Tai Dam ꞌMa‑ꞌla‑cô 13

Nả ꞌviạk ꞌchí pên ók ꞌmá hảư hên

1 ꞌMưa Chảu ꞌGiê‑ꞌsu đang ók ꞌcuông ꞌhướn vảy ꞌsớ Chảu Pua ꞌPhạ#pay, mốt ꞌcốn ꞌtoi ꞌtáng ꞌTan chảu ꞌmí phủ#ꞌnưng ꞌvạu cắp ꞌTan chảu#ꞌva, “ꞌSáy ꞌpo#ꞌhới, ꞌsáy ꞌpo bớng ꞌhướn cắp tón đán ꞌnị chắng ꞌmá ꞌchăn ꞌcợn#ꞌlế.”

2 ꞌTan chảu tóp phủ ꞌnặn#ꞌva, “ꞌNọng hên ꞌhướn lang nháư cắp tón đán ꞌchốn căn dú ꞌnị ꞌchí ꞌchọ lắng ꞌlống#mết, báu#ꞌnhắng lưa sắc#tón.”

3 Chảu ꞌGiê‑ꞌsu khửn ꞌmứa ꞌnăng dú ꞌtếng ꞌpú Ê‑ꞌlai‑ôn phák ꞌtáng nả ꞌhướn vảy ꞌsớ#ꞌnặn. ꞌTan Pê‑tô, ꞌtan Da‑cô‑bô, ꞌtan Dô‑ꞌhăn, cắp ꞌtan Ăn‑đê‑a hák au căn tham Chảu ꞌGiê‑ꞌsu ꞌva, 4 “So ꞌsáy ꞌpo bók hảư ꞌsúm khỏi ꞌhụ#đé, ꞌpứng ꞌviạk ꞌvạu ꞌnặn ꞌchí pên ók ꞌchớ#đaư? ꞌChí ꞌmí mai lák ꞌsướng đaư ꞌchị bók hảư ꞌhụ#ꞌva ꞌchớ ꞌnặn đảy ꞌmá ꞌhọt#ꞌlẹo, ꞌpưa ꞌpứng ꞌviạk ꞌnặn ꞌchí ꞌchọ pên#ók?”

5 Chảu ꞌGiê‑ꞌsu chắng bók hảư sau ꞌhụ#ꞌva: “ꞌChự hiêm hảư#đi, ꞌnhá đảy tốc ꞌquám bẻo ꞌlứa phủ#đaư. 6 ꞌChí ꞌmí lai ꞌcốn au ꞌchư siêng ꞌháu ꞌmá ảng#ꞌva ꞌmen Chảu ꞌKha‑ꞌlịt, ꞌlẹo ꞌchí bẻo ꞌlứa hảư lai ꞌcốn lông ꞌtoi ꞌtáng#phít.

7 ꞌLẹo ꞌchớ đaư đảy ꞌnghín#ꞌva ꞌmí#sớc, ꞌhứ#ꞌva đảy ꞌnghín kháo ꞌhọt sớc sưa nưa#tảư, ꞌnhá dản cua#săng. Nả ꞌviạk ꞌnặn ꞌchí ꞌchọ đảy pên ók#cón, hák ꞌcọ ꞌnhắng báu#ꞌhế ꞌhọt ꞌmự lả sút cá#đaư. 8 ꞌChí ꞌmí ꞌphắn ꞌcốn ꞌnị ꞌdệt sớc cắp ꞌphắn ꞌcốn#ꞌnặn, ꞌcốn ꞌmướng tảư ꞌchí ꞌdệt sớc cắp ꞌcốn ꞌmướng#nưa, đin ꞌchí nưng bón ꞌnị ꞌchí vay bón#ꞌnáư, ꞌchí ꞌmí ꞌviạk ứt#dák. ꞌPứng nả ꞌviạk ꞌnị pên ꞌsướng tẳng cốc chếp ꞌchí ók ꞌlụk ꞌnặn#lo.

9 ꞌPứng ꞌnọng ꞌchự hiêm hảư#đi, sáu ꞌchí pắt ꞌpứng ꞌnọng pay tó nả mốt ꞌcốn sét#ꞌván, ꞌchí thứk ꞌtặp nẳng ꞌhướn#ꞌsúm. ꞌPứng ꞌnọng ꞌchí ꞌchọ sáu sét ꞌván tó nả pua kéng quan tỉnh ꞌpưa#ꞌháu, ꞌlẹo ꞌcọ ꞌchí đảy pên chứng ꞌviạk ꞌháu hảư sau#ꞌhụ. 10 Kháo ꞌhung saư ꞌviạk ꞌháu ꞌchọ páo ꞌtua ꞌchu ꞌphắn ꞌcốn cón ꞌmự lả#sút. 11 ꞌSướng ꞌnặn ꞌchớ đaư sáu pắt au ꞌpứng ꞌnọng pay tính pay ta#ꞌnặn, ꞌnhá ngắm lo săng cón ꞌchí kẻ ꞌquám#đaư. Cuông ꞌchớ ta ꞌviạk#ꞌnặn, hảư ꞌvạu ꞌtoi ꞌquám ꞌháu ꞌpá#chaư, báu#ꞌmen ꞌpứng ꞌnọng hák ꞌvạu cá#đaư, ꞌmen Chảu Khuôn Saư ꞌpá ꞌvạu#ꞌló. 12 ꞌChớ ꞌnặn ꞌpi ꞌchí phản dao ꞌnọng hảư sáu au pay#khả, ải ꞌchí dao#ꞌlụk, ꞌlụk tảu ꞌcọ ꞌchí tứn khửn tó ꞌsốn cắp ải ꞌếm chảu chao ꞌlộm#tai. 13 ꞌCốn ꞌtếng lai ꞌchí ꞌchắng ꞌpộ ꞌpứng ꞌnọng đảy ꞌtoi ꞌtáng#ꞌháu. Hák#ꞌva phủ đaư cứ chaư mẳn ꞌtạu#sút, phủ ꞌnặn ꞌcọ ꞌchí khói sia báp#ꞌsội.”

ꞌViạk báp ꞌmo khổ khốn

14 Phủ đaư đảy đu bớng ꞌpứng khót ꞌnị hảư ngắm au#ꞌnớ. Chảu ꞌGiê‑ꞌsu ꞌvạu máư#ꞌva: “ꞌChí hên ꞌmí ꞌnéo nả nái ta ꞌchắng ók nẳng bón báu#ꞌchọ#ók, ꞌnéo ꞌdệt hảư uối ꞌváng ꞌhạng#pay. ꞌChớ đaư hên ꞌsướng#ꞌnặn, phủ đaư dú nẳng phén đin Du‑đai ꞌcọ hảư ꞌtéo ꞌpai khửn ꞌpú#ꞌmứa. 15 Phủ đaư dú ꞌtếng lăng#ꞌcá ꞌpiếng ꞌhướn ꞌcọ ꞌnhá đảy ꞌlống khảu ꞌhướn ha au ꞌchương khong ók pay#ꞌtoi. 16 Phủ đaư dú ꞌtông ꞌná ꞌnhá đảy ꞌcứn ꞌmá ꞌhướn au sửa binh#chảu. 17 Cuông ꞌchớ ꞌnặn ꞌchí báp ꞌmo ꞌpứng phủ ꞌnhính dú ꞌpá kéng ꞌpứng phủ ꞌmí ꞌlụk ón ꞌnhắng kin#ꞌnốm. 18 Hảư đé so Chảu Pua ꞌPhạ ꞌnhá hảư ꞌviạk ꞌnặn pên ók ꞌnhám#nao. 19 ꞌChớ ꞌnặn ꞌchí ꞌmí ꞌviạk báp ꞌmo khổ#khốn, báu#ꞌkhới ꞌmí ꞌmá té cốc ꞌkhoẹk Chảu Pua ꞌPhạ có sảng pên ꞌphạ pên đin ꞌmá ꞌhọt ꞌtạu#ꞌkhạy. ꞌLẹo ꞌpái nả ꞌcọ ꞌchí báu#ꞌmí ꞌnéo ꞌnặn máư sắc#ꞌtưa. 20 ꞌVa Chảu Pua ꞌPhạ phủ pên Chảu Chom báu#dón ꞌpứng ꞌmự ꞌnặn#khảu, ꞌcọ ꞌchí báu#ꞌmí phủ đaư đảy khói tai sắc#ꞌcốn. ꞌTan chảu ín đu ꞌpứng ꞌcốn đảy ꞌlưạk ꞌvạy#ꞌnặn, chắng dón ꞌpứng ꞌmự ꞌnặn#khảu. 21 ꞌChớ#ꞌnặn, ꞌva phủ đaư ꞌchí bók ꞌpứng ꞌnọng#ꞌva, Chảu ꞌKha‑ꞌlịt dú bón nỉ bón#hẳn, ꞌcọ ꞌnhá#ꞌchưa. 22 ꞌChí ꞌmí ꞌcốn bẻo pên Chảu ꞌKha‑ꞌlịt, bẻo pên ꞌlam páo ꞌquám Chảu Pua#ꞌPhạ, sau ꞌchí ꞌmá ꞌdệt ꞌpứng ꞌnéo lák lửm pên mai lák hảư ꞌcốn ꞌchưa#sau, ꞌva hák ꞌdệt#đảy, sau ꞌnhắng ꞌchí bẻo ꞌlứa ꞌtếng#cá ꞌpứng ꞌcốn Chảu Pua ꞌPhạ đảy ꞌlưạk ꞌvạy ꞌnặn#máư. 23 ꞌSướng ꞌnặn ꞌpứng ꞌnọng ꞌchự hảư#đi, ꞌpứng ꞌviạk ꞌnị ꞌháu bók hảư ꞌpứng ꞌnọng ꞌhụ ꞌvạy#cón.”

ꞌChớ Chảu ꞌGiê‑ꞌsu ꞌlống ꞌmá

24 “Hák ꞌva cuông ꞌpứng ꞌmự#ꞌnặn, lăng ꞌmưa báp ꞌmo khổ khốn#ꞌlẹo, ta ꞌvến ꞌchí ꞌmựt#pay, đuông bươn ꞌcọ ꞌchí báu#ꞌhung, 25 ꞌpứng đuông đao dú cá ꞌphạ ꞌcọ ꞌchí tốc#ꞌlống, ꞌpứng ăn đaư ꞌmí dú ꞌtếng ꞌphạ ꞌcọ ꞌchí sa‑ꞌnăn sắn#ꞌphướn. 26 ꞌLẹo ꞌcốn ꞌtếng#cá ꞌchí hên ꞌháu pên ꞌlụk phủ ꞌcốn#ꞌnị, ꞌmí phép ꞌquiến nháư luông ꞌhung ꞌhướng ꞌlống ꞌmá ꞌtoi piếng#phả. 27 ꞌLẹo ꞌháu ꞌchí sống mốt tiên ꞌchạư pay ꞌhốm au ꞌpứng ꞌcốn ꞌháu đảy ꞌlưạk ꞌvạy ꞌnặn té sí phương ꞌphạ ꞌtạu sút khóp ꞌphạ phén#đin.

28 Hảư ꞌphắng au ꞌquám đải khái co#đứa, ꞌchớ đaư hên kính ón ték túm baư pống#khửn, ꞌpứng ꞌnọng ꞌcọ ꞌhụ#ꞌva ꞌnhám ꞌhọn ꞌchí ꞌmá#ꞌhọt. 29 ꞌSướng ꞌnặn#lo, ꞌmưa đaư ꞌpứng ꞌnọng hên ꞌpứng ꞌnéo lák ꞌháu ꞌvạu ꞌmá ꞌnặn pên#ók, hảư ꞌhụ#ꞌva ꞌháu ꞌchí ꞌmá ꞌhọt#ꞌlẹo. 30 ꞌHáu ꞌvạu ꞌsư hảư ꞌpứng ꞌnọng#ꞌhụ, pang ꞌlới ꞌcốn ꞌnị ꞌchí báu#ꞌhế tai mết ꞌchí hên ꞌpứng nả ꞌviạk ꞌvạu ꞌmá ꞌnặn pên#ók. 31 ꞌPhạ đin ꞌmí ꞌchớ#ꞌhuội, hák#ꞌva ꞌquám ꞌháu báu#ꞌmí ꞌchớ ꞌhuội cá#đaư.

32 ꞌHáu ꞌchí ꞌlống ꞌmá ꞌmự đaư ꞌchớ đaư ꞌnặn báu#ꞌmí phaư#ꞌhụ, báu#ꞌva ꞌpứng tiên ꞌchạư dú ꞌmướng ꞌphạ ꞌhứ#ꞌva ꞌháu phủ pên ꞌLụk Chảu Pua ꞌPhạ ꞌnị ꞌcọ báu#ꞌhụ. ꞌMí ꞌto phủ điêu Chảu Pua ꞌPhạ phủ pên ꞌPo#ꞌhụ. 33 Chắng ꞌkhớng chaư thả ꞌpưa#ꞌva ꞌchớ chao ꞌhẹn ꞌchí ꞌmá ꞌnhám đaư ꞌpứng ꞌnọng ꞌcọ báu#ꞌhụ. 34 Đải khái ꞌmí phủ#ꞌnưng ꞌchí ꞌtiếu ꞌtáng#pay, cón ꞌchớ ók ꞌhướn ꞌcọ đảy dao ꞌviạk hảư ꞌpứng ꞌcốn#ꞌhướn, ꞌviạk phaư ꞌviạk ꞌmắn lỏ#ꞌdệt, ꞌlẹo ꞌcọ bók ꞌcốn phảu pák tu đảy ꞌkhớng chaư phảu#dú. 35 ꞌSướng ꞌnặn hảư ꞌpứng ꞌnọng ꞌkhớng chaư#thả, ꞌpưa#ꞌva báu#ꞌhụ chắc ꞌháu ꞌchí ꞌmá ꞌhọt ꞌchớ#đaư, ꞌtếng#ꞌcăm, cang#ꞌcứn, khỏn cáy#khăn, ꞌhứ#ꞌva ꞌhung ꞌchạu ꞌcọ báu#ꞌhụ#chắc, pék ꞌsướng chảu ꞌhướn phủ ꞌtiếu ꞌtáng pay ꞌnặn ꞌchí ꞌmá ꞌhọt ꞌchớ đaư ꞌcọ báu#ꞌhụ, cứ phảu#dú. 36 ꞌNhá hảư ꞌháu lon ꞌmá ꞌpọ ꞌmen ꞌchớ ꞌpứng ꞌnọng báu#ꞌkhặn ꞌkháng ꞌsướng phủ ꞌnón#dú. 37 ꞌQuám ꞌháu bók ꞌpứng ꞌnọng ꞌcọ ꞌsướng đảy bók hảư ꞌcốn ꞌtếng#cá ꞌkhớng chaư#thả.”