Bafut BaRoma 6

Àjàŋə mə bìꞌinə̀ kwo a nɨ̂ ɨ̀nnù jî bɨ mbaŋnə ntswe nɨ̂ ànnù yî mɔꞌɔ bìꞌinə̀ bɨ̀ Kristo aà

1 Lâ m̀bə bìꞌinə̀ tɨgə̀ ǹswoŋə aa mə akə aa ɛ? Mə tâ bìꞌinə̀ ghɛɛ nɨ̂ m̀bìì a ŋghɨ̀rə̂ ɨ̀nnù jî bɨ tǎ tâ ɨ̀bɔ̀ŋ Nwî ɨ̀ ka ŋghaꞌatə ŋghɛɛ aa ɛ? 2 Kaa mbə a waꞌǎ maa ajàŋ bə̂! M̀bə bìꞌinə̀ bìi mə bìꞌinə̀ lɛɛ̀ ŋ̀kwo a nɨ̂ ɨ̀nnù jî bɨ, m̀bə bìꞌinə̀ bû ŋ̀ka ntswe a nɨ mûm ɨ̀nnù jî bɨ aa mə akə aa ɛ? 3 Nɨ̀ sɨ̀ zi mə bìꞌinə̀ bɨ̀tsɨ̀m bìi mə bɨ lɛ mmurə yiꞌinə̀ a ŋkì nɨ̂ ɨ̀kùm Kristo Yesu aa bìꞌinə̀nɨ̀bò lɛ mbòònsə̀, bɨ kɨ̂ m̀murə yiꞌinə̀ aa a mûm nɨ̀wo yu aa ɛ? 4 Bɨ lɛ ntwiŋə yiꞌinə̀ aa twìŋ biꞌinə̀nɨ̀bo, a ajàŋ mə bɨ lɛ mmurə yiꞌinə̀ a ŋkì a mûm nɨ̀wo yu aà, tà àjàŋ mə mɨ̀dàꞌà mɨ nɨ̀ghaꞌa nɨ Nwîŋgɔ̀ŋ Tà nɨ lɛ nyweensə Kristo nɨ nɨ̀wo aa, tâ à ghɨrə bìꞌinə̀ tɨgə ntəə nɨ̂ àkòrə̀ nɨ zî yiꞌinə̀ a mûm ǹtswêntɨ̀ɨ̀ yî m̀fiì.

5 Ǹloŋ mə mbə bìꞌinə̀ bə ayoo yì fùùrə̀ biꞌinə̀nɨbò a mum nɨ̀wo yu, boŋ a laa mə bìꞌinə̀ ka yǐ kɨɨ bə ayoo yì fùùrə̀ biꞌinə̀nɨ̀bo tâ bɨ̀ kɨ nyweensə yiꞌinə̀ tsǒ yu. 6 Bìꞌinə̀ zi mə màrə̀ yìꞌinə̀ yî ǹlwèn wa bɨ lɛ ŋkwèèntə̀ a ati bàŋnə̀ bàŋnə̀ bo bɨ̀ Kristo mə bɨ ta ŋgɨꞌɨ a nɨ m̀bɨ̀ɨ̀nû ɨ̀bɨ̂ ya mə tâ bìꞌinə̀ tsuu ghɛ̀ɛ̀ nɨ̂ m̀bìì a mbə̂ ɨ̀bùꞌu ɨnnù jì bɨ̂. 7 Ǹloŋ mə yu wa yìi mə à kwò mə aa bɨ kɛ̀tə̀ mə̂ mɨ̂ŋkə̀rə̀ mɨ ɨnnù jì bɨ ghu nû. 8 M̀bə a bə yìi mə bìꞌinə̀ kwò mə̂ biꞌinə̀ bɨ̀ Kristo, boŋ bìꞌinə̀ bii mə bìꞌinə̀ ka yǐ kɨɨ tswe ntɨ̀ɨ̀ biꞌinə̀nɨbò. 9 Ǹloŋ mə bìꞌinə̀ zi mə Kristo yìi bɨ lɛɛ̀ ǹyweensə nɨ nɨ̀wo aa, kaa à ka yǐ waꞌà bù ŋ̀kwo. Kaa nɨ̀wo sɨ̀ nɨ̂ àdàꞌà yî tsu ghu nu bù ǹtswe. 10 Nɨ̀wo nya mə à lɛ ŋkwo aa, à lɛ ŋkwo aa a nɨ̂ ɨ̀nnù jî bɨ ŋ̀gàà yî m̀fùùrə̀. Lâ ǹtswêntɨ̀ɨ̀ yìi a tɨgə ntswe tsɨ̂tsɔ̀ŋə̀ aa a tswe aa a mbo Nwì. 11 Ma mùu ajàŋ tâ nɨ̀ kɨ nlɔgə ɨbɨɨnû ghuu mə nɨ̀ lɛɛ̀ ŋ̀kwo a nɨ ɨnnù jî bɨ̂ ǹtɨgə ŋkɨ ntswe ntɨ̀ɨ̀ aa a mbo Nwì a mum Kristo Yesu.

12 Ma mùu ajàŋ nɨ̀ tsuu màꞌàtə tâ ɨ̀nnù jî bɨ ɨ̀ ka mbuꞌutə njyǎnû yùù yìi ɨ̀ kwo aa ta kɨ ghɨrə mə nɨ̀ ka yuꞌunə bə̂ ɨ̀nnù jìi mə njyǎnu ɨ yə̀ꞌə̀tə̀ aà. 13 Nɨ̀ tsuu ɨdɨgə nû jùu jî tsǔ a mbô ɨ̀nnù jî bɨ lǒ màꞌàtə̀ tâ ɨ̀ tɨgə nlɔgə tsiꞌì tsǒ ǹjoo ɨfàꞌa abɨ̀ꞌɨntɨɨ̀. Nɨ̀ baŋnə mfa ɨbɨ̀ɨnû ghuu a mbo Nwì tsiꞌì tsǒ bə̀ bìi mə bɨ fìꞌìsə̀ mə̂ a mûm nɨ̀wo bɨ kuu a mûm ǹtswêntɨ̀ɨ̀, ŋ̀kɨ mfa ɨdɨgə nû juu a mbo Nwì tâ à lɔgə tsiꞌì tsǒ ǹjoo ɨfàꞌa ɨnnù jî tsìnə̀. 14 Ǹloŋ mə kaa mbə ɨnnù jî bɨ waꞌǎ nɨ mɨ̀dàꞌà a mbuꞌutə bù tswê tsǒ mə kaa nɨ̀ sɨ̀ aa a njiꞌi mɨkòrə nɔ̀ŋsə̀ tswe aà, nɨ̀ bàŋnə ntswe aa a mûm ɨ̀bɔ̀ŋ yìi Nwì a ghɨ̀rə a nu bù aà.

15 Bìꞌinə̀ aa tɨgə swoŋ mə akə aa ɛ? Bìꞌinə̀ aa kɨ ghɨ̀rə ɨnnù jî bɨ nloŋ mə bìꞌinə̀ sɨ̀ aa a njiꞌi mɨkòrə nɔ̀ŋsə̀ tswê m̀baŋnə ntswe aa a mûm ɨ̀bɔ̀ŋ yìi Nwì a ghɨ̀rə a nu bìꞌinə̀ aa ɛ? Kaa mbə a waꞌǎ maa ajàŋ bə̂. 16 Nɨ̀ sɨ̀ zi mə nɨ̀ bə fa ɨbɨɨnû ghuu a mbo ŋù tsiꞌì tsǒ ɨ̀bùꞌù jìi ɨ yuꞌunə aa boŋ nɨ̀ tɨgə mbə aa ɨ̀bùꞌù ŋû wa mə nɨ yuꞌunə aa ɛ? Kə̀ nɨ̀ fâ ɨ̀bɨɨnû ghuu a mbo ɨnnù jî bɨ ɨ ghɨrə̀ nɨ̀ kwokə̀, kə̀ nɨ̀ kɨ̂ m̀fa a mbo àyuꞌunə̀ a ghɨrə̀ ɨ̀nnû juu tsinə̀. 17 Lâ m̀bɨꞌɨkə a mbo Nwì ǹloŋ mə bù bìi mə à lɛ mbə noò mɔ̀ꞌɔ nɨ̀ bə ɨbùꞌu ɨnnù jì bɨ aa, nɨ̀ tɨ̀gə̂ ǹyuꞌunə nɨ̂ ɨ̀nnù jya jìi mə bɨ lɛ ndɨ̀ꞌɨ̀ a mbo bù aa nɨ̂ ǹtɨɨ̀ ghuu tsɨ̀mə̀ aà. 18 Maa ajàŋ, bɨ kɛ̀tə̀ mə̂ mɨ̂ŋkɨ̀rə̀ mɨ ɨnnù jî bɨ a nu bù, nɨ̀ tɨgə̀ m̀bə ɨbùꞌu ɨnnù jî tsìnə̀. 19 Mə ghàa a mbo bù aa nɨ mɨ̀ghàà mìi mə bə̌ ghàà aa, ǹloŋ aa àjàŋ yìi mə ǹjyǎnû yùù ɨ̀ bɔ̀rə aà. À lɛ mbə a noò mɔ̀ꞌɔ aa, nɨ̀ fâ ɨ̀bɨɨnû ghuu tsǒ ɨ̀bùꞌu ɨnnǔ nsɨŋ, ŋ̀ghɨrə nɨ̂ ɨ̀nnù jî bɨ ŋghɛ̀ɛ̀ naa nɨ̀ m̀bìì. Tsɨ̂tsɔ̀ŋ tâ nɨ̀ fa ɨbɨɨnû ghuu tsiꞌì tsǒ ɨ̀bùꞌu ɨnnù jî tsìnə̀ a tâ naŋsə bə bə̂ bɨ Nwî bìi bɨ ghɨ̀rə ɨnnù jìi ɨ tsinə aà.

20 Nòò wa mə nɨ̀ lɛ mbə ɨbùꞌu ɨnnù jî bɨ aa, kaa nɨ̀ lɛ ŋwaꞌǎ nɨ̂ ànnû tsu bu bɨ̀ ɨ̀nnù jî tsìnə̀ tswê. 21 Lâ àbìì yìi nɨ̀ lɛ ntswe nɨ yu à nɨ̂ àkə̀, mə nɨ̀ lɛ sɨ ghɨ̀rə ɨnnù jìi mə atû yuu a tɨgə ndɨrə ghu tsɨ̂tsɔ̀ŋə̀ aa ɛ? Ɨ̀nnù ma jya ɨ lwìꞌì aa a nɨ nɨ̀wô. 22 Lâ tsɨ̂tsɔ̀ŋ mə bɨ kɛ̀tə̀ mə̂ mɨŋkɨ̀rə̀ mɨ ɨnnù jî bɨ a nu bù nɨ̀ tɨgə̀ m̀bə ɨbùꞌù Nwî aa, àbìî yuu a bə mə nɨ ghɨ̀rə ɨnnù jìi ɨ tsinə aa a nsi miꞌi Nwì, ǹtɨgə ntswe nɨ̂ ǹtswêntɨ̀ɨ̀ yìi ɨ̀ lwìꞌi nɨ̂ŋkoŋ aà. 23 Ǹloŋ mə ɨ̀nnù jî bɨ ɨ tsɔꞌɔ ɨfaꞌâ yi aa nɨ̀ nɨ̀wò, lâ mɨ̀tə̀ŋnə̀ mɨ tɨ̂ ǹdùù mɨ Nwî mɨ bə ǹtswêntɨ̀ɨ̀ yìi ɨ̀ lwìꞌi nɨ̂ŋkoŋ a mum Kristo Yesu Mmàꞌàmbî yìꞌinə̀ aà.