20
Khaq sil gaq-i mail naoq bhai alyaq bivq lavq-a nail-aiq
1 Teevq n neq, Yeiqsul uqhuq thaoq nail ilkhaol il ma nail lavqkhoel bhai, tsaol-aq maodai bhai cavq bhiq cov bhiq khi, lavqkhiq tsail nail geeqlaoq daoq cavq bhiq-u phao, Philma juq khi mail aoldaoq kovqdaoq cavq nail cov nail juq, Yuldav tsaol-aq nail aqivq aqtsu juq lal khi,
2 “Naol khaq bha khe alyaq ya khi niil juq nl nail-aiq. Khaq sil gaq naoq bhai alyaq bivq lavq-a nail-aiq. Nvjuq bhai ge lavq yaoq” dai, Yeiqsul bhai naldaiq-a nail ngaol.
3 Yeiqsul aqyu juq bhai ge kovq bhiq-a nail: “Ngal nuljuq bhai teevq daoq naldaiq la, nuljuq ge kovq lavq dei-eiq.
4 Yaolhaq ulcuvq saol bhiq-a nail al, Miqyail-i mail bhi nl thaq nail laiq. Maq ngel haq neq, tsaol-aq-i mail bhi nl thaq nail laiq” dai, aqyu juq bhai naldaiq-a nail ngaol.
5 Aqyu juq nail gaiqlaq bhai niailhai ge tsaoq pheeljaq-a nail ngaol: “Miqyail-i mail bhi nl thaq nail ngaol dai, ngadao ge haq neq, thailhai phal-iq neq, ‘Nuljuq khul khi mail, Yaolhaq bhai neema maq thaqtsaol nail-aiq’ dai, Yeiqsul ge lal nail ngaol.
6 ‘Tsaol-aq-i mail bhi nl thaq nail ngaol’ dai, ngadao ge haq neq, tsaol-aq niil juq ngadao bhai, lovmav-i mail liv heivq lal naol. Khul khi mail dai ngal-aq neq, Yaolhaq neq, Miqyail nail haqbhoil gedan nail gaq ngaol dai, tsaol-aq al juq neema thaqtsaol nail ngaol” dai, aqyu juq nail gaiqlaq bhai ge pheeljaq nail ngaol.
7 Alheel ngel-i mail: “Khaq sil gaq-i mail aivq bhai bhi nl thaq-al meeq, maq heeq kivq-ail” dai, ge kovq bhiq-a nail ngaol.
8 Yeiqsul ge nail: “Alhai dul dai, khaq sil gaq-i mail ngaq bhai alyaq bivq lavq khi ganl niil nl thailthaiq nail bhai, nuljuq bhai ngal maq ge bhiq-ail” dai, aqyu juq bhai ge bhiq-a nail ngaol.
Aqheeq tsilju nail gaoqkhail khi mail al nail lavqkhoel bhai ganl nl nail juq
9 Yeiqsul tsaol-aq al juq bhai daoqma uqhuq daoq nee mail gaoq cavq gaoq cov bhiq-a nail ngaol: “Aq-u phao, tsaol-aq teevq gaq jaol lao thaq nail ngaol. Teevq n neq, aivq aqheeq tsilju nail aqjiiv kha-a nail ngaol. A bhai nee ngal-aq, aivq gaoqkhail nl nail juq bhai ngaq bhiq-ail ceevq khi mail, yaoq khaoq yaoq mil yaoq bha tsaq dai, jaol ail thaq nail ngaol.
10 Aqheeq tsilju nail aqheeq mi lal khi koevq nail yanq tsaq lal-u phao, gaoqkhail al khail khe aqheeq tsilju nail aqheeq aivq bhai ovq nail juq ya dai, gaoqkhail nl nail juq jaol nail bha aqheel gaq, aivq nail yaqkav teevq gaq bhai bhi lai-a nail ngaol. Thailhai ngaol-aoq, gaoqkhail nl nail juq, yaqkav al gaq bhai deeq khi, aqnieivq-ail bhi kovq ail-a nail ngaol.
11 Yaoq pov yaoq yaqkav yaoq gaq yaoq bhai aqyu juq jaol nail bha gaoq bhi lai-a nail ngaol. Thailhai ngaol-aoq, aqyu juq yaqkav al gaq bhai iqsanl deeq khi, khal nl movq-ail nl bhiq khi, aqnieivq-ail gaoq bhi kovq ail-a nail ngaol.
12 Yaqkav hail gaq teevq gaq bhai iqsanl gaoq bhi lai-a nail ngaol. Aqyu juq aivq bhai, malkhoeq daol lal-u kev dai deeq khi, the ha bhiq-a nail ngaol.
13 Aq-u phao, aqheeq tsilju nail gaoqkhail khe ilheel gaq ge nail: ‘Ngal khalhai khi heeq meeq. Ngal mailma-ail gaiq-a nail ngaq nail yaqyov bhai bhi lai naol. Aqyu juq ngaq nail yaqyov bhai ev-ail jaol-aq’ dai, ge khi aivq nail yaqyov bhai bhi lai-a nail ngaol.
14 Gaoqkhail bhai ganl nl nail juq, yaqyov al gaq bhai ya moel-u phao, ‘Aivq neq, jaiqbhoil ovq nail gaq ngaol. Ngadao juq aivq nail jaiqbhoil ya kivq dai, aivq bhai heivq bhel’ dai, aqyu juq nail gaiqlaq bhai ge pheeljaq-a nail ngaol.
15 A bhai nee ngal-aq, aqyu juq aivq bhai gaoqkhail lavqniil phao he dol-aivq khi, heivq-a nail ngaol. Gaoqkhail nail aqheel gaq aqyu juq bhai khalhai khi bhiq nail dai, nuljuq noeq nail-aiq.
16 Aqheel gaq kovq lal khi, gaoqkhail nl nail al juq bhai heivq khi, gaoqkhail al yaoq gaq yaoq bhai, ngaq bhiq nail ngaol” dai, Yeiqsul ge bhiq-a nail ngaol. Daoq al daoq ya gaiq-a nail juq neq, “Alhai maq pevq lal-ail” dai, ge nail ngaol.
17 Yeiqsul aqyu juq bhai heldaiq cov-ai thaq khi ge bhiq-a nail:
“Ilkhaol cov nail
tsaol-aq-i mail
bavq ha-a nail
lovmav al heeq,
jioivqloiv daoqthaoq bhai
kaovq-a nail
lovmav heeq ma
pevq lal nail ngaol dai,
gevq-ai thaq nail daoq al daoq khul bhai ge movq nail ngel-ail.
18 Lovmav al heeq nail kovtavq bhai ga tsuq ail nail yaoq gaq yaoq-ao nee mail, keivq-ail khoi-ail nail ngaol. Tsaol-aq khul gaq nail kovtavq bhai maqkhaiq, lovmav al heeq ga dav-ail haq neq, tsaol-aq al gaq peivq-ail leiv-ail nail ngaol” dai, ge bhiq-a nail ngaol.
19 Daoqma uqhuq daoq niil daoq, “Ngadao juq bhai ge movq nail niil” dai, aoldaoq kovqdaoq cavq nail cov nail juq khi mail Phaqliqsail juq heeq nia-a nail ngel-i mail, yanq al yanq nail lavqkhoel aqyu juq Yeiqsul bhai nieivq movq nail ngaol. Thailhai ngaol-aoq, aqyu juq tsaol-aq munl munl ma juq bhai geesil nail ngaol.
Yeiqsul bhai khoiq naldaiq ail-a nail ganl
20 Aqyu juq Yuldav milkhaoq bhai joiqjaq nail Phillav nail aqlavq lavqkhoel-ai Yeiqsul bhai av bhiq kivq dai, khoiq naldaiq nail tsaol-aq juq bhai, Yeiqsul jaol nail bha khoel gai-aivq-a nail ngaol. Khoiq naldaiq nail tsaol-aq al juq neq, Yeiqsul daoq ge bheeq nail bhai ya gai dai, tsaq nail daol nail tsaol-aq tavq khi ail-a nail ngaol.
21 Khoiq naldaiq lai-a nail tsaol-aq al juq ge nail: “Saqlaq-ol, naol neq, tsaq nail lavqkhoel nee cavq bhiq cov bhiq khi, maivphaoq eeq nil maq tsel dai, Miqyail nail gailkhaol nee daolcoev dai, cavq bhiq cov bhiq nail ngaol dai, nvjuq heeq kivq naol.
22 Ngadao juq heeqphaq Gailsaq bhai khaon dov bhiq nail tsaq naol laiq. Maq tsaq-ail laiq” dai, Yeiqsul bhai naldaiq bhiq-a nail ngaol.
23 “Aqyu juq ngaq bhai bhi ge bheeq movq nail niil” dai, Yeiqsul heeq nia khi, aqyu juq bhai ge bhiq-a nail:
24 “Ngaq bhai phul teevq bavq bhi heldaiq lavq yaoq. Khaq sil gaq nail maolkhoel, khaq sil gaq nail aqmil aol nail ngel-aiq” dai, Yeiqsul aqyu juq bhai naldaiq-u phao: “Heeqphaq Gailsaq nail niil” dai, aqyu juq ge kovq bhiq-a nail ngaol.
25 “Thailhai phal-iq neq, Gailsaq bhai tavq nail phaq neq, Gailsaq bhai bivq yaoq. Miqyail bhai tavq nail phaq neq, Miqyail bhai bivq yaoq” dai, Yeiqsul aqyu juq bhai ge kovq bhiq-a nail ngaol.
26 Tsaol-aq munl munl ma nail sivtavq bhai, aivq-i mail ge-a nail daoq al juq nail lavqkhoel khe, aqyu juq laiq nail tsa nail phaq maq moel-al. Yeiqsul-i mail ge kovq bhiq-a nail daoq al daoq bhai, aqyu juq noeq-u maq dov-ail aqtsi tsu dai, jaol-a nail ngaol.
Yeiqsul bhai doevq kovq lal nail ganl naldaiq-a nail
27 Sil thaq nail tsaol-aq maq doevq kovq lal nia-ail dai, ge nail Saqduqgail nail tsaol-aq teevq pav ganav juq, Yeiqsul jaol nail bha lal khi naldaiq lal-a nail ngaol.
28 “Saqlaq-ol, Molseiq nvjuq nail haqbhoil niailhai gevq-ai thaq nail ngaol: ‘Tsaol-aq teevq gaq khaqma hevq khi, yaq maq jaol lee-u nee mail sil haq neq, algao gaq nail jeq-e jaq-a maq ya peivq-ail dai, jaqbheq gaq aivq nail aqtsu bhai ya hevq nail ngaol’ dai, gevq-ai thaq nail ngaol.
29 Jel lal-u phao, mailnail sivq gaq jaol-a nail ngaol. Aqivq ivqsaq gaq khaqma hevq khi, yaq maq jaol lee-u nee mail sil-a nail ngaol.
30-31 Nvq gaq teevq gaq iqsanl hail gaq teevq gaq iqsanl, yaqmai-aq al gaq bhai hevq-a nail ngaol. Alhai dul dai, mailnail sivq gaq sivq gaq-ail yaq maq jaol lee-u nee mail sil-a nail ngaol.
32 A bhai nee ngal-aq, yaqmai-aq al gaq iqsanl sil-a nail ngaol.
33 Thailhai phal-iq neq, sil thaq nail tsaol-aq gaoq doevq kovq lal-u n-gaol, yaqmai-aq al gaq, khaq sil gaq nail khaqma pevq nail-aiq. Khul khi mail dai ngal-aq neq, aqyu mailnail sivq gaq sivq gaq-ail yaqmai-aq al gaq bhai hevq-a nail ngaol” dai, ge bhiq-a nail ngaol.
34 Yeiqsul aqyu juq bhai ge kovq bhiq-a nail: “Yeel niil yeel nail lavqkhoel bhai doevq nail tsaol-aq juq neq, hevq pheel maol pheeljaq nail ngaol.
35 Thailhai ngaol-aoq, yaqhao khe yeel bhai maqkhaiq, gaoq doevq kovq lal nail phaq bhai maqkhaiq, geel-nvq nail tsaol-aq juq neq, hevq pheel maol pheeljaq nail phaq maq bhao-ail.
36 Aqyu juq neq, teevq thal-iq maq ya sil-ail. Khul khi mail dai ngal-aq neq, aqyu juq neq, nqtavq gaqkhoel khe-ai pevq lal nail ngaol. Aqyu juq neq, gaoq doevq kovq lal-a nail tsaol-aq ngel-i mail, Miqyail nail yaq pevq nail ngaol.
37 Sil thaq nail tsaol-aq gaoq doevq kovq lal nail ngaol dai, jiavbuv nail ganl gevq-ai thaq nail dao bhai, Molseiq phaodaiq lavq-a nail ngaol. Aivq neq, Miqyail bhai, ‘Aqbhaqlaqhaq nail Miqyail, Ilcav nail Miqyail, Yaqkov nail Miqyail ngaol’ dai, ge-ai thaq nail ngaol.
38 Miqyail neq, sil nail tsaol-aq nail Miqyail maq ngel-ail. Doevq nail tsaol-aq nail Miqyail ngaol. Aivq bhaqda nee tsaol-aq yaq iqsanl mail doevq nail ngaol” dai, ge bhiq-a nail ngaol.
39 Aq-u phao, aoldaoq kovqdaoq cavq nail cov nail tsaol-aq teevq pav ganav juq ge nail: “Saqlaq-ol, naol ge nail tsaq naol” dai, ge bhiq-a nail ngaol.
40 A bhai nee ngal-aq, aqyu juq aivq bhai teevq phaq-ail maq naldaiq tseq dai, pevq ail-a nail ngaol.
Yeiqsul aqyu juq bhai Daqbhil nail Yaqyov nail ganl, naldaiq-a nail
41 Yeiqsul aqyu juq bhai ge bhiq-a nail: “Yu Khali bhai Daqbhil nail Yaqyov ngaol dai, khul nail neq, khalhai khi pevq nia nail-aiq.
42-43 Khul khi mail dai ngal-aq neq, Daqbhil ge nail:
‘Heeqphaq Miqyail
ngaq nail Heeqphaq
bhai ge bhiq-a nail:
Naoq bhai neejiav
jiav nail tsaol-aq bhai,
naoq nail aqkhil
kov-uvq bhai
ngal bhi jaol-u
n-gaol kev dai,
ngaq nail lavqmal phao
jaoldeel yaoq’ dai,
Tsiqeeq nail Haoqgavq lavqkhoel bhai gevq-ai thaq nail ngaol.
44 Daqbhil Khali bhai Heeqphaq dai, khul nail ngaol. Thailhai phal-iq neq, aivq khalhai khi Daqbhil nail yaqyov pevq nia nail-aiq” dai, naldaiq bhiq-a nail ngaol.
Aoldaoq kovqdaoq cavq nail cov nail juq bhai yaolphaol yaoq
45 Tsaol-aq iqsanl mail naldaiq nail bhai, Yeiqsul aivq nail yaqlaol juq bhai niailhai ge bhiq-a nail ngaol:
46 “Aoldaoq kovqdaoq cavq nail cov nail juq bhai yaolphaol yaoq. Khul khi mail dai ngal-aq neq, aqyu juq neq, phailkhaoq heelma doi doi-ail tsao movq nail ngaol. Leiv lavqkhoel bhai tsao-u phao, yu aqyu juq bhai bhi ev movq-ai bhiq nail ngaol. Aqyu juq neq, uqhuq thaoq nail ilkhaol lavqkhoel bhai sivtavq phao jiav nail khaoqsail eeq nail doiqbev bhai jaoldeel movq-ai bhiq nail ngaol. Bhaoqaiq lav sav-u phao, khaoqsail eeq nail jaol duq bhai, jaoldeel movq-ai bhiq nail ngaol.
47 Aqyu juq neq, miqtsiq miqma juq nail ilkhaol khi ildaoq maoqgaiq iqsanl mail khoeq jaq kav jaq khi, yu ya moel dai, geeqlaoq heelma ma dai hal nail ngaol. Aqyu juq neq, yu nee maqtsil yalkhaq dal nail bhai ya daq naol” dai, ge bhiq-a nail ngaol.