11
Tuarõtanohnanõ asakorõ poko
1 Morarame mara pisarara tokarose ya mosa ehtoh kuhtohme. Ynara tykase ya,
—Owõko, Ritonõpo maro oturutoh ikuhko, tapyi. Ahno nekarory tõ zahkatoh roropa ikuhko. Ritonõpo poko exiketõ ikuhko roropa morotaõkomo, tuhke toto exiry waro oehtohme.
2 Yrome tapyi zomye jarakapyhpyry onukuhpyra exiko, tokarose exiryke Ritonõpo waro pyra exiketomo a. Itũmãko mã toto Ritonõpo esary kurã poro Jerusarẽ poro 42me nuno.
3 Mame jomiry ekaronanõ aropõko ase, ypoetory asakoro. Sakũpo xixĩse amurũko mã toto. “Emynyhmãko ynanase oorypyrykõ poko,” katohme imehnomo a. Mame Ritonõpo nekarohpyry poko imehnõ zurũko toto tuhke ẽmepyry, 1.260me ẽmepyry, tykase.
4 Mokaro Ritonõpo omiry ekaronanõ mã asakoro oriwera zoko sã mã toto. Nãparina sã roropa mokaro asakoro. Xikihme mã toto Kuesẽkõ ẽpataka, sero nono esẽ ẽpataka.
5 Mame mokaro ryhmary kukuruhtao imehnomo a, apoto tũtãko ĩtae xine tyzehnotokõ enahkatohme. Morara mokaro ryhmary kuhnanõ emero orihnõko toto.
6 Ritonõpo poe kapu apururu waro mã toto konopo oehpyra ehtohme, Ritonõpo omiry ekaroryhtao imehnomo a. Ritonõpo poe iporiry riry waro roropa mã toto munume. Ritonõpo poe seropõkõ akuruhtanohpory waro roropa mã toto, tuhke tyrohsẽ ke, kokoro rokene ise toto ahtao.
7 Mame Ritonõpo omiry poko tõturukehse toto ahtao, joroko tõ eutary ae tũtãko onokyroimo panõ mokaro asakoro rokẽ exiketõ maro tãtatapoitohkõme. Toto poremãkapõko xihpyry mana. Toto etapãko mana.
8 Mame osema taka toto ekepyry emãko mana, moro pata konõto po, Kuesẽkõ exixihmatopõpyry po. Moro pata tyorõ ke esehtõko toto seromaroro. “Sotoma moro,” ãko toto. “Ejitu,” ãko roropa toto iirypyryme moro patapõkõ exiryke itamurume.
9 Mame mokaro ekepyry enẽko mã toto, emero pata tamurupõkomo, ituakyry roropa toto enẽko, tyotyoro omiry waro exiketõ roropa, emero ahno toto ekepyry enẽko asakoropane ẽmepyry zokonaka. Toto ekepyry ononẽpopyra roropa mã toto.
10 Tãkye seropõkõ exĩko mokaro orihtopõpyry eneryke tyya xine. Atãkyemãko mã toto. Tynekarorykõ aropõko mã toto oseya rokene. Mokaro asakoro urutõkõ pokoino toetuarimase toto itamurume seropõkomo. Naeroro atãkyemãko mã toto mokaro ekepyry eneryke tyya xine.
11 Morarame asakoropane zokonaka tõmehse ahtao tõsemãkapose ropa toto Ritonõpo a. Towõse ropa toto. Toto eneryke tyya xine tõserehse itamurume emero porehme.
12 Morarame omi konõto totase kaino mokaro a, asakoro rokẽ exiketomo a. Ynara tykase eya xine,
—Osehtoko xiaro! Õnuhtokose! tykase.
Mame tõnuhse toto kakoxi kapu aka, akuruhtoko imehnõ neneryme porehme.
13 Mame morara ahtao nono kywyhkywyh tykase jamihme samo, pata zokonaka tyyryhmase. Omame porehme tapyi ahtao toiro toepukase. Ahno roropa totapase nono kywyhkywyh karyke, 7 miume totapase toto. Imehnõ tõserehse itamurume.
—Kure Ritonõpo kapuaõ mana. Imehxo mana. Orẽpyrahxo roropa mana, tykase toto.
14 Asakoro ryhmatõ tonahse repe. Enetoko ke zakorõ ryhmatõ oehsasaka mana.
Rue 7mano, etyhpyrymano
15 Mame imepỹ Ritonõpo nenyokyhpyry rue etone, etyhpyrymano. Mame omi opore exiketõ etase kapu ao. Ynara nase toto,
—Seromaroro Kuesẽkõ sero nono esẽme toehse rahkene tynymenekahpyry maro. Tuisame exikehpyra mana jũme, nase toto.
16 Morarame tamuximãkõ 24mãkõ tapõkõ po typorohse exiketõ Ritonõpo ẽpataka, tõpatapoe typorohse toto nono pokoxi, “Kure mase,” katohme Ritonõpo a.
17 Ynara nase toto,
“Yna esẽme mase Ritonõpo, imehxo oexiryke.
Seromaroro yna esẽme ro mase.
Moinoronato mase yna esẽ roropa.
Kure mase.
Orẽpyra oexiryke imehnõ myporemãkapoase.
Tuisame toehse mase.
18 Awaro pyra exiketõ ozehno toehse mã toto,
tuãnohtohkõ toehse exiryke,
aorihtyã apiakatoh toehse exiryke roropa.
Opoetory tõ epehmatoh toehse roropa, toto erohtamitume,
urutõkõ maro, emero opoetory tõ roropa,
tuisamehxo exiketomo, tuisame pyra exiketomo.
Emero ouno exiketõ epehmatoh toehse.
Sero nono ryhmananõ enahkatoh toehse roropa mana,”
nase toto.
19 Mame Ritonõpo maro oturutoh kurã totapuruhmakase kapu ao. Ritonõpo nymeropohpyry ẽ tonese moro tao. Typoetory tõ pyno Ritonõpo exiry enetupuhtoh moro. Mame neneneh tykase, takararah tykase, panaikato, konomeru maro. Nono kywyhkywyh tykase, konopo itamurume topu sã xiriri tykase, enara.