इब्रानिया दे ना चिठ्ठी
जानकारी
इब्रानिया दी चिठ्ठी सताव दे बकत मसीहियां जो प्रोत्साहित करणे तांई लिखी थी। ऐ यीशु मसीह दे पुरे प्रभुत्व कने शक्तिया पर ध्यान केन्द्रित करिके कितया है। परमेश्वरे भूतकाल च “केई बरी कने केई तरिक्यां ला” गल्लां कितियां, हुण सै सांझो ला अपणे पुत्र यीशु मसीह दे जरिये गल्ला करदा है, जड़ा की परमेश्वर कने उदे स्वाभाव दी “सटीक छाप” है, जड़ा ब्रम्हांड जो अपणे शब्दां दिया शक्तिया ला थमी रखदा है (अध्याय 1:1-3)। जड़े यीशु पर विश्वास करदे न, उना सारयां तांई यीशुऐ उद्धार दे कम्मे जो पूरा किता। (अध्याय 1:1-10:18) असां ऐसे महान उद्धार दा तिरस्कार करणे दी हिम्मत ना करन (अध्याय 2:3; 5:12-6:20; 10:19-39)। बल्कि साड़े भरोसे च कने रोजे दिया जिन्दगिया च, सांझो मसीह दा कने उना दा जड़े भरोसे दे आदरणीय प्रेरणा दे स्त्रोत न, उना जो मनणा चाईदा। (अध्याय 11-13) ऐ चिठ्ठी, जिसा दा लेखक पता नी है, ई स 60 से 70 के बिच लिखयो है।
रूप रेखा
परमेश्वरे दे पुत्रे दी महानता 1:1-4
यीशु स्वर्गदूतां ला बदीकरी है 1:5-2:18
यीशु मूसा कने यहोशू ला बदीकरी है 3:1-4:13
यीशु महान महायाजक है 4:14-7:28
यीशुऐ इक बेहतर समझौता किता 8:1-9:22
यीशु का बलिदान इक बरी कने सारयां तांई है 9:23-10:31
परमेश्वरे दे कुछ लोक जिना दा बड़ा भरोसा था 11:1-40
यीशु दे उदाहरण दा अनुसरण करा 12:1-13:19
आखरी प्रार्थना कने अभिवादन 13:20-25
1
पुत्रे दे सभाब
1 परमेश्वरे पराणे जमाने च परमेश्वरे दे संदेश देणेबालयां दे जरिये बड़ी बरी बड़े तरिक्यां ला साड़े पूर्वजां सोगी गल्लां कितियां,
2 पर इना आखरी रोजां च परमेश्वरे साड़े सोगी अपणे पुत्रे जरिये गल्लां कितियां। परमेश्वरे अपणे पुत्रे जरिये सारियां चीजां जो बणाया कने उसयो सारे संसारे दा बारिस बणाया।
3 पुत्र ही परमेश्वरे दी महिमा दी लौ, कने बिलकुल उदे सांई ही है, कने अपणे शक्तिशाली बचना ला सारे संसारे जो चलादां है। उनी लोकां जो उना दे पापां ला शुद्ध किता, कने इदे बाद स्वर्गे च महिमामय परमेश्वरे दे सजे पासे जाई बैठा।
4 इस तांई परमेश्वरे अपणे पुत्रे जो ऐसा ना दिता जड़ा स्वर्गदूतां ला जादा महान है, इसला सांझो पता चलदा है की पुत्र उना ला कितणा जादा महान है।
यीशु स्वर्गदूतां ला महान है
5 क्योंकि पबित्र शास्त्र च ऐ कुथु भी नी लिखया है की परमेश्वरे अपणे कुसी स्वर्गदूते ला ऐसा कदी नी बोलया जड़ा उनी अपणे पुत्रे ने बोलया, “तू मेरा पुत्र है; अज मैं घोषणा करदा है की तू मेरा पुत्र है।” कने उनी फिरी कदी भी कुसी स्वर्गदूते ने ऐ नी बोलया की, “मैं तेरा पिता होणा, कने तू मेरा पुत्र होणा।”
6 परमेश्वरे अपणे बड़े महान पुत्रे जो संसारे च भेजणे ला पेहले बोलया की, “उदे सारे स्वर्गदूत उसयो अराधना करन।”
7 कने स्वर्गदूतां दे बारे च ऐ बोलदा है, “परमेश्वर अपणे स्वर्गदूतां जो होआ सांई बणादां है, कने अपणे सेवकां जो बलदी अग्गी सांई बणांदा है।”
8 पर पुत्रे दे बारे च बोलदा है, “हे परमेश्वर तेरा राज युगां-युंगा दीकर बणी रेणा तू लोकां पर न्याय ला राज करणा।
9 तू भले कम्मा ला प्यार कने पाप दे कम्मा ला दुश्मणी रखी; इसी तांई तुहाड़े परमेश्वरे, तेरे साथियां बीचे ला तुहांजो चुणया, कने बड़िया खुशिया ला उना ला लग करिरी नियुक्त कितया।”
10 पबित्र शास्त्र ऐ भी बोलदा है की, “शुरुआत च तू धरती जो बणाया, कने तू सै सब कुछ भी बणाया जड़ा अम्बरे च है।
11 इना तां सारयां खत्म होई जाणा; पर तू युगां-युगां दीकर बणी रेणा; कने उना सारयां कपड़यां सांई पुराणे होई जाणा।
12 कने तू उना जो चादरा सांई बटोलणा, कने उना जो कपड़यां सांई बदलणा: पर तू हमेशा इकोदिया रेणा कने तू हमेशा जिन्दा रेणा।”
13 कने परमेश्वरे कदी कुसी स्वर्गदूते जो ऐसा नी बोलया, “जालू दीकर मैं तेरे सारे दुश्मणा जो हराई ना दे, तालू दीकर तू मेरे सजे पासे बैठी रे कने इज्जत ले।”
14 तां स्वर्गदूतां दा क्या कम्म है? सै सिर्फ परमेश्वरे दे सेवक न, कने परमेश्वर उना जो उना लोकां दी देखभाल करणे तांई भेजदा है, जिना दा उद्धार होणा है।