Tai Dam 1 Cô‑ꞌlin‑ꞌthô 5

ꞌMí ꞌcốn ꞌdệt phít ꞌviạk ꞌnhính ꞌchái

1 ꞌMí kháo tiếng pay ꞌtua ꞌchu bón#ꞌva, cuông ꞌpứng ꞌpi ꞌnọng ꞌmí ꞌcốn ꞌdệt phít ꞌviạk ꞌnhính ꞌchái ꞌnéo nái#ươn, ta#ꞌva ꞌpứng ꞌcốn báu#ꞌhụ nể dăm Chảu Pua ꞌPhạ ꞌnặn ꞌcọ báu#ꞌkhới ꞌmí ꞌsướng#ꞌnặn. ꞌMí phủ#ꞌnưng đảy au ꞌếm ꞌnạ ꞌmá pên#ꞌmía. 2 Pên ꞌcợn ꞌpi ꞌnọng ꞌnhắng cảo nháư pháư sung máư#a. ꞌPi ꞌnọng ꞌchọ ꞌvuốn#chaư, ꞌchọ sắp phủ ꞌdệt phít ꞌnéo ꞌnặn ók sia ꞌsúm ꞌhốm#chảu. 3 ꞌChăm#ꞌva khỏi đảy dú đắc#háng, hák#ꞌva chaư khỏi đảy dú ꞌtoi ꞌpi#ꞌnọng. Khỏi chắng đảy au ꞌchư siêng ꞌGiê‑ꞌsu phủ pên Chảu Chom ꞌmá cáo ꞌtội sáư phủ ꞌdệt phít ꞌnặn#ꞌlẹo, ꞌsướng đảy dú ꞌtoi ꞌpi ꞌnọng ꞌnặn#lo. 4 ꞌChớ đaư ꞌpi ꞌnọng ꞌmá ꞌsúm#căn, chaư khỏi dú#ꞌtoi, ꞌlẹo ꞌcọ ꞌmí phép ꞌquiến ꞌGiê‑ꞌsu phủ pên Chảu Chom ꞌsúm#ꞌháu, 5 cuông ꞌchớ ꞌnặn chắng dao phủ ꞌnặn hảư phi ꞌSa‑tan ꞌdệt hảư ꞌmo ꞌkính ꞌmắn tai#sia, thả ꞌmự Chảu ꞌGiê‑ꞌsu táo ꞌlống#ꞌmá, ꞌminh khuôn ꞌmắn chắng ꞌchí khói sia báp#ꞌsội. 6 ꞌViạk ꞌpi ꞌnọng cáo ảng ꞌnặn báu#ꞌmí săng#đi. ꞌPi ꞌnọng ꞌcọ ꞌchí ꞌhụ#ꞌlẹo, ꞌchựa pẻng ꞌnọi#ꞌnưng au ꞌnuột sáư ꞌbột ꞌcọ bông khửn ꞌtếng#cỏn. 7 ꞌPi ꞌnọng ꞌchọ au ꞌchựa pẻng cáu ꞌnặn ók#sia,* hảư ꞌnhắng ꞌto ꞌbột máư báu#ꞌmí ꞌchựa#pẻng. ꞌMen ꞌtẹ ꞌpi ꞌnọng đảy pên ꞌcốn ꞌpẹk saư#ꞌlẹo, ꞌpưa#ꞌva Chảu ꞌKha‑ꞌlịt đảy tai tang ꞌháu#ꞌlẹo, ꞌsướng ꞌhịt ꞌkhóng ꞌcốn ꞌDiu khả ꞌdo vảy ꞌsớ Chảu Pua ꞌPhạ cuông ꞌmự ꞌVện#cai. 8 ꞌSướng ꞌnặn ꞌháu ꞌchọ kin dú ꞌluống ꞌpẹk saư ꞌsướng ꞌcốn ꞌDiu kin ꞌtiệc béng báu#sáư ꞌchựa#pẻng, ꞌháu báu#ꞌchọ ꞌdệt ꞌnéo ác#ꞌhại, hảư ꞌmí chaư ꞌsư kin dú ꞌtoi ꞌluống ꞌtáng ꞌmen#ꞌtẹ.

9 ꞌMưa cón khỏi đảy tẻm sư ꞌmá ha ꞌpi#ꞌnọng, khỏi bók#ꞌva, ꞌnhá pay ha ꞌmá sú cắp ꞌcốn ꞌdệt phít ꞌviạk ꞌnhính#ꞌchái. 10 Khỏi báu#đảy mai ꞌhọt ꞌcốn ꞌmướng ꞌlum phủ ꞌdệt phít ꞌviạk ꞌnhính#ꞌchái, phủ pháư au khong#sáu, phủ ꞌcột#chan, ꞌhứ#ꞌva phủ vảy ꞌsớ ꞌthớn théng pom cá#đaư. ꞌVa ꞌchí ník sia ꞌpứng ꞌcốn ꞌnéo ꞌnặn đảy#mết, ꞌpi ꞌnọng ꞌcọ ꞌchọ ók ꞌpai sia phén đin ꞌmướng ꞌlum#ꞌnị. 11 ꞌKhạy khỏi tẻm sư ꞌmá bók ꞌpi#ꞌnọng, ꞌva phủ đaư ꞌhiạk pên ꞌpi ꞌnọng cuông ꞌhôm ꞌngáu Chảu ꞌGiê‑ꞌsu, hák ꞌnhắng ꞌdệt phít ꞌviạk ꞌnhính#ꞌchái, pháư au khong#sáu, vảy ꞌsớ ꞌthớn théng#pom, ꞌvạu uối#sáu, ꞌmáu#lảu, ꞌhứ#ꞌva pên ꞌcốn ꞌcột#chan, ꞌnhá đảy pay ꞌmá ha sú cắp ꞌpứng ꞌcốn#ꞌnị, kin khảu ꞌcọ ꞌnhá ꞌho ꞌpán#sau. 12-13 Báu#ꞌmen khỏi ꞌchí sét ꞌván ꞌcốn ꞌtáng ꞌnọk cá#đaư, Chảu Pua ꞌPhạ hák ꞌchí sét ꞌván sau#ꞌló. ꞌPi ꞌnọng ꞌchọ sét ꞌván ꞌpứng ꞌcốn cuông ꞌsúm ꞌhốm#chảu. ꞌSướng ꞌnặn hảư sắp ꞌcốn ꞌhại uối ꞌdệt phít ꞌviạk ꞌnhính ꞌchái ꞌnặn ók sia cuông mốt#chảu.

* 5:7 Mai bók hảư ꞌhụ#ꞌva, ꞌnọi ꞌcốn ꞌdệt ꞌnéo báp#ꞌsội, ꞌviạk ꞌnặn ꞌcọ ꞌchí ꞌpe quảng#ók.