3
Yahaya Da'itɛkɛri waazikɛnaa
(Mat 3:1-17, Maa 1:1-11, Yuh 1:19-28)
1 Siza Tiberia kíblena wɛ̃̀ gɛ̃rode gũn Pↄntiu Pilati mɛ́ à Yudea bùsu gbɛ̃ zↄ̃kↄ̃ ũ, Hɛrↄdu tɛn kí ble Galili, a vĩ̀ni Filipi tɛn kí ble Iturea bùsun kũ Tarakↄniti bùsuuo, Lisania sↄ̃ àtɛn kí ble Abilɛnɛ bùsun.
2 Anasa kũ Kayafaoomɛ sa'orikinↄ ũ. Gↄrↄ kũ̀a Luda yã ò Zakari nɛ́ Yahayanɛ gbárannan.
3 Akũ à fùtɛ àtɛn kure Yoda bara dire kũ bara laooi pínki, àtɛn waazi kɛ gbɛ̃nↄnɛ. À òńnɛ ò ń nɛ̀sɛ litɛ ò da'itɛ kɛ, Luda ni ń durunnanↄ kɛ̃ḿma.
4 Lákũ à kú annabi Isaya takada gũn nà à pì:
À baarukparii kòto ma dↄ gbárannan,
àtɛn pi à zɛ́ kɛkɛ Dikirinɛ,
à zɛ́ térerenↄ poronɛ súsu.
5 Guvutɛ pínki ni tata,
kpinↄ kũ sĩ̀sĩnↄ ni datɛ pínki.
Zɛ́ kotinanↄ ni poro súsu,
zɛ́ wókũwokũnↄ ni kpákũsũ,
6 gbɛ̃ sĩnda pínki ni e lákũ Luda dì ń sura ba nà.
7 Gbɛ̃nↄ dìgↄ̃ su a kĩnaa dasi ò da'itɛ kɛ, akũ àdi ońnɛ: Bisãsiri pitikonↄ! De mɛ́ à lɛ́ dàáwa à bàa sí pↄfɛ̃ kũ Luda ni kipaḿmanɛɛ?
8 À nɛ̀sɛlitɛna yã kɛ, onigↄ̃ dↄ̃ kũ a litɛ. Kũ Ibrahĩ de á dizi ũ, àsungↄ̃ da kũ abirekũ mɛ́ ani á boro. Matɛn oárɛ, Luda ni fↄ̃ à gbɛ̀ dínↄ kɛ Ibrahĩ burinↄ ũ.
9 Kpása ditɛna línↄi kↄ̀. Lí kũ àdi nɛ́ mana iro, Luda ni zↄ̃ à zu tɛ́ gũn.
10 Gbɛ̃nↄ a là ò pì: Tó lɛmɛ, óni kɛ deraa?
11 À wèḿma à pì: Gbɛ̃ kũ à uta vĩ mɛ̀n pla, à a do kpá gbɛ̃ kũ à vĩroa. Gbɛ̃ kũ à pↄ́ble vĩ, à kɛ lɛ dↄ.
12 Bɛ'ↄgↄsirinↄ sù da'itɛ kɛ, akũ ò a là ò pì: Dannɛri, óni kɛ deraa?
13 À wèḿma à pì: Ásun bɛ'ↄgↄ síḿma de lákũ ò dìtɛ nàlaro.
14 Sozanↄ a là: Ókↄ̃nↄ sↄ̃, óni kɛ deraa? À òńnɛ: Ásun gbãna mↄ gbɛ̃nↄnɛ à ń blero. À zɛ kũ fĩna kũ òdi boárɛo.
15 Gbɛ̃nↄ wɛ́dↄina tɛn kara. Baadi pínki tɛn laasun lɛ́ a nɛ̀sɛɛ gũn Yahaya yãa, tó àkũmɛ Arumasihu ũ.
16 Yahaya òńnɛ ń pínki à pì: Madì á da'itɛ kɛ kũ íomɛ. Ama gbɛ̃ke ni su a gbãna demala, mádi ká mà a kyate bobonɛro. Àkũ mɛ́ ani á da'itɛ kɛ kũ Luda Ninio kũ tɛ́o.
17 À gbaka kũna kũ ani pↄ́ fão. Ani pↄ́blewɛ ká a dↄ̃̀n, ani a sàko ká tɛ́ kũ àdi garo gũn.
18 Yahaya baaru nna kpannɛnaa gũn, à nàkaraḿma kũ yã pãndenↄo dasi.
19 Akũ à yã kpã̀kɛ̃ kína Hɛrↄdui a vĩ̀ni nanↄ Hɛrↄdia yã musu kũ yã vãni pãnde kũ à kɛ̀nↄ pínki,
20 akũ Hɛrↄdu ɛ̀ra à yã vãni kɛ̀ dↄ, à Yahaya dà kpɛ́siran.
Yesu da'itɛkɛnaa
(Mat 3:13-17, Maa 1:9-11)
21 Kũ Yahaya tɛn gbɛ̃nↄ da'itɛ kɛ ń pínki, à Yesu da'itɛ kɛ̀ se. Gↄrↄ kũ Yesu tɛn adua kɛ, ludambɛ wɛ̃̀kↄ̃a,
22 akũ Luda Nini sùa à de lán potɛ̃nɛ bà. Akũ à kòto ke mà bona ludambɛ à pì: Mↄkↄ̃n ma Nɛ́ mɛ̀n do légelege yenyĩde ũ, kũ ma pↄ nnamma manamana.
Yesu buri bozirɛ
(Mat 1:1-17)
23 Gↄrↄ kũ Yesu nà a zĩa, à kà wɛ̃̀ baraakuri taka. Òtɛn da Yusufu nɛ́'inaamɛ.
Yusufu sↄ̃ Eli nɛ́mɛ,
24 Eli sↄ̃ Matata nɛ́mɛ,
Matata sↄ̃ Levi nɛ́mɛ,
Levi sↄ̃ Mɛlɛki nɛ́mɛ,
Mɛlɛki sↄ̃ Yanai nɛ́mɛ,
25 Yanai sↄ̃ Yusufu nɛ́mɛ,
Yusufu sↄ̃ Matatia nɛ́mɛ,
Matatia sↄ̃ Amↄsi nɛ́mɛ,
Amↄsi sↄ̃ Naumu nɛ́mɛ,
Naumu sↄ̃ Ɛsɛli nɛ́mɛ,
Ɛsɛli sↄ̃ Nagai nɛ́mɛ,
26 Nagai sↄ̃ Maata nɛ́mɛ,
Maata sↄ̃ Matatia nɛ́mɛ,
Matatia sↄ̃ Sɛmɛi nɛ́mɛ,
Sɛmɛi sↄ̃ Yosɛki nɛ́mɛ,
Yosɛki sↄ̃ Yoda nɛ́mɛ,
Yoda sↄ̃ Yoanana nɛ́mɛ,
27 Yoanana sↄ̃ Resa nɛ́mɛ,
Resa sↄ̃ Zɛrubabɛli nɛ́mɛ,
Zɛrubabɛli sↄ̃ Sealatiɛli nɛ́mɛ,
Sealatiɛli sↄ̃ Nɛri nɛ́mɛ,
Nɛri sↄ̃ Mɛlɛki nɛ́mɛ,
28 Mɛlɛki sↄ̃ Adi nɛ́mɛ,
Adi sↄ̃ Kosamu nɛ́mɛ,
Kosamu sↄ̃ Ɛlɛmadamu nɛ́mɛ,
Ɛlɛmadamu sↄ̃ Ɛɛ nɛ́mɛ,
Ɛɛ sↄ̃ Yↄsua nɛ́mɛ,
29 Yↄsua sↄ̃ Ɛliɛza nɛ́mɛ,
Ɛliɛza sↄ̃ Yorimu nɛ́mɛ,
Yorimu sↄ̃ Matata nɛ́mɛ,
Matata sↄ̃ Levi nɛ́mɛ,
Levi sↄ̃ Simɛↄ nɛ́mɛ,
30 Simɛↄ sↄ̃ Yuda nɛ́mɛ,
Yuda sↄ̃ Yusufu nɛ́mɛ,
Yusufu sↄ̃ Yonamu nɛ́mɛ,
Yonamu sↄ̃ Ɛliakimu nɛ́mɛ,
Ɛliakimu sↄ̃ Mɛlɛa nɛ́mɛ,
31 Mɛlɛa sↄ̃ Mɛna nɛ́mɛ,
Mɛna sↄ̃ Matata nɛ́mɛ,
Matata sↄ̃ Natã nɛ́mɛ,
Natã sↄ̃ Dauda nɛ́mɛ,
Dauda sↄ̃ Yɛsɛ nɛ́mɛ,
32 Yɛsɛ sↄ̃ Ɔbɛdi nɛ́mɛ,
Ɔbɛdi sↄ̃ Bↄaza nɛ́mɛ,
Bↄaza sↄ̃ Salamↄ nɛ́mɛ,
Salamↄ sↄ̃ Nasↄ̃ nɛ́mɛ,
Nasↄ̃ sↄ̃ Aminadabu nɛ́mɛ,
33 Aminadabu sↄ̃ Ramu nɛ́mɛ,
Ramu sↄ̃ Ɛzɛrↄnu nɛ́mɛ,
Ɛzɛrↄnu sↄ̃ Pɛrɛzi nɛ́mɛ,
Pɛrɛzi sↄ̃ Yuda nɛ́mɛ,
Yuda sↄ̃ Yakubu nɛ́mɛ,
34 Yakubu sↄ̃ Isaaku nɛ́mɛ,
Isaaku sↄ̃ Ibrahĩ nɛ́mɛ,
Ibrahĩ sↄ̃ Tera nɛ́mɛ,
Tera sↄ̃ Nao nɛ́mɛ,
Nao sↄ̃ Serugu nɛ́mɛ,
35 Serugu sↄ̃ Rɛu nɛ́mɛ,
Rɛu sↄ̃ Pɛlɛgi nɛ́mɛ,
Pɛlɛgi sↄ̃ Eberu nɛ́mɛ,
Eberu sↄ̃ Sela nɛ́mɛ,
Sela sↄ̃ Kaina nɛ́mɛ,
36 Kaina sↄ̃ Apasada nɛ́mɛ,
Apasada sↄ̃ Sɛmu nɛ́mɛ,
Sɛmu sↄ̃ Nuhu nɛ́mɛ,
Nuhu sↄ̃ Lamɛki nɛ́mɛ,
Lamɛki sↄ̃ Mɛtusela nɛ́mɛ,
37 Mɛtusela sↄ̃ Ɛnↄku nɛ́mɛ,
Ɛnↄku sↄ̃ Yarɛdi nɛ́mɛ,
Yarɛdi sↄ̃ Malalɛli nɛ́mɛ,
Malalɛli sↄ̃ Kenana nɛ́mɛ,
Kenana sↄ̃ Ɛnↄsu nɛ́mɛ,
38 Ɛnↄsu sↄ̃ Sɛti nɛ́mɛ,
Sɛti sↄ̃ Adamu nɛ́mɛ,
Adamu sↄ̃ Luda nɛ́mɛ.