2
Meeqnail Haolnail Aqhaqlal yavq kha lee-a nail ganl
1 Bheiqdeiqgoldeiq nail bhaoqaiq lav sav nail aqn kev lal-u phao, aqyu juq teevq gaq khe-ai jil lai khi jaol-a nail ngaol.
2 Aq-u phao, lilmoel lil ma bhoe nail khe-ai teevq pov taivq-ail, nqtavq nee mail aqthel meel dov-ai leevq-a nail ngaol. Aqyu juq-i mail jaoldeel-nvq thaq nail ilkhaol il lao lao-ail aqthel al meel bhee ail-a nail ngaol.
3 Aq-u phao, aqyu juq moeqlal khe-ai dul nail miqjaq miqlail bhai ya moel-a nail ngaol. Miqjaq miqlail al juq neq, bhoil-ai thaq khi, yaoq gaq yaoq-ao nee nail kovtavq bhai naq lai khi, jiav nail ngaol.
4 Aqyu juq iqsanl mail, Meeqnail Haolnail Aqhaqlal bhee lal khi, Aqhaqlal Miqyail-i mail bhi ge bhi thail-a nail khe-ai, mee nia phaq nail daoq ge-a nail ngaol.
5 Aq-u phao, Miqyail bhai ev nail Yuldav nail tsaol-aq juq Yeiqlulsaqlaiq meenq bha jaol nail ngaol. Aqyu juq neq, miltsaq kovtavq bhai jiav nail, milkhaoq yaoq khaoq yaoq-ao nee mail lal-a nail ngaol.
6 Aqthel al ya gaiq-u phao, tsaol-aq munl munl ma jil lal khi, ge-a nail daoq al daoq bhai yovqgavq nail daoq nee mail yovqgavq ya gaiq-a nail ngel-i mail, noeq-u maq dov dai, pevq ail-a nail ngaol.
7 Aqyu juq noeq-u maq dov dai, pevq-ail khi ge nail: “Daoq ge thailthaiq nail tsaol-aq niil juq iqsanl mail, Gaqliqlail tsaol-aq maq ngel-ail laiq.
8 Thailhai phal-iq neq, ngadao juq yaoq gaq yaoq-ao nee, yovqgavq nail jeq-e nail daoq nee mail khalhai gaiq lee-a nail-aiq.
9 Ngadao juq neq, Bhaqthil milkhaoq, Miqdil milkhaoq, Illaq milkhaoq, Miqsolbholtaqmil milkhaoq bhai jaol nail tsaol-aq, Yuldav khi mail Gaqbhaqdaolciv milkhaoq bhai jaol nail tsaol-aq, Bhoqthul khi mail Aqsil-aq milkhaoq bhai jaol nail tsaol-aq.
10-11 Phuqgil khi mail Paqbhullil milkhaoq bhai jaol nail tsaol-aq, Iljiltuv milkhaoq khi mail Khulleiqniq milkhaoq aqjail bhai jiav nail Liqbhul milkhaoq bhai jaol nail tsaol-aq, Lolmav meenq nee mail lal-a nail daq-i juq, Yuldav nail tsaol-aq maqkhaiq, Yuldav nail tsaol-aq nail aol thaoq nail yu nail jeq-e juq maqkhaiq, Gaqlaqdeiq tsaol-aq khi mail Aqlal tsaol-aq, Miqyail-i mail nl-a nail eeq deedee nail ganl juq iqsanl mail, ngadao yovqgavq nail daoq nee mail, yovqgavq ya gaiq-a nail ngaol” dai, ge nail ngaol.
12 Aqyu juq iqsanl mail noeq-u maq dov dai, pevq lai khi, “Khalheel meeq nial niil neq” dai, teevq gaq nee teevq gaq naldaiq nail ngaol.
13 Thailhai ngaol-aoq, teevq pav ganav juq neq, khal ge movq-ail ge ge-ail khi, “Aqyu juq neq, jilpheeq daol bov thaq nail niil” dai, ge nail ngaol.
Bheiqdeiqgoldeiq nail bhaoqaiq bhai Bheiqtuvluv daoq cavq daoq cov cov-a nail ganl
14 Aq-u phao, Bheiqtuvluv gaqkhoel tsel teevq gaq nee mail thulphaol khi, tsaol-aq al juq bhai aqthel aqkav kav dai, ge bhiq-a nail: “Yuldav nail tsaol-aq khi mail, Yeiqlulsaqlaiq meenq bha khal jaol nail tsaol-aq juq-ol, ngal ganl niil juq ge lavq bhel. Aqmeeq-ai naldaiq dei-eiq.
15 Tsaol-aq niil juq neq, nuljuq noeq nail khe-ai, jilpheeq daol bov-a nail maq ngel-ail. Khul khi mail dai ngal-aq neq, niil aq-il neq, nqhao laoma naqli goiq lavq bhee lal-al teevq-eel ngaol.
16 Ganl niil neq, Miqyail nail haqbhoil gedan nail Yaol-illav-i mail ge-ai thaq nail kheel ngaol.
17 Yaol-illav ge nail:
‘Miqyail-i mail
ge-ai thaq nail daoq neq,
daoq loi loi lai nail
aqn aqyanq lavqkhoel,
jeq-e jaq-a iqsanl nail
kovtavq bhai,
ngal ngaq nail Aqhaqlal
hoeldav bhiq naol.
Nuljuq nail
yaqmiq yaqyov juq,
Miqyail nail haqbhoil
gedan naol.
Nuljuq nail
malyov yovkhaoq juq
aqhaqlal lavqkhoel
nee ya moel naol.
Nuljuq nail
joiqmaoq juq iqsanl,
nvmav mav moel naol.
18 Aqn aqyanq al
kev lee-u phao,
ngaq nail yaqkav
juq nail kovtavq bhai,
yaqmiq yaqyov
maq tselpav dai,
ngaq nail Aqhaqlal
hoeldav bhiq khi,
ngaq nail haqbhoil
bhi gedan naol.
19 Nqtavq bhai
noeq-u maq dov nail phaq
ngal bhi moel naol.
Ngal miltsaq
kovtavq bhai,
aqsivq, miqjaq
tovq nail khi mail
miqjaq miqkhoiq
bhai bhi heeq
bhi moel nail niil juq
bhi moel naol.
20 Seiqleiq khaoqsail
eeq deedee nail
Heeqphaq Miqyail nail
aqn n-gaol,
miltsaq kovtavq bhai
maq kev lee-u nee mail,
nlma navtsee dai
pevq ail khi,
bhala iqsanl
aqsivq khe-ai,
nel lal naol.
21 Aq-u phao,
Heeqphaq Yeiqsul bhai
khal hal nail yaoq
gaq yaoq-ao nee bhai,
Miqyail hevqkovq
bhiq naol’ dai,
Yaol-illav ge-ai thaq nail ngaol.
22 Ilsaqleiqlal nail tsaol-aq juq-ol, ngaq nail daoq aqmeeq-ai naldaiq yaoq. Naqsaqlail meenq yaq Yeiqsul neq, nuljuq heeq nia nail khe-ai, Miqyail aivq bhai juq khi, nuljuq nail sivtavq bhai bhaqaoq eeq nail ganl juq, noeq-u maq dov nail phaq khi mail bhi heeq bhiq moel nail phaq nl-a nail ngaol. Ganl al juq bhai heldaiq-u phao, Miqyail aivq bhai salkhil khanq nail bhai, bhaqlaoq kheq dai dov lal-a nail ngaol.
23 Iqmoeq-u nee Miqyail heeq nia khi noeqceiv-ai thaq nail khe-ai, Yeiqsul yu nail aqlavq lavqkhoel bhai av bhiq nail bhai ya daq-a nail ngaol. Nuljuq oeqbal nl nail yu nail jeq-e bhai juq khi, aivq bhai lavqyavq kovtavq bhai tavq heivq-a nail ngaol.
24 Thailhai ngaol-aoq, Miqyail aivq bhai gaoq bhi doevq kovq lal-a nail ngaol. Haq nail aoq nail sil nail lavqkhoel nee Miqyail aivq bhai pheel bhiq-a nail ngaol. Khul khi mail dai ngal-aq neq, sil nail phaq aivq bhai maq nieivq thaiq nia-ail.
25 Aivq nail ganl Daqbhil niailhai ge-ai thaq nail ngaol:
‘Heeqphaq Miqyail
ngaq nail sivtavq bhai
khaq mao iqsanl
jaol nail bhai,
ngal ya moel-a nail ngaol.
Ngal khaq mao
iqsanl ivq dai,
aivq ngaq nail lavqmal
phao jaol nail ngaol.
26 Alheel ngel-i mail,
ngaq nail neema
neesal ya khi,
ngal lavqkhiq
tsail nail lavqkhoel,
daoq ge nail ngaol.
Al ovqtavq,
ngaq nail aqmaol
noeqthunq nail
lavqkhoel aqdoevq
ya doevq nail ngaol.
27 Khul khi mail dai
ngal-aq neq,
naol ngaq nail
Aqhaqlal bhai
sil nail milkhaoq bhai
maq khaonq-ail
ceevq lavq-al.
Naoq nail
Tsaolmeeq Tsaolhaol
gaq nail aqmaol
maq ya buvq
maq ya tsiq-ail dai,
naol nl naol.
28 Aqdoevq bhi
doevq nail gailkhaol
naol ngaq bhai cavq
naq lavq-a nail ngaol.
Naol ngaq-ai nee mail
jaol nail ngel-i mail,
ngal lavqkhiq
tsail nail phaq
bhee nail ngaol’ dai,
Daqbhil ge-ai thaq nail ngaol.
29 Aqivq jaqbheq juq-ol, eeq dee heel deedee nail, ngadao nail aqbhu heeqphaq Daqbhil nail ganl, ngal nuljuq bhai daolcoev dai, ge lavq bhel. Aivq sil khi, aivq bhai bavq pheeq-a nail luqdaol yanqgaol kev dai, ngadao juq jaol nail bha jiav nail ngaol.
30 Aivq neq, Miqyail nail haqbhoil gedan nail teevq gaq pevq khi, Miqyail-i mail aivq bhai saljial khanq-ai thaq nail phaq bhai, aivq heeq nia nail ngaol. ‘Daqbhil nail jeq-e jaq-a lavqkhoel, Daqbhil khe-ai dul nail heeqphaq teevq gaq bhi dov lal naol’ dai, Miqyail daoqma saljial khanq-ai thaq nail ngaol.
31 Alheel ngel-i mail, Khali gaoq doevq kovq lal nail ganl, iqmoeq-u nee mail Daqbhil noeqheeq noeqmoel khi, ge-ai thaq nail ngaol. Ge-ai thaq nail al neq, sil nail milkhaoq nail lavqkhoel, Khali bhai maq khaonq nail nee ovqtavq, aivq nail aqmaol maq ya buvq maq ya tsiq-ail dai, ge-ai thaq nail ngaol.
32 Miqyail neq, Yeiqsul al gaq bhai gaoq bhi doevq kovq lal-a nail ngaol. Nvjuq iqsanl mail ganl al salkhil khanq nail ngaol.
33 Alheel ngel-i mail, Miqyail nail lavqmal phao aivq bhai thaqeeq thaqheel khi, Meeqnail Haolnail Aqhaqlal bivq naol dai, Aqbhu Miqyail-i mail daoqma saljial jaq-ai thaq nail khe-ai, aivq bhai bivq-a nail ngaol. Niil aq-il nuljuq ya gaiq ya moel thailthaiq nail khe-ai, Yeiqsul Aqhaqlal Miqyail hoeldav lavq-a nail ngaol.
34-35 Daqbhil neq, nqtavq kovtavq bha dav lai-a nail maq ngel-ail. Thailhai ngaol-aoq, aivq ge nail:
‘Heeqphaq Miqyail
ngaq nail Heeqphaq
bhai ge bhiq-a nail:
Naoq bhai neejiav
jiav nail tsaol-aq bhai,
naoq nail aqkhil
kov-uvq bhai
ngal bhi jaol-u n-gaol kev dai,
ngaq nail lavqmal phao
jaoldeel yaoq’ dai,
Daqbhil ge-ai thaq nail ngaol.
36 Alheel ngel-i mail, Ilsaqleiqlal nail jeq-e jaq-a iqsanl mail niilniai aqmeeq-ai heeq kivq thaq-ai yaoq. Nuljuq-i mail lavqyavq kovtavq bhai tavq heivq-a nail Yeiqsul al gaq bhai, Miqyail-i mail Heeqphaq khi mail Khali bhi pevq lal-a nail ngaol” dai, Bheiqtuvluv ge bhiq-a nail ngaol.
37 Tsaol-aq al juq daoq al daoq ya gaiq-u phao, aqyu juq nail neema lavqkhoel bhai suqsaq lal bhiq khi, “Aqivq jaqbheq juq-ol, nvjuq khalhai ya khi nail-aiq” dai, Bheiqtuvluv khi mail gaqkhoel yaoq juq yaoq bhai naldaiq-a nail ngaol.
38 Bheiqtuvluv aqyu juq bhai ge bhiq-a nail: “Miqyail nuljuq nail oeqbal phaiq nia dai, nuljuq yaoq gaq yaoq nee, oeqbal noeq pov khi, Yeiqsul Khali nail aqmil kov-uvq nee ulcuvq saol yaoq. Alhai nl haq neq, nuljuq Miqyail-i mail bivq-ai leevq-a nail kovpavq, Meeqnail Haolnail Aqhaqlal ya naol.
39 Khul khi mail dai ngal-aq neq, ‘Nuljuq bhai Meeqnail Haolnail Aqhaqlal bivq naol’ dai, Miqyail-i mail ge-ai thaq nail daoqma saljial daoq nuljuq nail haqbhoil iqsanl, nuljuq nail yaq nail haqbhoil iqsanl, eqyal bha jaol nail tsaol-aq juq nail haqbhoil iqsanl, ngadao nail Heeqphaq Miqyail-i mail khal khul nail tsaol-aq juq nail haqbhoil iqsanl, ge-ai thaq nail ngaol” dai, Bheiqtuvluv ge bhiq-a nail ngaol.
40 Bheiqtuvluv neq, aqyu juq bhai mee nia phaq ge ge-ail cavq bhiq cov bhiq khi, gaq gaoq bivq-a nail ngaol. “Yeel niil yeel bhai doevq nail haqeiv nail tsaol-aq niil juq nail kovtavq bhai kev lee nail khi lainq-ai thaq nail phaq nail lavqkhoel bhai, nuljuq ya jel-ail dai, hevqkovq nail phaq bhai hav bhoel yaoq” dai, gaq bivq-a nail ngaol.
41 Aivq daoq cavq daoq cov cov nail bhai tsaol-aq maodai gaq neema thaqtsaol lal khi, ulcuvq saol-a nail ngaol. Aq-u n-gaol, tsaol-aq hail hinl gaq bhee dai, aqyu juq nail munl bhai aol lal-a nail ngaol.
Khali yaq juq khalhai nl-a nail ganl
42 Tsaol-aq al juq neq, gaqkhoel juq-i mail cavq bhiq cov bhiq nail daoq naldaiq nail nee ovqtavq, teevq gaq nee teevq gaq aqtsaoq tsaoq nail ngaol. Aqyu juq jaq tavq daol tavq nail nee ovqtavq, geeqlaoq hal nail ngaol. Aqyu juq khaq mao iqsanl al juq nl nail ngaol.
43 Aq-u phao, tsaol-aq iqsanl mail noeq-u maq dov dai, pevq-ail khi geesil nail ngaol. Khul khi mail dai ngal-aq neq, gaqkhoel juq neq, noeq-u maq dov nail phaq khi mail bhi heeq bhi moel nail juq mee nia phaq nl dol lavq-a nail ngaol.
44 Yeiqsul bhai neema thaqtsaol nail tsaol-aq iqsanl mail teevq munl taivq-ail munl khi, nlmaoq iqsanl mail teevq gaq khe-ai yuq-a nail ngaol.
45 Aqyu juq yovqgavq nail nlmaoq juq gaoq khi, loq nail tsaol-aq juq bhai bhoil bhiq-a nail ngaol.
46 Aqyu juq yaoq n yaoq n nee mail uqhuq thaoq nail ilkhaol il ma bhai teevq gaq khe-ai jil lai nail nee ovqtavq, aqyu juq nail neema neenuq neebeiv aol khi ilkhaol bhai lavqkhiq tsail deedee nail lavqkhoel, jaq tavq daol tavq nail ngaol.
47 Aqyu juq Miqyail bhai tsiqeeq nail ngaol. Tsaol-aq iqsanl mail aqyu juq bhai neekhaol sil nail ngaol. Hevqkovq nail phaq ya-a nail tsaol-aq juq, teevq n nee teevq n aqyu juq nail munl lavqkhoel bhai bhi mao lal dai, Miqyail nl-a nail ngaol.