11
Kataj i' ilol ketz
1 Yi in wetz, cho'n na incol wib te Wajcaw.
Nxac tzun na a'lchij swetz:
Cawle'n ojk txo'l tx'ac'aben chi na chiban yi e' tal ch'u'l.
2 Na, ilwe' nin yi e' mal nak.
Ja wi't oc chiflech tulak chic'oxbil tan abiyle'n cu'n.
Jalt cuntu' tan tele'n chitzakpul.
Nin kale cyewune't quib, cho'n na chic'ox tzajtz tan chibiyle'n yi e' balaj wunak.
3 ¿Mbil kaban ketz yi o' balaj wunak kol tz'oc xite'n yi balaj xe' kale k'ukle't kac'u'l, nin qui'c xac sban?
¿Na'l ka'j nint?
4 Je puntile'j: Yi ketz kaRyosil at nin tera'tz.
Cho'n c'olchij i' tcya'j.
Nin na til i' cyakil yi na bajij.
Na tzan i' tan tilwe'n cyakil yi na chiban wunak bene'n tzi'n.
5 Na tzan i' tan tilwe'n yi e' balaj wunak.
Ncha'tz na til i' yi mbi na chiban yi e' mal nak.
Nin wi'nin na chi'ch c'u'l scye'j yi e' yi ntin oyintzi' cya'n.
6 Tz'ul chicaws yi e' mal naka'tz tan Ryos.
Tz'ul kojol xtxak'ak' tu azufre ẍchiwi'.
Tz'ul jun cyek'ek' ta'n yi cy'a'n k'ak' ta'n tan chitz'e'se'n.
Ya'stzun chicaws yi stk'e' Ryos tan chicawse'n.
7 Na yi ketz Kataj qui na je k'ab twi' jun.
Nin wi'nin na pek' i' scye'j yi e' balaj.
Cha'stzun te squile' quib yi e' c'ulutxum tu Ryos.