11
Yu nail jeq-e iqsanl oeqbal noeq pov nail bhai Miqyail oil movq nail ngaol
1 Yuldav nail tsaol-aq maq ngel nail yu nail jeq-e jaq-a juq iqsanl, Miqyail nail daoq bhai hav bhoel nail ganl, gaqkhoel juq khi mail Yuldav milkhaoq bhai jaol nail aqivq jaqbheq Khali yaq juq ya gaiq-a nail ngaol.
2 Alheel ngel-i mail, Bheiqtuvluv Yeiqlulsaqlaiq meenq bha dav lal-u phao, bavkov uqjaq oev nail aol thaoq nail juq, aivq bhai oeqbal niailhai thaq-a nail ngaol:
3 “Naol neq, bavkov uqjaq maq oev nail juq nail ilkhaol bhai aol lai khi, aqyu juq nee mail jaq tavq daol tavq nail niil” dai, ge bhiq-a nail ngaol.
4 Aq-u phao, Bheiqtuvluv daoqthaoq-a nee uqhuq-a dov dai, teevq phaq khi-aq teevq phaq aqyu juq bhai ge bhiq-a nail ngaol.
5 Aivq ge nail: “Ngal Yulbheiq meenq bhai geeqlaoq hal thailthaiq-u phao, bheeyaq keiv ma khe-ai dul nail teevq keiv bhai, lavq tsoel liq tsoel bhai pheethaiq-ai thaq khi, nqtavq nee mail ngal jaol nail bha phaiq kha-ai leevq-a nail bhai, nvmav mav moel-a nail khe-ai, aqhaqlal lavqkhoel nee mail ngal ya moel-a nail ngaol.
6 Al bhai ngal aqmeeq-ai heldaiq-u phao, liq khil covq nail jaiqyaq, tsu nail jaiqyaq maqkhaiq, haqtsoiq bhai jaol nail jaiqyaq maqkhaiq, soiq soiq-ail tsao nail jaiqyaq khi mail, nqtavq khe bhail nail keivq-avq juq bhai, ngal ya moel-a nail ngaol.
7 Aq-u phao, ‘Bheiqtuvluv-ol, thul khi deeq heivq jaq yaoq’ dai, ge nail aqthel bhai ngal ya gaiq-a nail ngaol.
8 Thailhai ngaol-aoq, ngal niailhai ge kovq bhiq-a nail ngaol: ‘Heeqphaq-ol, khul pevq lal khi ngaol-aoq, maq jaq. Aoldaoq kovqdaoq bhai tavq lai khi maq haol nail phaq, ngaq nail moeqthaoq lavqkhoel bhai teevq pov iqsanl maq oil bhoel daiq haq-al’ dai, ge bhiq-a nail ngaol.
9 Nqtavq nee mail aqthel al teevq pov gaoq gaiq lee khi ge nail: ‘Miqyail-i mail bhi haol lal-a nail phaq bhai maq haol-ail dai, thaq ge’ dai, ngaq bhai ge lavq-a nail ngaol.
10 Alhai hail pov pevq lal gaq khi, al juq iqsanl mail nqtavq bha he dal laivq-a nail ngaol.
11 Aq-u phao, teevq pov taivq-ail, ngaq bhai bhi khul lee nail dai khi Gailsaqlil meenq nee mail khoel-ai leevq-a nail tsaol-aq al hail gaq ngaq-i mail jaol nail ilkhaol bhai lee kev-a nail ngaol.
12 ‘Al phaq niil phaq dai maq saol-nvq mail, aqyu juq nee mail lai yaoq’ dai, Aqhaqlal Miqyail ngaq bhai ge lavq-a nail ngaol. Yulbheiq meenq bhai jaol nail, aqivq jaqbheq Khali yaq niil kovq gaq iqsanl, ngaq-ai nee mail tsaothel lavq khi, Gaoqneiqlil nail ilkhaol bhai aol lai-a nail ngaol.
13 Tsaol-aq al gaq, nqtavq gaqkhoel teevq gaq aivq nail ilkhaol bhai thulphaol lee-a nail bhai ya moel-a nail ganl, nvjuq bhai ge lavq-a nail ngaol. Nqtavq gaqkhoel aivq bhai ge bhiq-a nail: ‘Yulbheiq meenq bhai khoel gai-aivq khi, Bheiqtuvluv dai khul nail Silmoq al gaq bhai bhi khul ail yaoq.
14 Naol khi naoq nail miqsaol yaq iqsanl mail khalhai khi hevqkovq nail phaq ya dai, aivq naoq bhai ge lavq naol’ dai, nqtavq gaqkhoel-i mail aivq bhai ge bhiq thaq nail ganl iqsanl, nvjuq bhai ge lavq-a nail ngaol.
15 Ngal iqmoeq ilmoeq cavq bhiq cov bhiq thailthaiq-u phao, ngadao juq nail kovtavq bhai Meeqnail Haolnail Aqhaqlal iqmoeq ilmoeq yavq kha lee-a nail khe-ai, aqyu juq nail kovtavq bhai iqsanl yavq kha lee-a nail ngaol.
16 Aq-u phao, Yeiqsul-i mail ge lavq-a nail daoq niil daoq bhai ngal noeq dov lal-a nail ngaol: ‘Yaolhaq yu bhai ulcuvq lavqkhoel-ai ulcuvq saol bhiq-a nail ngaol. Nuljuq Meeqnail Haolnail Aqhaqlal lavqkhoel nee ulcuvq ya saol naol’ dai, aivq ngadao juq bhai ge-ail ceevq-a nail ngaol.
17 Ngadao Heeqphaq Yeiqsul Khali bhai neema thaqtsaol lal-u phao, Miqyail ngadao bhai kovpavq bivq lavq-a nail khe-ai, aqyu juq bhai iqsanl bivq-a nail ngaol. Alheel ngel-i mail, ngal Miqyail bhai khalhai khi lav tsoiq kivq nail-aiq” dai, Bheiqtuvluv aqyu juq bhai ge bhiq-a nail ngaol.
18 Aqyu juq ganl al ya gaiq-u phao, maq jil dai jaol-a nail ngaol. “Thailhai phal-iq neq, yu nail jeq-e jaq-a iqsanl aqdoevq ya doevq dai, Miqyail aqyu juq bhai oeqbal noeq pov nail gailkhaol lav daol bhiq thaq nail nial” dai, aqyu juq ge ge-ail, Miqyail bhai tsiqeeq nail ngaol.
Aqdil-aoq meenq bhai jaol nail Khali yaq munl nail ganl
19 Saqteiqphaq bhai heivq-u khe pov khoeq nail jiovq nail bhai ya daq khi, gaoq ail gail ail-a nail Khali yaq teevq pav ganav juq Philnil milkhaoq, Gulbhaqlul eeljaol laol-n khi mail Aqdil-aoq meenq bhai kev dai ail khi, Yuldav nail tsaol-aq bhai taivq-ail lavqkhiq tsail nail geeqlaoq daoq cavq bhiq ail-a nail ngaol.
20 Thailhai ngaol-aoq, aqyu juq teevq pav ganav juq neq, Aqdil-aoq meenq bhai ail kev-u phao, Heiqlaqsal tsaol-aq bhai iqsanl Heeqphaq Yeiqsul nail ganl cavq bhiq-a nail ngaol. Alhai cavq bhiq-a nail juq neq, Gulbhaqlul eeljaol laol-n bhai jaol nail juq khi mail Khulleiqniq milkhaoq bhai jaol nail juq ngaol.
21 Aqyu juq nail lavqkhoel Miqyail nail bhaqaoq aol nail ngel-i mail, tsaol-aq maodai Yeiqsul bhai neema thaqtsaol lal khi, aivq jaol nail phao lal-a nail ngaol.
22 Ganl al Yeiqlulsaqlaiq meenq bha jaol nail Khali yaq munl juq ya gaiq-a nail ngaol. Alheel ngel-i mail, aqyu juq Bhaqnaqbhal bhai Aqdil-aoq meenq bhai bhi ail-a nail ngaol.
23 Bhaqnaqbhal a bhai ail kev-u phao, Miqyail nail geeqlaoq eeljaol bhaqda nee alhai pevq lal-a nail bhai ya moel-a nail ngel-i mail, lavqkhiq tsail deedee nail ngaol. “Nuljuq neema ivqdao dai, Yeiqsul bhai nieivq thaiq-ai thaq yaoq” dai, aivq aqyu juq iqsanl bhai gaq bivq-a nail ngaol.
24 Bhaqnaqbhal neq, meeq nail jaq nail tsaol-aq teevq gaq ngaol. Aivq neq, Meeqnail Haolnail Aqhaqlal teevq bhee jaol khi, neema thaqtsaol nail phaq teevq bhee aol nail tsaol-aq iqsanl ngel nail ngaol. Aq-u phao, tsaol-aq maodai, Yeiqsul jaol nail phao aol lal-a nail ngaol.
25 A bhai nee ngal-aq, Bhaqnaqbhal Saolluv bhai halpov ail nail dai khi, Daqsul meenq bhai ail-a nail ngaol.
26 Saolluv bhai halpov moel-u phao, Aqdil-aoq meenq bhai hel lavq-a nail ngaol. Aqyu nvq gaq teevq kovq kovq lao a bhai jaol khi, Khali yaq munl nee mail jil lai jil lai-ail, tsaol-aq maodai bhai cavq bhiq cov bhiq-a nail ngaol. Yaqlaol juq bhai Khali yaq dai khul-a nail aqmil neq, Aqdil-aoq meenq bhai iqmoeq ilmoeq khul dov-a nail ngaol.
27 Aqn aqyanq al lavqkhoel, Miqyail nail haqbhoil gedan nail teevq pav ganav juq Yeiqlulsaqlaiq meenq nee mail, Aqdil-aoq meenq bhai lee-a nail ngaol.
28 Aqyu juq nail lavqkhoel Aqgaqbhul dai mil-ai thaq nail gaq thul khi, “Milkhaoq khaoq lao-ail moevq dee sivq deedee lal naol” dai, Aqhaqlal Miqyail bhai juq juq-ail, aivq aqyu juq bhai ge bhiq-a nail ngaol. (Moevq nail sivq nail al neq, heeqphaq Gaqlaldil nail yeel bhai kev lee-a nail ngaol.)
29 Aq-u phao, yaqlaol juq yaoq gaq yaoq-ao nee, khal khi kivq nail khe-ai, Yuldav milkhaoq bhai jaol nail aqivq jaqbheq Khali yaq juq bhai tsaojao-ai bhiq naol dai, noeqceiv-ai thaq nail ngaol.
30 Aqyu juq noeqceiv-ai thaq nail khe-ai phul danq khi, “Khali yaq munl lavqkhoel khe aqivq jiovq nail juq bhai bivq ail dei-eiq” dai, ge khi, Bhaqnaqbhal khi mail Saolluv bhai oil bhoel gai-aivq bhiq-a nail ngaol.