148
Aiqama innaarunaindaraa ainaina faqa maqasaaqaraa ainaina faqa Anutuna amooqidaqa.
1 Yaaweena amooqia.
Innaarunai mirinni mariasa Yaaweena amooqiaqa.
2 Mina aiqama qangeeroouqa mina innaarunaindaraa rakira fasiqauqa mina amooqiaqa.
3 Innee suani faqa quqoona faqa aiqama fasau firaaqoo kaaqa qeemariasa faqa aiqama mina amooqiaqa.
4 Innaaruna meerai uqanna marianafa anee faqa Yaaweena amooqia.
Innee mirinni innaarunai maria nammarisa innee faqa mina kai amooqiaqa.
5 Misa aiqamausa Yaaweena amooqiaqanani.
Mifa qufaqa misa kambiqaqau.
6 Mina ufannoo misa kambiqafi nariqa mariaqoo naaru naaru maridaqa sia amana Yaaweena ufa rukieefaranoo.
7-8 Maqasaaqaraa ainainauqa faqa ooruku nammariki maria firaa aandausa faqa nammari ameemaanai mariasa faqa aakuasaa faqa pupusamu faqa qaisa faqa oonnamu faqa afeeka ufai Yaaweena naakapara ufa mau fimari ufaifa faqa innee aiqamausa Yaaweena amooqiaqa.
9-10 Innee aaqanauqa faqa amuaqu namuqa faqa qaqama iree maria saqarisa faqa aiqama nandauqa faqa aiqama aandau maaqeena faqa kaasau faqa nimuaqundari nimariasa faqa qaqamaree nimaria ufinisa faqa innee aiqama mina amooqima amaqaaqa.
11-12 Aiqama maqasaaqaraa karaambaiqauqa faqa aiqama maqannaasa faqa uriqararausa faiqi namu faqa aiqama maqannaa rakisirausa faqa kumaaraauqa faqa maanaaqauqa faqa asooqa fasiqa anaasee faqa faiqi uqaindi faqa innee aiqamausa Yaaweena amooqiaqa.
13 Misa aiqama misoo maasoo Yaaweena auqu amooqiaqa. Mina auqu fannoo aiqamausa nuqu uriqararafa maridanoo.
Mina areenarafa maa maqa maaqana faqa innaaruna faqa urinaaqaranoo maridanoo.
14 Mifa Yaaweefa narí maqannaasa afeekaikamma nisaifaqa mina faiqi anaasee mina amooqiaqeera.
Isaraee maqannaasa mina afaaqasaa aqoondiuqa maridaqa mina amooqidaqa.
Yaaweena amooqia.