Tai Dam Ê‑ꞌphê‑ꞌsô 4

Hảư pên ꞌnặm ꞌnưng chaư điêu

1 ꞌSướng#ꞌnặn, khỏi ꞌchọ khảu ꞌtú ꞌpộ ꞌkhớng nả ꞌviạk ꞌGiê‑ꞌsu phủ pên Chảu#Chom, chắng so ꞌpi ꞌnọng kin dú ꞌluống đi sôm đáng pên ꞌcốn ꞌTan chảu ꞌhiạk#au. 2 Hảư huốn chaư ꞌlống ón van ꞌlớng#ꞌlớng, ꞌmí chaư ứt#dón, ꞌmí chaư ꞌhặc ứt dón ha#căn. 3 Hảư cứ chaư mẳn kin dú ꞌmen#căn ꞌtoi Chảu Khuôn Saư phớng ꞌdứa hảư, ꞌpưa ꞌpi ꞌnọng chắng ꞌchí pên ꞌnặm#ꞌnưng chaư điêu tó#pay. 4 ꞌSúm ꞌháu pên ꞌsướng ꞌmo ꞌkính#điêu, ꞌmí Chảu Khuôn Saư phủ#điêu, Chảu Pua ꞌPhạ ꞌhiạk au ꞌháu ꞌmá ꞌnặn ꞌpưa ꞌchí đảy ꞌnéo mong ꞌcóng thả ꞌsướng#điêu. 5 ꞌMí ꞌGiê‑ꞌsu phủ điêu pên Chảu#Chom, ꞌmí chaư ꞌchưa#điêu, đảy ꞌdệt ꞌhịt bắp‑ti‑sa‑ꞌma điêu. 6 ꞌMí Chảu Pua ꞌPhạ phủ điêu pên ꞌPo ꞌháu ꞌtếng#cá, ꞌTan chảu pên cốc téng đa ꞌháu ꞌtếng#cá, ꞌpá ꞌháu ꞌtếng#cá ꞌdệt ꞌnéo#đi, ꞌlẹo ꞌcọ dú cắp ꞌnặp pheng ꞌháu ꞌtếng#cá.

7 Chảu ꞌKha‑ꞌlịt ꞌmí công ꞌphún phớng ꞌdứa hảư ꞌsúm ꞌháu mỏi ꞌcốn ꞌtoi chaư ꞌTan chảu béng#hảư. 8 ꞌSướng ꞌnặn chắng ꞌmí ꞌquám ꞌchiến ꞌvạy#ꞌva:

ꞌMưa ꞌchớ ꞌTan chảu đảy khửn ꞌmứa sú bôn sung

ꞌTan chảu ꞌcọ pắt au ꞌpứng phủ pên ꞌtú pay ꞌtoi

ꞌLẹo ꞌcọ phớng ꞌdứa ꞌnéo đi hảư ꞌcốn.

9 Ăn ꞌva Chảu ꞌKha‑ꞌlịt đảy khửn ꞌmứa sú bôn sung#ꞌnặn, ꞌcọ mai#ꞌva ꞌTan chảu đảy ꞌlống ꞌmá bón tắm ꞌsướng ꞌmướng ꞌlum ꞌnị cón#ꞌlẹo. 10 Phủ đảy ꞌlống ꞌmá ꞌmướng ꞌlum ꞌnị ꞌcọ ꞌmen phủ điêu phủ đảy khửn ꞌmứa sú bón sung sút ꞌphạ ꞌnặn#lo, ꞌpưa hảư ꞌmí phép ꞌquiến dú ꞌtua ꞌchu bón ꞌchu#ꞌti. 11 ꞌMen Chảu ꞌKha‑ꞌlịt pên phủ téng hảư ꞌsán ꞌcốn pên ꞌlam ꞌchạư páo kháo ꞌTan#chảu, ꞌsán ꞌcốn pên ꞌlam páo ꞌquám Chảu Pua#ꞌPhạ, ꞌsán ꞌcốn pên phủ páo kháo ꞌhung saư Chảu ꞌKha‑ꞌlịt, ꞌlẹo hảư ꞌsán ꞌcốn pên phủ ꞌlăm đu bớng ꞌdéng ꞌsúm ꞌhốm ꞌTan#chảu, phủ pên ꞌsáy bók son ꞌquám ꞌTan#chảu, 12 ꞌpưa hảư sau ꞌchoi dên ꞌpay Chảu Pua ꞌPhạ ꞌhụ ꞌkhớng nả ꞌviạk ꞌTan#chảu, ꞌpưa tủm ꞌpúa ꞌsúm ꞌhốm Chảu ꞌKha‑ꞌlịt, 13 ꞌtạu ꞌhọt ꞌchớ đaư ꞌháu ꞌtếng#cá chắng ꞌchí pên ꞌnặm#ꞌnưng chaư điêu ꞌchưa Chảu ꞌGiê‑ꞌsu phủ pên ꞌLụk Chảu Pua#ꞌPhạ, kéng ꞌchí ꞌhụ ꞌTan chảu#đi, hảư pên phủ nháư chaư#mẳn, ꞌmí ꞌnặm mốc ꞌnặm chaư ꞌsướng Chảu ꞌKha‑ꞌlịt mết ꞌchu#ꞌnéo. 14 ꞌLẹo ꞌsúm ꞌháu ꞌcọ ꞌchí báu#pên ꞌsướng đếc ꞌnọi lông ꞌphắng ꞌquám ꞌcốn ꞌcột chan bók son ꞌchu#ꞌnéo, ꞌchí báu#lông ꞌphắng ꞌquám sau bẻo ꞌlứa pay ꞌtáng#phít, ꞌsướng ꞌlốm ꞌpặt ꞌphóng ꞌnặm ꞌdệt hảư ꞌhứa ꞌpặt pay ꞌpặt#ꞌmá. 15 Hảư ꞌháu au ꞌquám ꞌhặc ꞌvạu ꞌsư tó#căn, ꞌpưa hảư ꞌsúm ꞌháu nháư mả khửn ꞌchu#ꞌnéo, chắng ꞌchí pên ꞌsướng Chảu ꞌKha‑ꞌlịt phủ pên cốc#ꞌháu. 16 ꞌTan chảu hảư ꞌsúm ꞌháu pên ꞌsướng ꞌmo ꞌkính điêu ꞌmí lai#ꞌphớn, ꞌphớn đaư ꞌcọ tủm ꞌpúa ꞌmo#ꞌkính. ꞌSướng ꞌnặn ꞌphớn đaư ꞌcọ ꞌdệt ꞌviạk phaư#ꞌmắn, ꞌsúm ꞌhốm chắng ꞌchí nháư mả#khửn, ꞌmí chaư ꞌhặc tủm ꞌpúa#căn.

ꞌChua ꞌlới máư dú ꞌhôm ꞌngáu Chảu ꞌKha‑ꞌlịt

17 ꞌSướng ꞌnặn khỏi au phép ꞌquiến ꞌGiê‑ꞌsu phủ pên Chảu Chom tơn ꞌpi#ꞌnọng, ꞌnhá kin dú ꞌsướng ꞌcốn báu#ꞌhụ nể dăm Chảu Pua ꞌPhạ#ꞌtọn, chaư sau ngắm ꞌnéo báu#ꞌmí lởi#săng. 18 Chaư sau ꞌmựt#ꞌmúa, ꞌlẹo ꞌcọ báu#ꞌmí ꞌphớn đảy ꞌchua ꞌlới máư nẳng Chảu Pua#ꞌPhạ, ꞌpộ chaư sau ké ꞌngán hua kheng chắng báu#ꞌhụ ꞌluống ꞌtáng ꞌTan#chảu. 19 Sau báu#ꞌhụ nả#ꞌhại, ꞌmặc ꞌdệt ꞌto ꞌnéo nái#ươn, ꞌdệt uối ꞌhại ꞌchu ꞌnéo báu#ꞌhụ#thôi.

20 Hák ꞌva ꞌpi ꞌnọng ꞌló báu#đảy ép ꞌhụ ꞌluống ꞌtáng Chảu ꞌKha‑ꞌlịt ꞌnéo ꞌnặn cá#đaư. 21 ꞌPi ꞌnọng đảy ꞌnghín ꞌviạk Chảu ꞌGiê‑ꞌsu ꞌlẹo, cuông ꞌchớ ꞌmá pên ꞌcốn ꞌTan#chảu, ꞌpi ꞌnọng ꞌcọ đảy ép ꞌmá ꞌtoi ꞌluống ꞌtáng ꞌmen ꞌtẹ cuông ꞌhôm ꞌngáu ꞌTan#chảu. 22 ꞌPi ꞌnọng hảư ꞌváng sia ꞌluống ꞌtáng ꞌlớng đảy kin dú ꞌtoi chaư#cáu, ăn ꞌpá hảư ꞌpi ꞌnọng lông pay sú ꞌluống ꞌtáng đắp#siêu. 23 Hảư piến chaư cáu au chaư#máư. 24 Hảư pên ꞌcốn#máư, ꞌnéo Chảu Pua ꞌPhạ ꞌdệt hảư pên ꞌsướng ꞌTan#chảu, ꞌtoi ꞌnéo đi ꞌmí ꞌmen ꞌpẹk saư#ꞌtẹ.

25 ꞌSướng ꞌnặn ꞌpi ꞌnọng ꞌnhá đảy ꞌvạu bẻo#ꞌtọn, ꞌchu ꞌcốn hảư ꞌvạu ꞌsư cắp ꞌpi ꞌnọng phủ ꞌchưa Chảu ꞌGiê‑ꞌsu, ꞌpưa#ꞌva ꞌsúm ꞌháu pên ꞌsướng ꞌmo ꞌkính#điêu. 26 ꞌVa ꞌpi ꞌnọng hák pút#nhay, ꞌnhá đảy ꞌdệt ꞌnéo báp#ꞌsội, ꞌnhá chaư ꞌhại mết#ꞌmự. 27 ꞌNhá hảư tô cốc phi ꞌhại ꞌmí ꞌluống ꞌtáng bẻo#ꞌlứa.

28 Phủ đaư ꞌkhới ꞌlặc ꞌlếm ꞌcọ ꞌnhá ꞌlặc#ꞌtọn. Hảư sắc mắn ꞌdệt ꞌdượn kin dú ꞌtoi ꞌluống#đi, chắng ꞌchí ꞌmí ꞌluống ꞌchoi phủ ꞌcặt#khó. 29 ꞌNhá ꞌvạu ꞌquám uối hảư#căn, hảư ꞌvạu ꞌto ꞌnéo đi tủm ꞌpúa báu#ꞌpó ꞌnéo#đaư ꞌpưa ꞌmí lởi hảư phủ#ꞌphắng. 30 Chảu Khuôn Saư khong Chảu Pua ꞌPhạ ꞌmá mai au ꞌpi ꞌnọng ꞌvạy ꞌhọt ꞌmự ꞌTan chảu ꞌchí tháy au ꞌháu đảy ók khói sia báp#ꞌsội, ꞌsướng ꞌnặn ꞌnhá ꞌdệt hảư Chảu Khuôn Saư ꞌtộc#khôm. 31 Chaư#khôm, pút#nhay, khả hua#căn, ꞌvạu uối#căn, ngắm ꞌdệt ác ꞌdệt ꞌhại hảư#căn, ꞌpứng khu ꞌnị hảư ꞌváng sia#mết. 32 Hảư ín đu phớng ꞌdứa au#căn, dáng ꞌdóm ꞌquám phít hảư#căn, ꞌsướng Chảu Pua ꞌPhạ đảy dáng ꞌdóm báp ꞌsội hảư ꞌháu dú cuông ꞌhôm ꞌngáu Chảu ꞌKha‑ꞌlịt.