Ⅰ Lɛ an wa gar sɩ a sɩ faa tɩ jãnɛ a be Atensɩ tẽe pɔ. Ⅱ Sɩ tʊ̃n a sɩ yɛbɛ Timoti mɩ na ɩ a Nãaŋmɩn tʊ̃tʊ̃nɔ̃ ãsʊɔ na wʊ mʊɔlɔ a Yesu Kɩrɩsɩto 'yɛr nʊ̃ɔ ɩka wʊ tɩ 'yɔ̃ɔ yɩ ãkpɛ̃ɔ a yɩ sɔɔfʊ pɔ, Ⅲ a lɛ ka yɩ taa wa joro dãbãɛ nɩ a bɛɛr kaa nyã pɔ ɛ. Yɩn mãɛ jaa bɔ̃ɔn naa ɩka a dɔɔyɛ nyã lɛ sɩn di. Ⅳ Yelmãɛ, sɩn dɔ̃ɔ be a yɩ sɛ̃, lɛ lɛ sɩ 'yɛrɛ kʊrɔ yɩ ɩka sɩn din dɔɔyɛ. Ka a lɛ mɩ ɩ. Ⅴ A lɛ jũu, ɩn kʊ̃ lɛ tʊ̃ɔ lɛ so, ka tʊ̃ nɩrɛ ɩka wʊ tɩ kaa a lɛ a yɩ sɔɔfʊ na be, n dabãɛ lɛ ɩka a bɛɛr kaa wʊ taa bɛɛr yɩ kaa, kaa sɩ tʊ̃mɔ̃ ɩ pɔrɔ ɛ.

Ⅵ Tɩchɛ Timoti yin a yɩ sɛ̃ wa 'yɛr a 'yɛr nʊ̃ɔ kʊ sɩ, a lɛ yɩn tara a sɔɔfʊ nɩ a nʊ̃fʊ. Wʊ 'yɛr kʊ sɩ ɩka yɩ ma tara sɩn nɩ tɩɛr vɩla sɔ̃ɔ jaa na yɩ ma bʊɔrɔ ɩka yɩ nyɛ sɩ nɩtãa lɛ sɩn mɩ na ma bʊɔrɔ ɩka sɩ nyɛ yɩ. Ⅶ N yɛɛr, a lɛ jũu, a pʊsɔ̃ɔ nɩ a bɛɛr kaa anyã pɔ, yɩ 'yɔ̃ɔ sɩn ãkpɛ̃ɔ tun a yɩ sɔɔfʊ pɔ yɩn tara jũu. Ⅷ Bojũu pʊ̃pãanyã, sɩ pãa na ben be yɩn ara kpɛ̃ɔ kʊ a sɩ Soro. Ⅸ Ŋmɩnɛ lɛ sɩn ɩrɛ wa puor Nãaŋmɩn yãan ka a sɛɛ, a pʊpɛl nyã sɩn nyɛ a Nãaŋmɩn sɛ̃? Ⅹ Tãsɔɔ nɩ mɔ̃tɔ̃ɔ jaa lɛ sɩ ma sʊɔrɔ Nãaŋmɩn ɩka sɩ lɛ nyɛ yɩ go, na sɩ lɛ chɔɔr bon 'lɔ jaa na ba pʊɔ a yɩ sɔɔfʊ pɔ ɛ.

Ⅺ Pʊ̃pãanyã, sɩ sʊɔrɔ naa a sɩ Sãa Nãaŋmɩn mãɛ nɩ a sɩ Soro Yesu ɩka, ba yuo sɔr ka sɩ lɛ wa nyɛ yɩ. Ⅻ A sɩ Soro wʊ vɛ̃ ka yɩ waa na yɩ nʊ̃nɔ̃ taa, tɩ na yɩ nʊ̃ nɩrɛ jaa nɩtãa lɛ sɩn nʊ̃ yɩ. ⅩⅢ Wʊ vɛ̃ ka yɩ ɩ nɩsʊ̃n na yɩ taa tara dɛɛr jaa a sɩ Sãa Nãaŋmɩn sɛ̃ ɛ, tɩ tãn a sɔ̃ɔ 'lɔ a sɩ Soro Yesu Kɩrɩsɩto nɩ na waan a Nãaŋmɩn nɩbɛ.