2
1 Owụ́ ꞌbɨ Babá e, sɨmɨ bɨ kóo máógụ zɨ́se sɨmɨ Korị́ndo íri ní, máꞌdódo kóo zɨ́se dụụ́ ledre bɨ ꞌbɨ Lomo ní. Mándị́sị amá kóo mbófo romá kɨ́ úku mɨngburoko ledre e zɨ́se káa zɨ́ éyị́ bɨ máówoófụ ledre go ní wá.
2 Máóto kóo sómụ́ ledre amá ndị́sị ꞌdódo zɨ́se lá dụụ́ ledre Yésụ kɨ́ ledre umbu bɨ kóo Kɨ́résịto Yésụ maꞌdáa uyu wo do mɨngbúngbu kágá ní.
3 Sɨmɨ bɨ kóo mándị́sị ꞌdódo ledre ga gére née zɨ́se ní, mɨmbéꞌdemá ndaá kóo wá. Máyá ꞌbɨ amá útúásásé esé kóo ṇgúṇgu ledre ga bɨ kóo mándị́sị ꞌdódo yée zɨ́se née wá.
4 Ṇgúṇgusé kóo ledre ga bɨ máꞌdódo yée zɨ́se gɨ ro Ngére Yésụ née ndaá gɨ zɨ́a bɨ ya máówo kacɨ́ ꞌdódo a go ní wá, yị́ ené gɨ zɨ́a ꞌDówụ́ Lomo ndịsị kóo ꞌdódoyéme ledre máa ga gére née zɨ́se za cụ́ ne kɨ́ mongụ́ rokoꞌbụné kɨ́dí, née mbigí ledre bɨ gɨ zɨ́ Lomo ní.
5 Gɨ zɨ́ kéyị née, ndásé óto mɨmbéꞌdesé ro mɨsómụ́ ledre ꞌbɨ ꞌyịmaꞌdí e wá. Ídísé óto mɨmbéꞌdesé dụụ́ ro ledre bɨ ꞌbɨ Lomo ní gɨ zɨ́a bɨ Lomo nɨ kɨ́ rokoꞌbụ ledre e za mbá zɨ́ne ní.
Cóngó komokenzị nɨ dụụ́ gɨ zɨ́ ꞌDówụ́ Lomo
6 Ledre ga bɨ ndịsịzé ꞌdódo yée zɨ́ ꞌyị ga bɨ ṇguṇgunɨ́ ledre ꞌbɨ Kɨ́résịto go kɨ́ngaya ní, nɨyí komokenzị bɨ ꞌbɨ Lomo ní. Ndaá komokenzị bɨ gɨ zɨ́ ꞌyịmaꞌdí e ní wá, ndaá kpá komokenzị gɨ zɨ́ ꞌyị ga bɨ kɨ́ mɨngburoko rokoꞌbụyé do sogo káṇgá ba ní ní wá. Gɨ zɨ́a moko nda sɨmɨ komokenzị ꞌbɨ ꞌyịmaꞌdí e zɨ́ Lomo wá.
7 Ndị́sịzé úku ba ledre komokenzị bɨ ꞌbɨ Lomo bɨ Lomo maꞌdáa otoecị kóo mɨótoécị gɨ zɨ́ ꞌyịmaꞌdí e ní. Lomo yemeomo kóo ledre go gɨ rozé ꞌdesị́ ꞌdáꞌdá zɨ́a kɨ́ ótoógụ éyị́ e, kɨ́dí, née nɨ óto zée kɨ́ ledrezé zɨ́ne owóowó. Otoecị yị́ ené kóo ledre née mɨótoécị ukuꞌdodo ené kóo zɨ́ bɨkéṛị́ ꞌyị do sogo káṇgá wá.
8 Mɨngburoko ngére ga bɨ ꞌbɨ do sogo káṇgá ba owoyemenɨ́ ledre gɨ ro mongụ́ komokenzị bɨ Lomo yemeomo kóo ledre kɨ́e gɨ ro ꞌyịmaꞌdí e née wá. Idí owoyemenɨ́ kóo bo yá, káa bɨ iꞌbínɨ́ kóo lorụ do phéphéónzó Ngére Yésụ bɨ nɨ kɨ́ mongụ́ úndruné ní wá.
9 Ledre née utúasá go ꞌduo kpịnị kɨ́ ledre bɨ kóo nébị Isáya uku ní kɨ́dí,
“ꞌYị e utúasánɨ́ lúrú a,
ꞌyị e utúasánɨ́ kpá úwú a wá,
abú ukuꞌdodonɨ́ zɨ́ye utúasá kpá ólụ́ sɨmɨ doyé wá.
Née Ledre bɨ Lomo yemeomo gɨ ro méngị a zɨ́ ꞌyị ga bɨ otonɨ́ ꞌbúa go ní.”
10 Zée ꞌyị ga bɨ ꞌbɨ Ngére Yésụ ní, Lomo ꞌdodo yeme kóo ledre máa née go zɨ́ze sɨmɨ rokoꞌbụ ꞌbɨ ꞌDówụ́ne.
Gɨ zɨ́a ꞌDówụ́ Lomo maꞌdáa owoyeme sómụ́ ledre ꞌbɨ Lomo bú bɨlámáne.
11 Ngíti ꞌyị kpị́ utúasá bú ówoyéme sómụ́ ledre ꞌbɨ ezené? Ɨ́ꞌɨ, éyị́ ndaá kenée wá. ꞌYị ndịsị ówoyéme sómụ́ ledre ené dụụ́ ne kɨ́ roné. Nɨ gɨ ro Lomo kpá kenée. ꞌDówụ́ Lomo ndịsị ówoyéme sómụ́ ledre ꞌbɨ Lomo dụụ́ ne.
12 Owoyemezé ledre bɨ Lomo mengị zɨ́ze ní go bɨlámáne. Bɨ owoyemezé ní, ndaá bɨ ya kɨ́dí ꞌyị ga bɨ do sogo káṇgá ba ꞌdodonɨ́ ye zɨ́ze ní wá. Lomo kasa ꞌDówụ́ne ne zɨ́a ógụ ndị́sịné sɨmɨzé ndị́sị ꞌdódoyéme ledre ga bɨ yeme yée go gɨ rozé ní zɨ́ze.
13 Gɨ zɨ́ kéyị née ní, zɨ́ze ndị́sịzé ꞌdódo zɨ́ ꞌyị e ꞌduo dụụ́ cóngó ledre bɨ ꞌDówụ́ Lomo ꞌdodo yée ne zɨ́ze ní. ꞌDodozé ezé ledre bɨ ogụ gɨ zɨ́ ꞌyịmaꞌdí kɨ́ sómụ́ ledre ꞌbɨ ꞌyịmaꞌdí sɨmɨné ní wá.
14 ꞌYị máa wo bɨ ngárá ꞌDówụ́ Lomo ndaá sɨmɨ a wá ní, utúasá ené ówoyéme ledre ga bɨ ꞌDówụ́ Lomo ndịsị ꞌdódo yée zɨ́ze ní wá. Ledre ga gére née nɨyí ídí eyé zɨ́a káa zɨ́ ledre cayi ní gɨ zɨ́a utúasá ené ówoyéme yée lá kɨ́ roné wá. ꞌBúó togụ́ ꞌDówụ́ Lomo ꞌdódo yée ne zɨ́a nɨ fú ówoyéme yée gɨ zɨ́a ledre ga gére née ogụnɨ́ yị́ eyé gɨ zɨ́ Lomo.
15 ꞌYị bɨ nɨ kɨ́ ꞌDówụ́ Lomo sɨmɨné ní, útúásá go ówoyéme dongará ledre e za mbá bɨlámáne. ꞌYị máa wo bɨ ngárá ṇguṇgu ené ledre ꞌbɨ Lomo wá ní, utúasá ené ówoyéme ledre ꞌbɨ ꞌyị máa wo bɨ ṇguṇgu ledre ꞌbɨ Lomo go, nɨ kɨ́ ꞌDówụ́ Lomo sɨmɨné ní wá.
16 Ledre née utúasá go kpịnị kɨ́ ledre bɨ nébị Isáya uku ní kɨ́dí,
“Ambí utúasá bɨ ówoyéme sómụ́ ledre ꞌbɨ Ngére Lomo ní ne,
bɨ zɨ́a ndị́sịné íꞌbí lorụ zɨ́a ní?”
Tɨ́ lá utúasázé ówoyéme ledre bɨ Kɨ́résịto ndịsị sómụ́ ní.