2 Tesolounika
Olo Iyoswo Tɨfinjo loso Poul Aꞌamu Tesolounika somneꞌno Mtɨꞌmokumentisofoho.
Olo Hungkuno Sɨmoꞌmjofoho.
Jisas ahwomomneꞌno nto sɨmentiso sohonta soswo sɨfeꞌnji ahoꞌnji hopiꞌnono nto uyakoꞌmentisopo Poul olo iyoswo tɨfinjo loso aꞌamu Tesolounika afahomneꞌno mtɨꞌmokumentisofoho. Aꞌamu Tesolounikajoso Poul iyoswo sɨmoꞌmo mtɨꞌmokuyahotɨmentisoso nomantɨfi hofɨko Jisas Kɨlais asomo pe-eꞌne hungkuno Poul mtɨꞌmokumentisoso hofɨko aꞌamu Tesolounika fehohnjoso atofo hwasyohohntaꞌni lontɨfi hofɨkoe hunoso ole syafɨkuꞌmentohofofoho. Poul kako olo iyoswo mtɨꞌmokisyo loso Hwe Engo sohwoe Sɨkuno nto iꞌmofapohoho lontɨfi hofɨko pisomoꞌnyo yontɨfi yoꞌmayo syoho soꞌno nakwolaho lontɨfi siki humantɨfi nomꞌne aꞌamufe syohomneꞌno hofɨkoe humayo somneꞌno yoꞌmayo soꞌno siki hungkuno lutɨhunɨwoꞌɨngkohofofoho. Olo hungkuno loso Poul nupaꞌnonto iyoswo tɨfinjo loso mtɨꞌmokumentisofoho. (Oso hungkunoso 2 Tesolounika sohe engo 2 honɨngkano weꞌe 2-ꞌnji sohe engo 3 honɨngkano 11-ꞌnjo sopo weho.) Iyoswo sɨmoꞌmjo mtɨꞌmokuyahotɨmentiso sohonta hamno hufaꞌulɨkeno hufaꞌu sɨhunetɨkeno nto pamentisopo olo iyoswo tɨfinjo loso mtɨꞌmokumentisofoho. Olo iyoswo hiloso Poul kako aꞌamu Tesolounikaso Jisas nto iꞌmofapohoho. Hofɨko huno ose syofɨsyontanɨngkofi Poul kako oso huno homo somo itoꞌno mɨhwajiyoꞌne olo iyoswo loso mtɨꞌmokumentisofoho. Osoꞌno nakwo olo iyoswo homo lomo atofo lɨhwasi tɨfi unɨngkohwano.
1
1 Ngko Poulɨꞌni Sailasɨꞌnji Timoutiꞌnji nakwo nohumentani olo iyoswo loso semtɨꞌmokiyalokuhwono. Sekwo Tesolounika soponjo soku Anɨtumo inɨngkowalokwofo soku sekwo nakwoe Mpohwo Anɨtuꞌnji nakwoe Hwe Engo Jisas Kɨlaisɨꞌnjiye aꞌamu kuyoho.
2 Mpohumo sekumneꞌno ole ulalokuhwono. Nanɨngkwohwo Anɨtu sohwoꞌnji Hwe Engo Jisas Kɨlaisɨꞌnji sikoꞌmontaꞌi siko yoꞌmayo wopɨngo selohohosɨsi siko sɨmeho pompenjiyo wosejopanjiyoho.
Poul Anɨtumo isamoyoka ulalofoho.
3 Sekwo nakwoe Hwe Engo Jisas Kɨlaisɨmo sɨmeho hiꞌntnnono uyɨwoꞌnɨngkohofo soku, nakwoe aꞌamu kuyoho. Sɨkuno engolopohamo sekuneꞌno Mpohumo isamoyoka ulɨwoꞌnɨngkuhwantanoho. Oso yahino hiso wopɨngofoho. Hwapɨngoso olenoho. Sekwoe sɨmeho hiꞌntnnono Anɨtumo uyoso engo imoꞌnalofoho. Sekwo nomꞌne aꞌamu soꞌnji sɨmeho inyoso engo imoꞌnalofoho. Osoꞌno sekuneꞌno Mpohumo isamoyoka ulalokuhwono.
4 Oso hisoꞌno nakwo nomꞌne aꞌamu Jisasɨmo sɨmeho hiꞌntnnono uyɨwoꞌnɨngkohofo somo sekuneꞌno ole ulalokuhwono. Aꞌamu nomꞌneso wonyo selohofontɨfi tohino engo sejopahonɨngkofi sekwo Anɨtumneꞌno musɨkwajiyoꞌnjo yokumpohnꞌnyo lohofontɨfi Anɨtumo sɨmeho hiꞌntnnono engo uyalokwofo. Ose yalokwofo soꞌno aꞌamu nomꞌne somo ulontani sɨmeho wopɨngo namoꞌnɨwoꞌnɨngkohoho.
Anɨtu kako aꞌamu hwahoponjofe honɨngkanomneꞌno hungkuno ikwolofonefoho.
5 Anɨtu hungkuno ikwolofoꞌne hwapɨngo sohwo itoꞌnohini yɨwoꞌnɨngkiso hweho. Sekwo Anɨtuye yahino wopɨngoso malokwofo soꞌno aꞌamu nomꞌneso tango sejopalokwofo. Yoꞌmayo tango seꞌmahwosoꞌno hwangku sekwo Anɨtuye angopo humayoso hoponoho.
6 Anɨtu oso aꞌamu sekumo wonyo selohofo somo kako aku tohino uyonefoho. Oso yahinoso itoꞌnohinoho.
7-8 Sekwo tohino mawoꞌnɨngkohofo soku nakwoꞌnji Anɨtu usijoꞌno nehumajonefoho. Osohonta nakwoe Hwe Engo Jisas kako kakoe aꞌamu ahwomomo mtaꞌango yokumpohnꞌnyo soꞌnji nopahonɨngkuhwosi aꞌamu nuhwonɨfitnnefoho. Oso hohosohonta kako toho engoꞌnji nopɨhwosi aꞌamu Anɨtumneꞌno huno muyo soꞌnji nakwoe Hwe Engo Jisasɨye hungkunomo tɨfi minɨngkayoꞌnjo somo Anɨtu kako aku tohino uyonefoho.
9 Oso aꞌamu homo somo uhwonɨngkuhwosi sekwo nɨhuꞌnahone umoꞌnantɨfe kuyoho ulonefoho. Hwe Engo sohwoe sɨmanoꞌnji kakoe yokumpohnꞌnyo pomponaho soꞌnji muhwonyoꞌnjo ifitnnefoho. Nɨhuꞌnahone tohino neꞌno nomapitnnefoho.
10 Kako asomo poso sohonta kakoe aꞌamuso kakoe yofe nohoꞌnomapitnnefoho. Aꞌamu Anɨtumo sɨmeho hiꞌntnnono umotofoso sɨmeho wopɨngoꞌnji humafitnnefoho. Osohonta sekwo hofɨkoꞌnji nohumafitnnefoho. Hwapɨngoso oso hungkuno selɨmentɨhwone somo sekwo sɨmeho hiꞌntnnono uyɨwoꞌnɨngkohofofoho.
Poul kako aꞌamu Tesolounika somneꞌno Mpohwo ufoꞌmayoꞌne jomo ulalofoho.
11 Oso hisoꞌno syofɨsyontani sɨkuno engolopohamo sekumo sefoꞌmayoꞌne Anɨtumo jomo ulɨwoꞌnɨngkuhwonefoho. Ole ulalokuhwono. Anɨtu kako humayo wonyoangkafo soꞌno sehwosopoꞌmentiso oso hoponoho. Sekwo Hwe engo Jisasɨmo sɨmeho hiꞌntnnono uyalokwofo soꞌno yoꞌmayo syoho wopɨngo uyano lɨfijoso Anɨtu kakoe yokumpohnꞌnyo wosejapono. Yoꞌmayo syoho wopɨngo Hwe Engo Jisasɨmneꞌno yalokwofoso moiꞌwo esojwaofɨkujoꞌno wosefoꞌmano.
12 Ose ifijoꞌmanji sekwo Hwe Engo Jisasɨye yofe wohoꞌnomantɨfeho. Osoꞌno Jisas kako sekwoe yofe aku wohoꞌnosemaꞌmtonoho. Hwapɨngoso ole, Anɨtuꞌnji nakwoe Hwe Engo Jisas Kɨlaisɨꞌnji siko nakumo wopɨngo nalohofɨwoꞌnɨngkisiyo montaꞌiyoho.