa Saidon.
27 Da profet Elisa gubuꞌ gan mpadan, da diginting itiri i garam ampi bingan. Da Anutu anungꞌ irim garam Israil mangan sib u, da irim Naiman garam Siria sib.”
28 Da garam santan mpada ungar mpruꞌa ruan gin igi ringanta i Yisu nan gan nidan igi da nugun itsakia tsiraꞌ.
29 Da ribarangan yuriꞌ iyab da iyut Arangan iwaꞌ ifa sinungꞌ gamp igi da ifa gangar ringan i yuta Arangan ruꞌa gangar, i gamp Nasaret igi imingꞌ mamai wagungꞌ.
30 Da bitsintaꞌ Arangan idziri rib igi santan wasaꞌ da ifa gan arun.
Yisu Idaru Marapayam Maisan Rai
(Markus 1:21-28)
31 Da Yisu iyung iruꞌ Galili gampan mangan nida Kapenaum. Da ifis i nan da garam da gubuꞌ Sabat.
32 Tuas arangan irunt fafun i nan Yisu fisagin igi, i nan gan isangꞌ garam nifutsarif nan gan fisagin.
33 Da garam mangan marapayam maisan yantsangan impai ungar mpruꞌa ruan gin igi impruꞌ, inuꞌ nifun tsiraꞌ ibiani,
34 “Ai, Yisu garam Nasaret! U ni mantuda i agai? U maba i wayada agai? Dzi itsangan wa, i Anutu Garaman Mararam agu.”
35 Da Yisu ini nan babampafan, “Wasimprim nifum da wawaꞌ sinungꞌ arangan!” Da marapayam maisan iyut garam arangan iruꞌ rib igi maranggan, da iwaꞌ sinungꞌ arangan da anungꞌ irim tsakia mangan da garam igi u.
36 Da garam santan irunt fafun gin da ini da ruan, “Nan gan fisagin ani ibianungꞌ? Garam ani ini nan nampang isangꞌ garam nifutsarif da marapayam maisan iringantin da irunt sinungꞌ!”
37 Da nam Yisu nangan igi sisingꞌ gan ipuꞌ idzarangꞌ isangꞌ gamp santan mingꞌan nigi.
Yisu Itip Garam Rinin Ampi Bingan Idaum
(Matiu 8:14-17; Markus 1:29-34)
38 Da Yisu itangin ungar mpruꞌa ruan gin rai da ifa Saimon Petrus ungaran. Da gubuꞌ igi Saimon bunggan finam igingꞌ rinin ruta rinin sasusan tsiraꞌ bingan, da ribarangan igut i Yisu i rima sib.
39 Da Yisu imunti sagat igi rabiꞌ gan ringan da impiꞌ rinin sasusan da itangin arangan rai. Da sung angu sagat igi yuriꞌ iyab da irim nam gadan da ribarangan.
40 Da gubuꞌ ruꞌan da garam ampi bingan iyu garam rinin gingꞌan mara maran iba da Yisu i tipan. Da irim bangin ragun i bitsintaꞌ bitsintaꞌ da rinin idaum.
41 Da marapayam maisan iwaꞌ sinungꞌ garam ampi bingan da inuꞌ tsiraꞌ ibiani, “Agu Anutu Narunggan!” Da bitsintaꞌ Yisu ipaꞌ ribarangan i anungꞌ nida nan u, i ribarangan isruꞌ i Arangan Kristus, Garam Anutu Ragadan.
Yisu Ifis i Nan Imingꞌ Gamp Fain
(Markus 1:35-39)
42 Da gubuꞌ pisan da Yisu runtaꞌ iyung ifa mumai mangan garam maꞌa gin. Da garam ampi bingan isau Arangan isangꞌ bawaꞌan da Arangan i nigi, da imunti sib i Arangan i anungꞌ tanginda ribarangan rai u.
43 Da bitsintaꞌ Yisu ini, “Imaꞌ, dzi bungꞌ afa gamp fain naga nampruꞌ i fisa i sisingꞌ bini Anutu nanggan mpada tayangꞌ gan garaman, i wain aru nigi da Anutu itangin dzi iba.”
44 Ibinigi da Yisu iyung ifis i sisingꞌ bini wasi imingꞌ garam Yuda ungaran mpruꞌa ruan gin santan.