12
Maqlil-i mail Yeiqsul nail aqkhil bhai huqbhiq nil nail ulcuvq leivq bhiq-a nail ganl
1 Bhaqsaqkhaq maq kev lal nail kovq n jiav-u phao, aivq-i mail bhi doevq kovq lal-a nail Laqyaqlul al gaq jaol nail Bheiqtaqnil julgu bhai Yeiqsul lai-a nail ngaol.
2 A bhai, aivq bhai aoqbhaol laol bhiq-a nail ngaol. Maqtha gaq neq, aoq laoq jal laoq laoq nail gaq jiovq khi, Laqsaqlul gaq neq, kovqkhail bhai Yeiqsul nee mail aoq jaoq jaoq nail ngaol.
3 Aq-u phao Maqlil neq, aqphoiq mao-ail phoiq nail naqdul dai khul nail, huqbhiq nil nail aqtseel hail khanl tsiq khi, Yeiqsul nail aqkhil bhai leivq bhiq khi, aivq nail uqhuq tsailkheel-i mail siv bhiq-a nail ngaol. Huqbhiq nil nail aqtseel al ilkhaol teevq il il lao-ail, huqbhiq nil deedee nail ngaol.
4 Yeiqsul nail yaqlaol juq nail lavqkhoel khe, haoqnao Yeiqsul bhai gaoq jaq-a nail Yuldav Ilsaqgaqliqoq al gaq, niailhai ge nail ngaol:
5 “Huqbhiq nil nail aqtseel thoil cavq hail yal bavq nee gaoq khi, haq nail aoq nail juq bhai, khul khi mail, maq bhoil bhiq ail nail-aiq” dai, ge bhiq-a nail ngaol.
6 Haq nail aoq nail juq nail haqbhoil saol-nvq khi, aivq alhai ge nail maq ngel-ail. Aivq neq, khoiqbhaoq teevq gaq ngel-i mail alheel nail daoq ge nail ngaol. Aivq neq, phul baivluvq thaoq nail gaq pevq khi, al nail lavqkhoel khe phul khoiq daiq-a nail ngaol.
7 Yeiqsul ge nail: “Aivq bhai teevq phaq iqsanl thaq lav tsoiq lai. Ngaq bhai duqpheeq nail haqbhoil aivq huqbhiq nil nail ulcuvq niil cavq lainq-ai thaq nail ngaol.
8 Haq nail aoq nail juq neq, nuljuq nee khaq mao iqsanl jaol naol. Thailhai ngaol-aoq, ngal neq, nuljuq nee khaq mao iqsanl jaol nail, maq ngel-ail” dai, ge bhiq-a nail ngaol.
Laqsaqlul bhai heivq nail dai, lainq-ai thaq nail ganl
9 Yeiqsul Bheiqtaqnil julgu bhai jaol nail ganl, tsaol-aq maodai ya gaiq khi, a bhai lai-a nail ngaol. Yeiqsul bhai moel movq nail ngel-i mail taivq-ail lai-a nail iqsanl, maq ngel-ail. Yeiqsul-i mail bhi doevq kovq lal-a nail Laqsaqlul bhai iqsanl, moel movq nail ngel-i mail, lai-a nail ngaol.
10 Alheel ngel-i mail, Philma juq Laqyaqlul bhai iqsanl, heivq nail dai khi, lainq-ai thaq nail ngaol.
11 Khul khi mail daiq ngal-aq neq, aivq sil khi gaoq doevq kovq lal-a nail bhaqda nee, Yuldav nail tsaol-aq maodai aqyu juq nail munl lavqkhoel nee dov ail khi, Yeiqsul bhai neema thaqtsaol lal thailthaiq nail ngaol.
Yeiqsul moeqphaq laljieiv maol yaq jeeq khi, Yeiqlulsaqlaiq meenq bha aol lai-a nail ganl
12 Yaoq n yaoq, Bhaqsaqkhaq bhaoqaiq jaq nail bha lal-a nail tsaol-aq munl munl ma al juq, Yeiqsul Yeiqlulsaqlaiq meenq bha lal thailthaiq nail ganl, ya gaiq-a nail ngaol.
13 Alheel ngel-i mail, aqyu juq dal-aol lavqmeiv bavq khi, aivq bhai hav lavq ail nail dai khi, niailhai gul gul-ail dov ail-a nail ngaol:
“Hoqsaqnaq!
Heeqphaq Miqyail nail
aqmil kov-uvq nee
lee nail gaq
geeqlaoq eeq dei-eiq.
Ilsaqleiqlal nail
jeq-e nail Heeqphaq
geeqlaoq eeq dei-eiq” dai,
aqyu juq gul nail ngaol.
14 Jalliq lavqkhoel bhai gevq-ai thaq nail jiav nail khe-ai, Yeiqsul moeqphaq laljieiv maol yaq teevq maol halpov moel khi jeeq nail ngaol. Jalliq lavqkhoel bhai niailhai gevq-ai thaq nail ngaol:
15 “Yeel-ovq Yaqmiq-ol,
thaq geesil.
Naoq nail Heeqphaq
moeqphaq laljieiv
maol yaq jeeq khi
lee thailthaiq nail bhai,
heldaiq yaoq” dai,
gevq-ai thaq nail ngaol.
16 Aivq nail yaqlaol juq ganl al, maq heeq nia-ai haq-al. Thailhai ngaol-aoq, Yeiqsul seiqleiq khaoqsail ya gaq-u phao, aivq nail ganl alhai gevq-ai thaq nail bhai maqkhaiq, yu aivq bhai alhai nl bhiq nail bhai maqkhaiq, aqyu juq noeq dov lal bhiq-a nail ngaol.
17 Yeiqsul Laqsaqlul bhai luqdaol lavqkhoel nee khul dol lavq khi, bhi doevq kovq lal-a nail bhai moel-a nail tsaol-aq juq, aqyu juq-i mail ya moel-a nail khe-ai, yu bhai ge daiq bhiq-a nail ngaol.
18 Tsaol-aq munl al munl Yeiqsul-i mail nl-a nail phaq noeq-u maq dov nail ganl al, ya gaiq-ai thaq nail ngel-i mail, aivq bhai hav laq lai-a nail phaq pevq nail ngaol.
19 Aq-u phao, Phaqliqsail juq teevq gaq nee teevq gaq ge pheeljaq nail: “Heldaiq. Ngadao juq-i mail noeq-ai thaq nail phaq maq nl pevq kivq yaoq-aol. Miltsaq yaq iqsanl aivq nail haoqnao tsaothel-aivq-ao nail ngaol” dai, ge pheeljaq nail ngaol.
Heiqlaqsal nail tsaol-aq juq Yeiqsul bhai halpov nail ganl
20 Bhaqsaqkhaq bhaoqaiq lav sav-u phao, Yeiqlulsaqlaiq meenq bha uqhuq thaoq lai-a nail juq nail lavqkhoel bhai, Heiqlaqsal nail tsaol-aq iqsanl kheq nail ngaol.
21 Heiqlaqsal tsaol-aq al juq, Gaqliqlail milkhaoq Bheiqjeildaq meenq bhai jaol nail Pillilpuv jaol nail bha ail khi, “Saqlaq-ol, nvjuq Yeiqsul bhai moel movq-il” dai, ge bhiq ail-a nail ngaol.
22 Pillilpuv Aqdaiqlaiq bhai tsaoq ail khi, aqyu nvq gaq teevq gaq khe-ai Yeiqsul bhai ge bhiq lai-a nail ngaol.
23 Yeiqsul aqyu nvq gaq bhai ge bhiq-a nail: “Tsaol-aq nail Yaqyov neq, seiqleiq khaoqsail ya nail aqyanq kev lal-aoq nail ngaol.
24 Ngal nul-nq nvq gaq bhai maldil dai, ge lavq bhel. Aqiq aqneev teevq neev neq, miltsaq bhai ga ail khi maq sil-u kev dai, aqiq aqneev teevq neev teevq-eel ngaol. Thailhai ngaol-aoq, aqiq aqneev al neev sil-u phao, aqiq aqneev maodai gaoq mao lal nail ngaol.
25 Yovqgavq nail doevq nail phaq bhai gaiq-a nail tsaol-aq neq, doevq nail phaq sunq ail nail ngaol. Miltsaq kovtavq bhai doevq-u phao, yovqgavq nail doevq nail phaq bhai neejiav jiav nail tsaol-aq neq, nqmaq maqluv halyeel doevq nail phaq ya nail ngaol.
26 Ngaq nail haqbhoil ganl nl movq nail tsaol-aq khul gaq maqkhaiq, ngaq nail haoqnao ya tsaothel lavq naol. Khul khi mail dai ngal-aq neq, ngaq nail yaqkav neq, ngal khal jaol nail bha ya jaol nail ngaol. Ngaq nail ganl khal nl nail tsaol-aq bhai, ngaq nail Aqbhu thaqeeq thaqheel bhiq nail ngaol” dai, ge bhiq-a nail ngaol.
Yeiqsul aivq ya sil nail ganl ge nail
27 Yeiqsul gaoq ge nail: “Ngaq nail neema haqaoq nl deedee-ail nial. Khalhai ge heeq dai, maq heeq lal-il. ‘Aqbhu-ol, aqyanq niil yanq ngaq nail kovtavq bhai maq yaq kev lee’ dai, ge haq neq, meeq-ail meeq. Thailhai ngaol-aoq, niil nail haqbhoil ngal lee-a nail phaq pevq nail ngaol.
28 Aqbhu-ol, naoq nail seiqleiq khaoqsail bhiq moel yaoq” dai, ge bhiq-a nail ngaol. Aq-u phao, nqtavq nee daoq ge dov-ai leevq-a nail: “Ngaq nail seiqleiq khaoqsail bhai moel gaq-ao nail ngaol. Thailhai ngaol-aoq, teevq pov gaoq bhi moel-ai haq naol” dai, ge-ai leevq thaq nail ngaol.
29 A bhai thulphaol thailthaiq nail tsaol-aq munl munl ma aqthel al thel bhai ya gaiq-u phao, teevq pav ganav juq neq, “Nqjaiq jaiq nail niil” dai, ge khi, teevq pav ganav juq neq, “Nqtavq gaqkhoel aivq bhai daoq ge tsaoq lee thaq nail niil” dai, ge nail ngaol.
30 Thailhai ngaol-aoq, Yeiqsul aqyu juq bhai ge bhiq-a nail: “Daoq niailhai ge dov-ai lee-a nail neq, ngaq nail haqbhoil maq ngel-ail. Nuljuq nail haqbhoil ngaol.
31 Niil aq-il miltsaq bhai yalkhaq dal nail aqyanq tsaq lal-aoq nail ngaol. Niil aq-il miltsaq niilniai uvthaiq nail gaq bhai, bhi the ha nail ngaol.
32 Miltsaq niil nail kovtavq bhai ngaq bhai kha thul lavq-u phao, tsaol-aq yaoq gaq yaoq-ao nee ngal jaol nail bha lal dai, ngal he naol” dai, ge bhiq-a nail ngaol.
33 Yeiqsul alhai ge nail neq, aivq khalhai ya sil nail ganl, ge movq nail ngaol.
34 Tsaol-aq munl munl ma juq ge nail: “Nvjuq nail aoldaoq kovqdaoq lavqkhoel bhai, ‘Meiqsilya neq, nqmaq maqluv halyeel doevq nail ngaol’ dai, ge-ai thaq nail ngaol. Tsaol-aq nail Yaqyov bhai bhi kha thul nail ngaol dai, naol khalhai ge nail-aiq. Tsaol-aq nail Yaqyov al gaq neq, khaq sil gaq” dai, naldaiq bhiq-a nail ngaol.
35 Yeiqsul ge nail: “Aqbhaq neq, nuljuq jaol nail bha niil aq-il teevq yanq taivq-ail bhaq nail ngaol. Aqbhaq khal bhaq-u kev dai, tsao yaoq. Maq ngel haq neq, aqnav nuljuq bhai the kheel lal nail ngaol. Aqnav nail lavqkhoel bhai tsao nail tsaol-aq neq, yovqgavq bhai yovqgavq khaq bha ail nail dai iqsanl, maq heeq nia-ail.
36 Nuljuq jaol nail bhai aqbhaq bhaq-u phao, nuljuq aqbhaq nail yaq pevq lal dai, aqbhaq bhai neema thaqtsaol yaoq” dai, aqyu juq bhai ge bhiq-a nail ngaol. Aivq alhai ge gaq-u phao, aqyu juq maq jaol nail bha dov ail khi jaol ail-a nail ngaol.
Yuldav nail tsaol-aq jemao Yeiqsul bhai neema maq thaqtsaol-ail
37 Aqyu juq nail sivtavq bhai noeq-u maq dov nail phaq a dai dai-ail nl daiq bhi khi ngaol-aoq, aqyu juq Yeiqsul bhai neema maq thaqtsaol-ail.
38 Aqyu juq neema maq thaqtsaol nail al neq, Miqyail nail haqbhoil gedan nail Ilsaqyal-i mail ge-ai thaq nail daoq al daoq, bhee lal-a nail ngaol. Aivq ge nail:
“Heeqphaq-ol,
nvjuq ge nail daoq bhai
khaq sil gaq
neema thaqtsaol nail-aiq.
Miqyail nail bhaqaoq
khaq sil gaq bhai
phaodaiq bhiq nail-aiq” dai,
ge-ai thaq nail ngaol.
39 Aqyu juq maldil neema maq thaqtsaol nia-ail. Khul khi mail dai ngal-aq neq, Ilsaqyal niailhai gaoq ge-ai thaq nail ngaol:
40 “Tsaol-aq niil juq
neema gaol khi,
naqkov aqthul
bhi thul lal khi,
maivneev maivpeivq
lav peivq bhiq yaoq.
Alhai maq lav
sav bhiq haq neq,
aqyu juq maivneev
moel nia khi,
naqkhaol gaiq nia
lal nail nee ovqtavq,
neema lavqkhoel bhai
gov heeq nia
lal nail ngel-i mail,
ngal jaol nail bhai
kovq lal khi,
ngal aqyu juq bhai
bhi meeq
lai nail ngaol” dai,
ge-ai thaq nail ngaol.
41 Ilsaqyal-i mail alhai ge-ai thaq nail al neq, Yeiqsul nail seiqleiq khaoqsail bhai aivq ya moel khi, aivq nail ganl ge-ai thaq nail phaq pevq nail ngaol.
42 Thailhai ngaol-aoq, Yuldav tsaol-aq nail aqivq aqtsu juq nail lavqkhoel bhai iqsanl, Yeiqsul bhai neema thaqtsaol nail tsaol-aq maodai jaol nail ngaol. Alhai neema thaqtsaol khi ngaol-aoq neq, Yuldav nail tsaol-aq nail uqhuq thaoq nail ilkhaol bhai maq bhi tavq lavq dai, Phaqliqsail juq the ha lal nail bhai geesil nail ngel-i mail, bhaqlaoq kheq dai maq ge dov tseq-ail.
43 Miqyail-i mail tsiqeeq bhiq nail nee maqtsil, tsaol-aq yaq-i mail tsiqeeq bhiq nail phaq bhai, aqyu juq oil movq nail ngaol.
Yeiqsul nail daoq-i mail yalkhaq dal nail ganl
44 Yeiqsul aqthel aqkav kav dai ge nail: “Ngaq bhai neema khal thaqtsaol nail tsaol-aq, ngaq bhai taivq-ail neema thaqtsaol nail maq ngel-ail. Ngaq bhai khoel-ai leevq-a nail gaq bhai iqsanl, neema thaqtsaol nail khe-ai, dul nail ngaol.
45 Ngaq bhai moel-a nail tsaol-aq, ngaq bhai khoel-ai leevq-a nail gaq bhai moel-a nail khe-ai dul nail ngaol.
46 Ngaq bhai neema khal thaqtsaol nail tsaol-aq, aqnav nail lavqkhoel bhai maq ya jaol dai, aqbhaq khe-ai miltsaq niil nail kovtavq bhai, ngal yavq kha lee-a nail ngaol.
47 Ngaq nail daoq gaiq khi ngaol-aoq, maq naldaiq nail tsaol-aq bhai, ngal yalkhaq maq dal. Miltsaq bhai yalkhaq dal lee nail khi ngal lee-a nail maq ngel-ail. Hevqkovq lee nail dai khi, lee-a nail ngaol.
48 Ngaq bhai maq hav bhoel-ail, ngaq nail daoq bhai maq naldaiq nail tsaol-aq bhai yalkhaq dal nail dao jiav nail ngaol. Miltsaq niil daoq loi loi lai-u n-gaol, ngaq-i mail ge jel lavq-a nail daoq niil juq, aivq bhai yalkhaq dal nail ngaol.
49 Ngal ngaq nail neenoeq tsaq dai, teevq phaq iqsanl maq ge-ail. Ngaq bhai khoel-ai leevq-a nail Aqbhu Miqyail, ngal khalhai ya ge ya thail nail dai, aivq ngaq bhai ge lavq-a nail ngaol.
50 Aivq-i mail bivq-ai leevq-a nail daoq lavqkhoel bhai nqmaq maqluv halyeel doevq nail phaq aol naol dai, ngal heeq kivq naol. Alheel ngel-i mail, ngaq-i mail ge nail daoq neq, Aqbhu Miqyail-i mail ngaq bhai bhi ge lavq-a nail daoq ngaol” dai, Yeiqsul aqyu juq bhai ge bhiq-a nail ngaol.