UOLI VOLOXU VILE ANE
PITA
MUKAUKAVU MULAI NOXIꞌA TA MITEMA NOXOU LATAUA
Vaikala lamana
Uoli voloxu noxou Pita ꞌo ne, mukaukavu sou uꞌoxonu pekiaꞌa ta mitema no ꞌa lalotu e mimuxaxu taneꞌi noxou Iesu, ia mitavulenu tuꞌutuꞌumaxu toxotoxoxaꞌa. Anu muvikala lexe laixe sou aneꞌi xavutalanu aꞌalo laixe sou Iesu Kalisito la. Aꞌalo ne aloxo ꞌo. Iesu musoli xe iliꞌi la mutulu la mo musakiinu vaikala lexe iliꞌi la Anu ulivu uneꞌe la. La sou anu laixe lexe aneꞌi ixolu seꞌisisi sou ixomaiou.
Anu muvikala lexe tuꞌutuꞌumaxu e muxali noxiꞌa ne sou utovonu muxamuxaxu taneꞌi noxiꞌa. Aloxo ne, la anu laixe lexe aneꞌi itulu pekiaꞌa ulai uxali no voxo ane Iesu Kalisito ulivu uneꞌe la, la sou Anu ulosiꞌa ꞌulusou.
Aꞌalo muai no nano aloxo ꞌo
Vaikala lamana 1:1-2
Taꞌitinu Lataua ualasou so alauna xe voteꞌi sou pamauli noxou 1:3-12
Ngaxolu vaꞌaxu no anu ꞌilixo masumasua 1:13–5:11
Tavaꞌu kaukavu ane ꞌo 5:12
Vaikala sou sexela kaluxusou 5:13-14
1
Pita ne Anu Itema sou Xaixai Noxou Iesu Kalisito
1 Eni Pita, eni aposeli noxou Iesu Kalisito, eni ekaukavunu vaivaikala ane ꞌo mulai noxinge ngingi ta asila noxou Lataua ane ngelongolau tani la ngelai ngexolu no xalexalee lia ta tatila ne Pontosi, mo ne Xalatia, mo ne Kapodosia, mo ne Asia, xe ne Bitinia.
2 Lataua Maminge mulavusinge mo musosovosinge xo nenge texali malemalengainge no ꞌa xaixai noxou Uleenu, mo ngalomuxu Iesu Kalisito la sou Anu uꞌulosinge no anu sialuxu. Eni akilaka lexe alauna mo opo seꞌisisi noxou Lataua uꞌanaꞌana mo uxolu noxinge.
Taꞌosasou Lataua sou Loopala Ane Kaluxu Uasi
3-4 Mo nenge taꞌosasou Latauamenge anu Iesu Kalisito Tila noxinge Momu, xo Anu mutulusou Iesu no anu soli, ilou tulu noxou la nenge tenoꞌu mauli alavua, xo Anu mualaunasinge. No anu mauli ane ne uꞌoxo pekiaꞌinge sou taloopala no anu mauli ane kaluxu uasi ane uai teitexi no opo loxotolo. Mimii ane ne umomosou umamulo mo nuninuniꞌu mo ukalu vitanisi uasi.
5 Ngingi ngemulaxu tangengi noxou Iesu la nganoꞌu mauli ane kaluxu uasi e Lataua mulalaxiinu sou nganoꞌu uxali manina sou no voxo kaluxusou, xo Anu usaxilainge no anu xavi noxou.
6 Aloxo ne la sou ngingi ngaꞌosa manina xo tuꞌutuꞌumaxu ane muxali noxinge la muꞌoxongengi ngetama ne umomomo sou uxolu maxuveeni uasi.
7 La sou tuꞌutuꞌumaxu ne sou utovonu muxamuxaxu tangengi lexe ngingi ngamuxaxu tangengi maninasou. Aloxo xoulu e iꞌelaxu sou mosomoso uxexee ia xoulu maninasousi uxali, anu iouvilesisi aloxo muxamuxaxu tangengi ne, la muxamuxaxu tangengi ne muaꞌulixu xoulu, xo xoulu ne anu ukalu vitanisi. Lexe ngingi ngatulu pekiaꞌinge no anu muxamuxaxu tangengi ulai uxali no voxo ane Iesu Kalisito uxali lamana la Lataua uꞌosasinge mo uitinu ualasinge.
8 Ia ngingi ngamaisou Iesu Kalisito uasi ia tangengixu, mo vaimomo ꞌo ngingi ngamaisou uasi. Ngingi ngamuxaxu tangengi noxou la ngaꞌosa manina, ꞌosaꞌila ane ne umomomo sou ngaaꞌaloxu la ngakamuli vaikala lexe ngaaꞌaloxu a loxovaa. Uasisi manina. Xo ꞌosaꞌila ane ne sou teitexi no opo loxotolo.
9 Ngingi ngaꞌosa aloxo ne xo neneaxu muxamuxaxu tangengi ane lexe ngingi nganoꞌu mauli ane kaluxu uasi noxou Lataua.
10 No anu mauli ane kaluxu uasi ne, la ta mitema sou palomatana mikakamuli laixe mo taliꞌi tavuꞌalo no anu, ia mipalomatana no anu lexe mauli ane kaluxu uasi ne ngingi ngaꞌangingi.
11 Mo Uleenu Kalisito muxolu noxiꞌa ta mitema sou palomatana la anu muvikalaneꞌixu mo mupalaꞌalixu navunavu ane uxali noxou Kalisito xe iliꞌi no anu la Anu unoꞌu uala tila. Uleenu muvikalaneꞌixu tei loxo ne la sou aneꞌi mikakamuli xe mixavuxavutala lexe itema ꞌenaꞌei manina xe imamaanu maꞌia manina ane anu uneꞌe.
12 Mo muvikalaneꞌi lamana lexe mimii ane aneꞌi miaꞌaloxu ne umomomo sou uxali no imamaa noxiꞌa uasi, ia anu muxali no anu imamaa noxinge. Ia vaimomo ꞌo Lataua mupalusou Uleenu Tavuna molu teitexi no opo loxotolo muluꞌe mo no anu xavi no ꞌa Uleenu Tavuna, la ta mitema sou aꞌalo miaꞌaloxu aꞌalo laixe mulai noxinge. Mo no anu aꞌalo laixe ne la ta angelo iisu mo imasaxa lexe imaisou kalumo.
Ngaxolu Vaꞌaxu no Anu ꞌIlixo Masumasua
13 Ioxe, aloxo ne la sou, ngaxavutala laixe mo xavutalamengi uloo, mo ngaxolu seꞌisisi, mo ngaloopala manina no anu alauna noxou Lataua e no anu voxo sou Iesu Kalisito ulivu uneꞌe la ulosinge.
14 Xo tei ngingi ngalavu uasi, la ngeꞌoxonu ꞌiliꞌilixo masumasua, ia vaimomo ꞌo la ngingi ngelavusou aloxo ne la sou mamu sou ngaꞌoxonu la. Ngalolomu aloxo ta molomolo ilolomu.
15 Ia ngingi ngaxolu vaꞌaxu no anu ꞌiliꞌilixo masumasua aloxo Anu ane muꞌavalinge ne Anu tavuna.
16 Xo kaukavu muai no nano no anu Lavuku Tavuna teinu muvikala aloxo ꞌo, “Ngaxolu vaꞌaxu no anu ꞌiliꞌilixo masumasua, xo eni exolu vaꞌaxu no anu ꞌiliꞌilixo masumasua.”
17 No mine ngingi ngavivikala ulai noxou Lataua, la ngingi ngamoxoꞌu lexe Mamixe, xo Anu utilovosou xaixai noxinge vilevilesi ane ngingi ngeꞌoxoꞌoxonu, mo no anu tilovo noxou ne la Anu utilovosou laixe manina umomomo sou uꞌoxonu tulatula vile no anu uasi. Aloxo ne la ngingi ngaxolu seꞌisiꞌsi mo ngamamaꞌu noxou Lataua xo tuala ane ngingi ngaxoxolu no anu no voxovoxo ꞌo ne anu tualasinge manina uasi. Ngingi ngaxolu loxo ta asilasi.
18 Mo ngingi ngelavusou lexe tei la ngingi ngemaisou ꞌiliꞌilixo ane mauli no anu uasi noxiꞌa ta ꞌiluꞌilusungengi la ngemulinu la sou Lataua mulotongengi ngelivu no anu mimii ane anu ukalu vitanisi loxo siliva mo xoulu uasi,
19 Anu mulotongengi ngelivu no anu sialuxu Kalisito ne lailaixe misevile loxo sipsip ꞌolu e mii vile loxo xalevi mo vuvuli uꞌoxonu vasimolu uasi.
20 Anu Lataua mulavusou Kalisito tei no mine ukoinu mimii latala no lia ꞌo uao. Ia no voxo kaluxusou la Anu muxali lamana sou usuꞌulingengi.
21 La sou no anu xaixai noxou Kalisito, la ngingi ngemuxaxu tangengi mo ngaloopala noxou Lataua. Xo Anu mutulusou Kalisito no lulu la mulosou uala tila.
22 La sou ngingi vaimomo ꞌo ngelomusou aꞌalo laixe mo ngamulinu xo Anu muꞌoxongengi ngexali malemalenga. Mo sou ngingi tangengixaꞌa ta vivinge noxou Iesu ngatongatoꞌo no tangengi manina.
23 Ngingi ngelolomusou aꞌalo laixe ane ne vaikala noxou Lataua ane kaluxusou uasi mo ngemulimulinu la Anu muꞌoxongengi ngexali alavua. Mauli alavua e ngingi ngenoꞌu ne aloxo ovu ngiaxu e ulapau la uꞌui vitanisi uasi, ia anu aloxo ane ulapau la uleme.
24 Xo,
“Ta mitema tavuꞌalo ne aloxo iaꞌeiaꞌe
mo tokolomoxaꞌa ne lailaixe aloxo iaꞌeiaꞌe seseenu.
Mo iaꞌeiaꞌe uxalo la sesenu ulapau.
25 Ia vaikala noxou Tatila aloxo ne uasi.
Anu umauli utotomu mo kaluxusou uasi.”
Vaikala ne ane aꞌalo laixe e miaꞌalomengi no anu.