10
1 Gu khuiinothek nane bumuiithek, gui bran shii ragia rey yi pha nyie khi-èrek ne gui lubu rog shii yang! Nyie khi-èrek ne ithek shii sia phi!
2 Gu ithek shii izai yao ithek ne Hamangkhung-aphuii shii iliing è sia; jishii ithek ro misia ne izai khani è asi ro.
3 Ithek ne Hamangkhung-aphuii rog shii branthek ne nyie khi-èrek ne ruii pha ji ne athieg pha rek srane, ji pha chiang shii, ithek ne awaithek lum ne lumuii rab ne; ji è ithek ne awaishii Hamangkhung-aphuii pha lumuii è giang ruii pha ji shii ne awaithek shii ne aphi.
4 Masi è Iphey yi srane jong muii, ji è hanyie magungde migi rek arone Hamangkhung-aphuii rog shii giang rey yi.
Giawo ne zab shii ro
5 Moses è hì zey pha ji ne Hamangkhung-aphuii rog shii giang ruii pha ji ne Iphey nuii pha ji è ro, “Hanyie magungde muyungthek ji nuii arone ai ne sieng ne rai phro.”
6 Jishii jigigam shii migi è Hamangkhung-aphuii rog shii giang ruii phro è yao pha ji ne hì ro: “Nane nawaishii asai rabo,” hamangkhung hàne hanyie dun pha lei? (Chiih-è Masi shii ne thazam hanyie è noh pha).
7 Din ne hì de nawaishii asai rabo, hanyie yi sohjambling bucho hà dun pha lei? (Chiih-è Masi shii iy dun pha ji è hanyie è hòi ne noh pha).
8 Nyie hì yao pha ji ne hì ro: “Hamangkhung-aphuii ro mua ne na moe shii nane na sem shii chiih-è na lubu shii um ro.” Jine gethek yua muii pha mua migi ji ro.
9 Gethek è Isu Ithong shii Hamangkhung-aphuii è iy pha ji è hòi phi rone migi rek arone nathek ne ragia rey phro.
10 Hì ne gethek ro migi è Hamangkhung-aphuii rog shii giang ruii phro; chiih-è gethek sem è yao arone gethek ne ragia rey phro.
11 Jigigam shii yao, “Hanyie magunde aishii migi rek arone azo ruii phro.”
12 Hì zabjia shii lua ne, nyieliieshii thiisa hàne Jewthek nane Gaibranthek shii yo oi rai phro; Hamangkhung-aphuii ne ò Ithong ro, chiih-è ai è hanyie aishii ho pha ji shii ne bajo khirzey phi ro.
13 Jigigam shii yao, “Hanyie magunde Ithong beng yi arone ai ne ragia rey phro.”
14 Jishii ithek è migi arek arone nyie khi-èrek ne aishii nong pha yao phlei? Chiih-è ithek mua anuii pha nyie khi-èrek ne migi rek mage phlei? Chiih-è ithek è mua ayoi ba arone nyie khi-èrek ne yoi mage phlei? Chiih-è mua ayao ba arone khi-èrek ne yoi mage phlei?
15 Chiih-è muaphothek shii athoh arone nyie khi-èrek ne mua thieg mage phlei? Jigigam shii yao, “Hanyie è Mua Wie yi ne wuii ruii pha muapho ne bajo wie ro!”
16 Jishii zab ne Mua Wie shii anuii ro. Aijaya è yao, “Ithong, hanyie è gethek ro mua shii migi rek phlei?”
17 Ji-è chiihphado, migi yi mua nuii pha ji è thog phro, chiih-è miyaogam yi Masi ro yua pha ji è thog phro.
18 Jishii gu sai: Ithek è mua ayoi pha ji ne izai bey? Um ithek è rek—jigigam shii yao:
“ithek è ro pha goh ne zab pha sohnyiak hà yoidun ro:
ithek ro miyaogamthek ne sohjong bsa hà thogdun ro.”
19 Din ne gu sai: Israel pha branthek ne agao chak bey? Moses awai ne igobi shii yao:
“Gune guro bran è miegriie yi pha gai jad shii ho;
gune guro branthek shii miegriie yi pha;
chiih-è bi-ìethek shii khoh ne
ithek shii lijieg yi pha ro.”
20 “Chiih-è Aijaya è lububo rek ne yao”
“Gune hanyie gu shii asow pho shii doh yi;
hanyie è gu shii asai pho shii gune aishii dong ruii phro.”
21 Jishii Israel pha chiang shii ai è yao, “Muyua anuii pho chiih-è wiangwe rek pho shii thawuii bo è yao ne zab pha inai gune wad phia ne rai.”