YIBURU DEMMA
Gbaŋka
1
1 Dila po dila po Naawen jam pa ka wa biisiteerɔma a va suita nna tɔgatɔga a jam a biisi ale tama Juuma kokpieŋsaŋa. Wa jam a biisi ale ba ka nna yegayega ate ku ga paari diichoa.
2 Alege jinla danni, wa yaa pa ka wa Biika a biisi ale ti. Biika de dek ate Naawen lueri ayen wa soa jaab buuri meena ale bo wenŋmazuk ale tɛŋzuk de la. Wa ka waai me ate Naawen basi ate wa nyɛ wenŋmazuk ale tɛŋzuk la.
3 Wa ta ka Naawen nyagsi kaai ale a nyagsi nna kpelimkpelim la. Wa a neensi ka Naawen me nna yegayega. Ti dan nya wa, ti seba Naawen me ale ka dii la kama. Biika dan biisi, wa Biika ta pagrim ka nna yegayega. Be ka wa Biika nyiini ale soa ate jaab buuri meena wenŋmazuk ale tɛŋzuk de a boro. Wa ale kpi a duisi ti wabaataŋa a basi ate ti chim wayɔrisima nyam la, wa yaa jueli kali ka Naawen, waai ale ta pagrim a gaam jaab buuri meena la juga geŋ. Juga geŋka de ka zula jigi. Naawen Biika ka nuru kpioŋ.
4 Nyaku de abe a sak kama ayen Biika ale chim nuru kpioŋ a gaam sabiiloma a soa dii la, a soa ase ka Naawen ale te wa yonni ate di zuak gaam ba yueŋa dii la.
5 Dii abe ale a sak ayen nyaku de a sum ka wensie la ale, Naawen an diem weeni wa sabiiloma waaiya ayen,
“Fi ka m Biiga,
jinla mi ka fi Ko.”
Wa ale weeni nna la ba ŋmarisi nyo Naawen Gbaŋka po kama. Naawen ŋman pilim weeni wa Biika wie ayen,
“Mi le chim wa Ko,
wa me be le chim m Biik.”
Naawen an jam weeni nyaku de a magsi chaab ale wa sabiiloma wanyi me la.
6 Ba ŋmarisi Naawen gbaŋka po me ayen, Naawen ale liŋ biak wa nidɔabinni a basi tɛŋzuk de la, wa weeni ayen,
“Ku a fe kama ayen Naawen sabiiloma meena a te Biika zula.”
7 Naawen ale weeni dii a magsi chaab ale sabiiloma la ale nna ayen,
“Wa nyɛ wa sabiiloma kama ate ba a nyɛ ase viok ale bolimŋiak la.”
8 Alege wa ale ŋman biisi wa Biika wari dii la ale nna ayen,
“Naawen, fi le soa fi naamu ka dila taam wuu.
Fi a nya fi nuruma zuk kama ale wensie.
9 Fi a yaali ka wari dii ale ka wensie la. Fi kisi wadii ale ka wa kaasuŋla kama.
Dila ale soa ate Naawen, fi Naawenni lueri fu a te fu zula,
a yaa te fu supeentik nna yegayega a gaam fi chaama.”
10 Naawen weeni wa Biika me nyaku de ayen Naawen weeni wa ayen,
“Ka fi, Nyɔnɔ, ale nyɛ tɛŋka a ta nyini ku piilimka po.
Be ka fi dek nisima ate fi pa nyɛ wenŋmazuk ale jaab buuri meena ale bo ku po la.
11 Bala meena ale tɛŋzuk de meena le muriŋ be kama. Alege fi kasim boro kama taam wuu.
Ba le kaasi kama ase garuk la.
12 Ase nuru ale a yeeri wa garuk kpak a yuk a basi ale ge a pa garuk paaluk a jo la.
Siuk kula po, ŋanta bala meena le tagri ka dila.
Alege fi kasim boro ka dila kan maari a tagri.
Fi le kasim boro ka dila taam wuu.”
13 Ka dimpo ate Naawen diem weeni wa sabiiloma wanyi ayen,
“Kali mi juga geŋ ate ku ga paari diipo
ate m le basi ate fi dachaasaŋa chim fi yomma.”
14 Naawen sabiiloma ka wa tomteerɔba. Waai an baga a nya ba ale nina. Naawen tom ba kama ayen ba jam maari baai le ba nya varibasika la.