3
Monó Doran Kayoi Vaya Ino
1 Monoká ma yafisin dorarí ono van ma anunu iyaona mai yan bain doran mi vákayan mai yorarí ono van iyan ná ma fura vayan tiamé uno.
2 Mai ma monóká dafiseno van iyain bantai avúavá ano funtákantin ná ena nanin banta ano ída kanaíen béin oyampá baya sino. Inká be aná bá ana vá puntáden báken ná beyantasá kama avúavá ma vain ná maman one one ino. Inká puntákein ineine vá bantin kama vanta ino siyantin ná ena kéká ano ma ven amápin erintin ná betín kama iyáken Tiyarafenui afova vaya vá banasi siamino.
3 Béi ída vá óen non nen ná inká ída vá aruve asive inton bempáké báken moni san ída vá anunu ino.
4 Bei kéká kamaen dafisin banta vantin ná inká ben akhafana ano kamaen baya iniren ben aránaó ana vá bano.
5 Mai fara vara seyo, anasi iyampontá ma ída kamaen dafisin nain banta ano inté uren ná Tiyarafenui vanasirá dafisinten nafino.
6 Auyen mumunan keká ída vá ainen monóká dafisin doran amino. Para vara seyo, véin ma amiran nain doran nan au khákan intin maen mairái Ban Anon mano véin mamádantin ainen eraven ankaminten mino.
7 Inká afokhampin ma vain kéká ano ma véin nan kama yoraríi iyan mino ma sintin béi ída kanaíen Ban Anoni vase unampin o áduven ayave van inten mino.
Monó Doran Banta Kéká Ano Ma Varan Nain Avúavá Ino
8 Inká monó namumpin ma yoran banta kéká ano yere máan mana en kama avúavá ana vá barano. Ída vá kampun baya e sian more mere en ná inká ída vá óen non nen ná inká moníká inin kaen iyantin ná béin nan kama vanta ino sino.
9 Betí ankan kama yaná bá namu yaná bá ma yaíden afová in ineine funtáden ná pura mumunan pákaan ákona uren ná bano.
10 Monó namumpin tító doran kayo nare amesin doriyantiya kamaen ná doranten nafi mai ódare vá ínaimpáké monó namumpin ma yafisin doran ameno.
11 Betin aná ona ano máan mana en ná kama nanin kéká ino siyantin ná mai nanin kéká ano ena nanin banta ída vá oyampá baya sino. Beti yantasá kama avúavá ma vain maman one one iyáken minó danákasá ákonaen dafisino.
12 Monó namumpin ma yoran amiran nain banta ano ve aná bá ana funtáden báken ná be akhafana vá bei kéká bá kamaen ná dafisino.
13 Mai ma kamaen doran nain kékái vanasi ano amo siyantin Yisas Karaisintá ma mumunan in avúavá ano moéken kákaní inten mino.
Tetisi Fura Mumunan In Baya Ino
14 Éi vaonafá orono van ukhé umpo ída ma ainé oréku maeya ma yanasinta varano van mi ma vompon uvaman amé uno.
15 Téi ma ída ainé oréku maeya mumuman kékasá ma vompon pinte ódare vá afova ameno. Mai kéká anon ákona namádan kayo an daven mi fara van oriyan ban Tiyarafenui fura vaya fákaan ákona uráken doranten mino.
16 Tiyarafenu ano Yisasini kama vaya afová inon tiren mi aúpá bá ein maman dákó ukhein pasen mana ano ída kanaíen mai vaya van ina inten mino.
Yisas Karaisi ano varará banta an daven afoká ukhan
Kantá Aunan mano véin nan puntákein banta e siren maman dákó uran
enisori kayo ano ódaren banasi siamíkan
barará nanin banta ano véintá mumunan uvin
Tiyarafenu ano véin aviren inarufá óden mino.