3
Oturutoko Ritonõpo a yna akorehmatohme eya
1 Wekyry tomo, ynara kary se ropa ynanase oya xine. Oturutoko Ritonõpo a, “Papa, Pauru tõ akorehmako õmiry ekarory poko eya xine, ekurehpyra õmiry otuotuhponãmatohme, Jezu poetoryme imehnõ ehtohme õmiry apoiryhtao tyya xine, Tesaronikapõkõ sã toto ehtohme õmiry tapoise ahtao eya xine,” kahtoko.
2 Oturutoko Ritonõpo a yna pynohtohme tapoise yna ahtao pohnomo a, iirypyrymãkomo a, tuhke Jezu onenetupuhpynõ nae exiryke.
3 Yrome Kuesẽkõ kurumekara xine mana. Ajamihtanohtorỹko mana, oewomatorỹko joroko tamuru omipona pyra oehtohkõme.
4 Tãkye ynanase awaro xine yna exiryke. Yna omipona exikehpyra matose, Jezu poetoryme oexirykõke.
5 Ynara ãko ynanase Kuesẽkomo a, “Papa kapuaono, Tesaronikapõkõ amorepako ose ipunaka toto ehtohme. Akorehmako toto tyhtomarykõ eanahtotohme, Kyrixtu a tyhtomary eanahtotopõpyry samo,” ãko ynanase.
Erohtoko kene tuenikaroro sã rokene
6 Wekyry tomo, Kuesẽkõ Jezu Kyrixtu omi poe ynara ãko ynanase oya xine, akĩme exiketõ maro osepeme pyra ehtoko, ynanamorepatopõpyry omipona pyra toto ahtao.
7 Akĩme pyra ynanexiasene amaro xine yna ahtao. Zuaro matose. Yna ehtopõpyry sã ehtoko, akĩme pyra.
8 Imehnõ zuru poko pyra ynanexiase. Topehmase yna a ahtao rokẽ ynanenapyase. Ynanerokuase, ynanetuarimase koko, saereme, enara, anapyrykõ onenahpyra yna ehtohme.
9 Topehke pyra yna otukuru amaro xine kure repe, ãmorepanekõme yna exiryke. Yrome yna kure exiry enepotohme oya xine topehke rokẽ ynanotukuasene amaro xine, ỹme oehtohkõme roropa.
10 Amaro xine yna ahtao ynara ynanase oya xine, toerokuru se pyra exikety anaotuhmanohpopyra ehtoko, onykohmara roropa ehtoko, ynanase.
11 Ynara kary totase yna a exiryke, “Akĩme exiketõ nae Tesaronikapõkõ maro. Erohpyra toto ipunaka, imehnõ tapyĩ to takuroko rokẽ ytoytõko toto, yrypo poko rokẽ oturuse.”
12 Mokaro zurũko ynanase Kuesẽkõ Jezu Kyrixtu omi poe, “Erohtoko kene tuenikaroro sã rokene, tỹkyryneke oehtohkõme, õtuhtohkõme,” ãko ynanase.
13 Wekyry tomo, penekehpyra ehtoko imehnõ akorehmary poko.
14 Yna omipona pyra exikety nae ahtao, sero ynanymerohpyry omipona pyra ahtao, mokaro maro pyra ehtoko, toto hxiropotohme. Otarãme yna omipona exĩko ropa toh mana.
15 “Zehnotokõ mokaro,” kara ehtoko toto poko. Oekyrykõme mokaro tyritoko akorehmatohme oya xine yna omipona toto ehtohme ropa.
Pauru nurutopõpyry etyhpyry
16 Ynara ãko ynanase Kuesẽkomo a, “Torẽtyke pyra yna rine mase. Tesaronikapõkõ torẽtyke pyra tyriko toto, kokoro rokene. Toto maro exiko,” ãko ynanase.
17 Ywy ase Pauru. Jesety moro tymerose ya jemary ke rokene. Moro enetupuhtoko ynymerohpyry. Morara rokẽ pape aropõko ase onenerykõme.
18 Ynara ãko ase Kuesẽkõ Jezu Kyrixtu a opoko xine, “Papa, kure rokẽ Tesaronikapõkõ tyriko,” ãko ase. Enara rokene.