Bafut Jɛms 1

Àŋwàꞌànə̀

JƐMS

ǸJIꞌÌNNǓ AŊWÀꞌÀNƏ̀ YÛ

A aŋwàꞌànə̀ yû aa a lɛ ŋŋwàꞌànə Jɛms muma bɨ̀ Yesu a mbo bɨ̀Krisèn bìi mə bɨ lɛ njàꞌà waa bɨ tswê a ɨtoo ɨtoo aà. Jɛms à lɛ ŋkɨ mbə ntsyàsə̀ a ŋghotə a Yerusalem.

Jɛms à ŋwàꞌànə ndɨꞌɨtə nɨ̂ bə̀ bɨ Nwî nɨ ɨnnù jî ghàꞌàtə̀, lâ mâ ànnù yìi mə à ghàa ghu aa à nɨ̂ àbìintɨɨ̀. Ǹswoŋə nɨ mə bɨ yə abìintɨɨ ŋû aa a nɨ ɨ̀fàꞌâ yi bo bɨ̀ mɨ̀ghɨ̀rɨ̀nə̀ mɨ ɨnnû mi. Kaa àbìintɨɨ yìi mə ŋǔ a swoŋə tsiꞌì nɨ̀ ǹtsù aa kaa à sɨ abìintɨɨ yìi mə a yweensə ŋû aa bə̂. Tâ bə̀ bìi mə bɨ bii Nwî aa tâ bɨ̀ kɨɨ ŋghɨrə nɨ̂ ànnu yìi mə nɨ̀ghàà nɨ Nwî nɨ swoŋ aà, kaa waꞌa kà ǹyuꞌu tsiꞌì yùꞌù, kaa waꞌà nɨ nu ka mfaꞌa (1.22-25). Jɛms a bû ŋ̀ghaa annù ǹloŋ mɨtsyɛ̀ (1.5-8), ŋù yìi mə a boŋ mɨtsyɛ̀ aa tâ à betə a mbo Nwî nɨ̂ abìintɨɨ̀. Ǹdɨꞌɨtə nɨ̂ bə̀ bɨ Nwî mə tâ bo ka nzi ntswâ àləə̀ yaa (3.1-12), ǹtsuu mɨlɔ̀ꞌɔ mɨ bɨ̂lɨ̂m byaa kɨ tɔꞌɔtə, (4.11-12) ǹtsuu kɨɨ kɨ kàà, tâ ɨ̀ɨ̀ŋə̂ ŋù tâ à bə ɨ̀ɨ̀ŋə (5.12). Tâ bə̀ bìi mə bɨ bii Nwî aa tâ bo ka ntswa nɨ̂ ǹtɨɨ̀ waa ŋkɨɨ ntsaꞌatə nɨ̂ Nwî a noò ŋ̀gɨꞌɨ̀. Bɛɛ bo tɨ ghɔ̀ɔ, bo kâ m̀bii nɨ̂ ɨ̀fǎnsənnù jyaa bo nɨ bo, ŋka ntsaꞌatə nɨ̂ Nwî (5.13-18) ǹloŋ mə Nwì a yuꞌu atsàꞌàtə̀ Nwî ŋù yìi mə à tswe nɨ̂ àbìintɨɨ aà.

Jɛms à naŋsə ŋŋwàꞌànə aa ɨnnù jìi mə mbə ɨ kwɛtə̀ bə̀ bɨ Nwî a mûm ǹtswêntɨ̀ɨ yàà, ŋ̀kwɛtə nɨ̂ waa mə bɨ̀ ka ŋkhə Satan, bo bɨ̀ ànnǔ ŋkɔ̌ŋ njoo mbi jù, m̀baŋnə ŋka nyoŋtə a mbɛ̀ɛ Nwì tǎ bə bɨ̂subɨkaꞌâ bi tsǒ Abraham (4.1-8).

Bɨ yatə̂ àŋwàꞌànə̀ yû aa laà:

1. Ǹjiꞌìnnǔ aŋwàꞌànə̀ yuà 1.1

2. Àbìintɨɨ nɨ mɨ̀tsyɛ̀ 1.2-8

3. Ànnǔ ŋgàŋə̂fumə bo bɨ̀ ŋ̀gǎŋkabə̀ 1.9-11

4. Ànnǔ nyweꞌetə ŋù bo bɨ̀ àkwàꞌànə̀ 1.12-18

5. Ŋ̀ka nyuꞌu nɨghàà nɨ Nwî ŋ̀kɨɨ ŋghɨrə 1.19-27

6. Àwàꞌàsə̀ ǹloŋ annǔ a ŋka ntɛꞌɛ nàndènə̀ a tɨtɨ̀ɨ bə̀ 2.1-13

7. Àbìintɨɨ bo àfàꞌà 2.14-26

8. Krisèn bo àləə̀ yi 3.1-18

9. Krisèn bo bɨ̀ ǹjoo mbî 4.1—5.6

10 Ɨ̀dɨꞌɨtə̀ jî mɔꞌɔ̂ 5.7-20

1 À nɨ mə̀ Jɛms, ŋ̀gàŋàfàꞌa Nwì nɨ yì M̀màꞌàmbî Yesu Kristo, mə tsàꞌàtə̀ ŋ̀gwɛ̀ꞌɛ̀ baIsrael nɨghûm ǹtsòbaà yìi mə ɨ̀ jaꞌanə ntswetə a ɨdɨgə tsɨ̀m faa mbi aà.

Àbìintɨɨ nɨ̀ mɨ̀tsyɛ̀

2 Bɨ̀lɨ̂m bâ, nɨ̀ ka naŋsə ndorɨtə a nòò yìi mə mbuu ɨkwàꞌànə tsɨm ɨ tsiꞌi ghuu aà; 3 ǹloŋ mə nɨ bə tswa ntɨɨ̀ ghu ɨ tsyǎ àkwàꞌànə̀ yìi mə a yweꞌetə nɨ̂ àbìintɨɨ̀ yuu aa, boŋ nɨ̀ ka tɨgə tswe nɨ̂ àtàŋəntɨɨ̀. 4 Nɨ̀ yə mə àtàŋəntɨɨ yuu a ghɛɛ nɨ̂ m̀bìì a mûm ŋ̀gɨꞌɨ tâ nɨ̀ tsuu lǒ kaa, tâ nɨ̀ kwe ŋkɔꞌɔ ntəə ŋkuꞌunə, kaa waꞌà nɨ àlɔ̀ꞌɔ̀ tswê. 5 Lâ m̀bə ŋù nɨ̀bù a tɨ boŋ mɨtsyɛ̀, a kuꞌùnə̀ mə tâ à tsaꞌatə Nwî ǹlɔɔ ghu mbô, boŋ à ka fa ghu mbô, ǹloŋ mə Nwì a fa njoo a mbo bə̀ bɨ̀tsɨ̀m nɨ̂ àbɔ̀ŋəntɨɨ̀, kaa waꞌà lɨŋə̀ bə̂. 6 Lâ bɛɛ a tɨ tsàꞌàtə̀ Nwî a nɨ̌ŋ ǹtɨɨ̀ yì ghu nû, ǹtsee kɨ jɨ̀ŋkə̀ bə̂. Ŋù ǹtsɨ̀m yìi mə a jɨ̀ŋkə̀ aa, à bə aa tsǒ akàŋə ŋkì mɨyaa yìi mə fɨ̀fə̀rə̀ a tii ŋghɛɛ mbù mbɨɨ nɨ yu aà. 7-8 Àjàŋə̀ ŋû ma ya mə a lɔɔ nɨ mɨ̀ntɨɨ mi mbaa, ǹjɨ̀ŋkə̀ nɨ̂ jɨ̀ŋkə̀ nɨ̂ ɨ̀nnǔ ji tsɨ̀m aa, tâ à tsuu lǒ waꞌatə mə mbə yu kwɛrə̂ àyoò tsu a mbo mmàꞌàmbî Nwì.

Ŋ̀gàŋə̂fumə bo bɨ̀ ŋ̀gǎŋkabə̀

9 Ǹdɨm yiꞌinə̀ yìi mə à nɨ ŋù tɨ̀kùm aa à tswe nɨ̀ ŋ̀ka ndorɨtə a ajàŋ yìi mə Nwì à ŋɛ̀ntə yi a ndəŋ aà; 10 tâ ǹdɨm yìꞌinə̀ yìi mə à nɨ ŋgàŋkabə aa tâ kɨɨ ŋka ndorɨtə a noò yìi mə Nwì à sɨ̀gɨ̀sə yi a nsyɛ aà, ǹloŋ mə ŋ̀gǎŋkabə ɨ ka yǐ wàŋsə̀ tsyà waa aa tsiꞌì tsǒ ɨ̀bwìꞌi ŋgɛ̀ɛ̀ aà. 11 Nòò a kɨ nta ntɨɨ aa, a tɔɔ̀ ŋ̀gɛ̀ɛ̀ ɨ yɔrə̀; ɨ̀bwìꞌi ji ɨ wôkə̀ a nsyɛ, nɨ̀bɔ̀ŋ ni nɨ mɛ̂. À kɨ mbə ŋgɨ̌ŋ ŋgɨ̀ŋ ajàŋ yìi mə ŋgàŋkabə à ka yǐ tsyà yi, a noò yìi mə a karə mfaꞌa nɨ̂ mɨ̀fàꞌâ mi aà.

Àkwàꞌànə̀

12 Nɨ̀dorə nɨ tswe a mbo ŋù yìi mə à lwìꞌi nɨ̂ àbìintɨɨ̀ a noò yìi mə ɨ̀kwàꞌànə̀ ɨ zì ghu mbo aà ǹloŋ mə à bə tsyà m̀buu ɨ̀kwàꞌànə̀ ma jû bəə boŋ à ka kwɛrə mɨyàrɨ̀nə̀ mɨ ŋgùꞌù mi, tâ à bə ntswentɨ̀ɨ̀ ya yìi mə Nwì à kàꞌa a mbo bə̀ bìi mə bɨ kɔ̀ŋə̀ yi aà. 13 M̀bə mbuu ɨ̀kwàꞌànə̀ ma jû ɨ yi tɨ zǐ a mbo ŋù a tsuu lǒ swoŋ mə, “Ɨ̀kwàꞌànə̀ jû ɨ lo aa a mbo Nwì.” Nloŋ mə kaa mbə bɨ waꞌà Nwî nɨ̂ ɨ̀nnù jî bɨ kwaꞌànə̀. Kaa yumbɔŋ a waꞌà nii ŋû kɨɨ ŋkwaꞌanə nɨ̂ ànnù yî bɨ̂. 14 Lâ bɨ kwàꞌànə̀ ŋû aa wâ noò mə ɨ̀nnù jìi mə a yə̀ꞌə̀tə aa ɨ swùŋtə̀ mə̂ yi ŋko yi tsǒ mâtaà. 15 Ɨ̀nnù jya mə a yə̀ꞌə̀tə̀ aa ɨ tɨgə̀ ghɨrə a tswê nɨ ju tsǒ mu ntɨgə njwe ɨfǎnsənnù. Bɛɛ mə ɨ̀fǎnsənnù jya ɨ yi ŋkɔꞌɔ nluu, ɨ jwe nɨ̀wô.

16 Tâ bɨ̀ tsuu ghuu lǒ bweꞌesə mbâ bɔɔ bɨ maà bâ. 17 Mɨ̀tə̀ŋnə̀ mî sɨgɨ̀nə̀ mɨtsɨ̀m bo bɨ̀ ǹjoò jìi mə ɨ bɔŋ màŋsə̀ aa, tsiꞌì tsɨ̀m ɨ lò aa aburə nsɨgə. Ɨ lò aa a mbo Nwìŋgɔ̀ŋ yìi mə à nàŋsə mɨ̂ŋkàꞌà mìi mə mɨ tswe a aburə aa, m̀bə yu yìi mə kaa à sɨ kwensə, kə̀ mbəŋkə tso alɨləŋ aà. 18 A nɨ̂ ŋ̀kɔ̀ŋə̂ yì, à lɛ nnaŋsə yiꞌinə̀, ǹtsya aa a njɨ̌m nɨ̀ghàà nìi à nɨ̂ ànnù nɨ̂ŋkoŋ aà, mə tâ bìꞌinə̀ bə bɨ̂tsyà bɨ mbìì a tɨtɨ̀ɨ ŋ̀gɔ̀ŋ njoò tsɨ̀m jìi mə à lɛ nnaŋsə aà.

Ŋ̀ka nyuꞌu ŋkɨɨ ŋghɨ̀rə̂

19 Bɔɔ bɨ maà bâ nɨ̀ ka ŋwaꞌatə annù yuà! A kuꞌunə mə tâ ŋù ǹtsɨ̀m tâ à ka ŋwaŋsə nyuꞌu ànnù, ǹtsee kɨ wàŋsə ghàa, ŋ̀kɨ tsee kɨ wàŋsə lwìsə̀ nɨ̂ ǹtɔ̀ŋə̀. 20 Ŋù yìi mə a lwìsə ntɔŋ aa kaa a sɨ annù yî tsìnə̀ yìi mə Nwì a lɔ̀ɔ̀ aa ghɨ̀rə̀. 21 Mamùu ajàŋ a kuꞌùnə̀ mə nɨ̀ meꞌe ŋgɔ̀ŋ ɨ̀nnǔ nsɨŋ tsɨ̀m bo bɨ̀ àbɨ̀ꞌɨntɨɨ̀ tsɨ̀mə̀. M̀fa ɨbɨɨnnû ghuu a mbo Nwì, m̀bii nɨghàà nìi mə a bè a mûm ǹtɨɨ bù aà, à nɨ nɨ̀nghàà ma nû nìi mbə nɨ nyweensə ghuu aà.

22 Nɨ̀ tsuu atu ɨbɨ̀ɨ nû ghuu kɨ bweꞌesə a ŋka nyuꞌutə nɨ̀ghàà nɨ Nwî tsiꞌì yùꞌùtə̀. A kuꞌunə mə tâ nɨ̀ ka mfaꞌa nɨ nu. 23 Ŋù yìi a yuꞌutə nɨghàà nɨ Nwî tsiꞌì yùꞌùtə̀ kaa ŋkɨꞌɨ̀ nɨ nu faꞌà aa, à bə aa tsiꞌì tsǒ ŋù yìi mə à lèntə nsî yi nɨ̂ ŋ̀kèꞌè, ǹyə ɨ̀bɨ̀ɨ nû yi. 24 A naŋsə nlii ɨbɨ̀ɨ nû yi wa aa, a lô ŋ̀ghɛɛ yi. Fɨ̀bàŋtə̀ tɨ tsyǎ a liꞌìnə̀ ŋ̀kɨrə̀ yì yâ. 25 Lâ ŋù yìi mə a naŋsə nlii bɨ̂nɔ̂ŋsə̀ bya bìi mə bɨ bɔŋ màŋsə̀, ŋ̀kɛtə nɨ mɨ̂ŋkɨ̀rə̀ mɨ atsaŋ a nu bə̀ aa, à bə tɛꞌɛ àtû yì nɨ bɨ̀nɔ̀ŋsə̀ ma bû, kaa waꞌà yuꞌutə̀ tsiꞌì yuꞌutə̀ m̀bu nlìꞌìnə̀, lâ m̀baŋnə nləə nɨ bɨ̀nɔ̀ŋsə̀ bya, ŋ̀ghɨrə nɨ̂ ɨnnù jìi mə bɨ swoŋ aa, boŋ Nwì à ka nɨŋ mbɔɔnə nɨ̂ ɨ̀nnù tsɨ̀m jìi mə a ghɨ̀rə̀ aà.

26 M̀bə ŋù à tswe a tɨtɨ̀ɨ bù yìi mə à wàꞌàtə mə yu tɨnsə amûm ànnù Nwî lâ kaa waꞌǎ ajàŋ yìi mə mbə yu tswâ àləə̀ yi zi, boŋ ànnù Nwî yi ya à nɨ tsiꞌì ànnǔ adàŋə̀ dàŋə̀. A kɨɨ̀ m̀bweꞌesə aa ɨbɨɨnû yì. 27 Ànnù yìi mə Taà Nwìŋgɔ̀ŋ a lɔ̀gə̀ tsiꞌì tsǒ ànnù Nwî yìi mə a naŋsə kùꞌùnə̀, kaa waꞌà nɨ̂ àlɔ̀ꞌɔ̀ tswê aa, a nɨ̂ ŋka nləŋtə bɔɔ bɨti nɨ bɨ̀kwìꞌì bɨ bâŋgyɛ̀ a mûm ŋ̀gɨꞌɨ bo. Ŋ̀kɨ mbə a ŋka mbɛ̂ ɨ̀bɨɨnû gho tâ m̀bi tsuu lǒ sɨ̀ŋ, ɨ ta ŋgɨꞌɨ a nu wò.