3
Urutõ oturutopõpyry Ritonõpo a
1 Sero nase urutõ Apakuke oturutopõpyry Ritonõpo a, eremiatohme tymerose eya.
2 Ritonõpo, imehnõ nekarohpyry onyrihpyry poko totase ya, osenuruhkãko ase.
Seromaroro morohne tyriko ropa ynaneneryme,
pake onyrityã imehxo ehtopõpyry samo.
Yna zehno awahtao ro yna pynanohko.
3 Ikurenae Etõ nonory poe Ritonõpo toehse,
ypy Parã poe toehse Ritonõpo Kurano.
Kapu typehkase mana saereme aehtoh ke,
eahmãko sero nono põkõ mã toto, emero porehme.
4 Saereh ãko mã ynororo xixi saerehkatoh samo.
Emary poe saereh ãko nexiase,
moroto tyjamitunuru tonẽse mana.
5 Osemazuhme esemary ae popyra ehtoh konõto ytõko mana.
Okomino tyrohsẽ konõto oehnõko orihmatono.
6 Totypohse ynororo ahtao,
nono tykytyky ãko mana;
ahno enẽko mana imeimehnõ nono põkomo,
enaromỹke exĩko mã toto.
Ypy tõ pake exiketõ kywyh kywyh ãko mã kehko,
somohmã epukãko mã kehko, moino ro exiketomo, aytoryhtao moro po, apitorymã poe.
7 Kuxã põkõ enease torẽtyke,
Mitiã põkõ roropa enaromỹke mã toto.
8 Ritonõpo, tuna tõ zehno mexiahse?
Tuna konõto poko tohne mexiahse?
Morara exiryke oeky tõ, kawaru tõ po moepyahse,
kahu ao etonatohme orẽpyra opoetory tõ ritohme?
9 Taky tapoise oya, opyre tõ maro.
Tuna zueme ehtoh ke sero nono tahkase oya.
10 Ypy tõ oeneryke tykytyky tykase kehko;
tuna tukuãse kapu aeino.
Tuna tõ nono zopino panaikatome toehse sororokane samo,
pohkane konõto samo tõnuhse mã kehko.
11 Xixi tõ nuno maro totypohse toh nexiase
opyre neneneh katoh eneryke tyya xine,
awaratã saerehkatoh eneryke tyya xine.
12 Tohne oexiryke mytoase emero porehme nono poro,
zehno oexiryke ahno tõ mytũtũmase.
13 Mytoase opoetory tõ pynanohtohme,
onymenekahpyry tuisame exikety pynanohtohme oya.
Popyra exiketõ tuisary tonahkase oya,
isoutatu tõ roropa tonahkase oya, porehme.
14 Opyre ke soutatu tõ tuisary taorihmapose oya,
toehse toto ahtao tyryrykane konõto samo osetapase,
toehse toto epyrypaketomo,
yna enahkary se toh nexiase,
tymõkomokãkara etapary samo, tokare pyra.
15 Oeky tõ, kawaru tõ po, tuna konõto kuao toytoytose omoro, pohkane akurome exikety htoko.
16 Morohne etaryke ya oserehnõko ase,
ypotapihpyry tykytyky ãko enaromỹke jexiryke.
Tyjamihkehse ywy, owõsaromepyra exiase xikihme.
Yrome moro ẽmepyry eraximãko ase,
yna poremãkaponanõ wãnohnõko Ritonõpo mana.
17 Wewe tõ eperytara ahtao ro,
uwa eperytara roropa ahtao,
epery tõkehko pyra ahtao enahtohme,
tupito tõkehko po otyro pyra ahtao,
okyno tõ pyra ahtao ona tõ po,
pui tõ pyra roropa ahtao apurutoh ao,
emero otyro pyra ahtao ro,
18 “Kure mase Ritonõpo,” ãko ase eya.
Kuesẽkõ eahmãko ro ase, ypynanohneme aexiryke.
19 Yjamitunurume Ritonõpo mana.
Ipokoino osetapara upupuru exĩko mã kehko,
kapau pupuru samo, ypy tõ poro jarõko mana,
moroto jewomãko mana.