8
Yi k'ej Kataj tu chiwalor wunak
1 Ta', ilu' wi'tz Cawl ketz,
at k'eju' bene'n tzi'n wi munt.
Nin at k'eju' jalen tzi'n tcya'j.
2 Ncha'tz tan chik'ajsbil yi e' tal nitxa', tan chik'ajsbil yi e' yi na chitxutxune't, na bnix jun colbil ib tanu'.
Ja bnix yi jun colbil iba'tz tanu', tan kacolol kib ẍchiwutz yi e' kacontr.
Ej nin xconk yi jun xtxolbila'tz tan chisotzaje'n yi e' pajol ca'wlu', scyuch' yi e' contru'.
3 Ta' yi na wil cyakil yi tcya'j yi ja bnix tanu', nin yi na wil yi xaw, nin yi na wil yi e'chk tx'uml yi ja bnix tanu',
4 na no'ctz tan xtxumle'n:
¿Mbi kaxac yi o' wunak?
¿Mbi xac jun yaj swutzu'?
¿Mbi tzuntz na ku'l tx'akx tc'u'lu'?
¿Mbi tzuntz na oc ilu' ske'j Ta'?
5 Na ja kabnix tanu' chi o'-k ryos tane'n.
Ja kabnix tanu', nin ja tak'u' kak'ej.
Nin chin tz'aknak cu'n nko' tuleju'.
6 Ja tak'u' ca'wl sketz, tan kacawune'n scye'j cyakil yi e'chk mas takle'n.
Ja tak'u' ama'l sketz tan koque'n tetz cyajcawil cyakil yi bnixnak tanu'.
7 Na kacawun scye'j yi e' cne'r.
Na kacawun scye'j yi e' wacẍ.
Nin scye'j yi e' smaron txuc.
8 Na kacawun scye'j yi e' txuc yi na chixicy'in.
Nin scye'j yi e' txuc yi ate' xe a'.
Nin scye'j cyakil yi ate' xe mar.
9 Wajcaw, ilu' wi'tz Cawl
nin at k'eju' bene'n tzi'n wi munt.