3
1 Nakpioŋku Tiberiusi Siiza ale jam de wa naamu a paari bena pi ale ŋanu la, Pontios Paalɔt me jam chim ka Judia gomina, ate Ayerod me chim Galili Naab, ate wa suoku me Filip, a jam soa Ituriya ale Takonitisi tɛŋsaŋa a nya, ate Lisaniasi me a jam soa Abilene tɛŋka me a nya.
2 Anasi ale Kayafas ale jam chim Juuma Puusika Yenni kpagi kpeemaŋa, dila powa, Zakaria biika Jɔɔn a jam bo ka sagini po. Naawen yaa biisi ale Zakaria biika Jɔɔn goanni po.
3 Jɔɔn a yaa nyiem a gilim tɛŋ sii meena ale kali Jodan benni noai la a sak nuruba a weeni ba ayen, “Ni meena basi ni tuimbaataŋa abe ni va Naawen siuku. Ni dan tagri, m le te ni soka ate Naawen a voŋ ni tuimbaataŋa a te ni.”
4 Ase Azaya Naawen biisiteerɔwa ale ŋmarisi Naawen gbaŋka po dii la ayen,
“Lueluk ale a kaari sagini po a weeni ayen, ‘Ni gomsi Nyɔnɔwa siuku abe ni teenti ku.
5 Ni sueri golaŋa meena ate ŋa magsi chaab. Kunkutimaŋa ale guutaŋa meena a magsi chaab ale tɛŋka.
Ni yuarisi siuk tii meena ale goalim la, siuk tii meena ale ta tintana la, ni gomsi ti ate ti soa ase chaab la,
6 ate nurubiik meena a yaa nya Naawen Varibasika.’ ”
7 Nuru bɔari a yaa nyini jam Jɔɔn jigi ayen wa te ba soka. Jɔɔn yaa weeni ba ayen, “Ni a nyɛ ase ka waapiisa la. Ka wana ale weeni ni ayen ni baga a chali a nyini waali kaai ate Naawen za wa te ni la po?
8 Ni be a tom tuim ŋaai ale ŋa sak ayen ni basi ni tuimbaataŋa tomka kama la, abe ni kan a weeni ni dek ayen, ‘Abraham ka tama ko.’ Ni basi ate m weeni a sak ni ayen Naawen baga pa tintanaŋa de kama a nyɛ ate ŋa a chim Abraham ŋaaŋbisa.
9 Ni nya liaka abe gomsi magsi ayen ka che tiimu kinni naŋsaŋa kama. Ti sii meena me ale kan a yoani yoan maŋsa la, ka le gebi si kama a lonsi tɛŋ, ate ba pa si a yuk basi bolim po.”
10 Nuruma a yaa bek Jɔɔn ayen, “Yɔgyɔgla de, ti be le nyɛ ka se?”
11 Wa yaa tulisi ba ayen, “Waai a dan ta gatta tiye, ku a fe kama ayen wa pa kunyi a te waai ale kan ta garuk la. Waai me abe ale ta ŋandiinta la, ku a fe kama ayen wa me nyɛ wa ŋandiintaŋa gela a te waai ale kan ta ŋandiinta a de la.”
12 Lampoo cheesiroba ba gela ale maa jam ayen ba tuesi soka. Ba me yaa bek Jɔɔn ayen, “Ti Sagrɔ, tama me abe ale nyɛ ka se?”
13 Wa yaa tulisi ba me ayen, “Ku a fe kama ayen ni kan tuesi nuruba ligra a gaam ba ale weeni ni ayen ni tuesi dii la.”
14 Sojiba ba gela me a jam bek wa ayen, “Tama me abe ti nyɛ ka se?”
Wa yaa tulisi ba me ayen, “Ku a fe kama ayen ni kan vari nuru jaabɔa, a yaase ni velim a te wa a tuesi wa jaabɔa, ku a fe kama ate ni basi ate ni nina sueri ale ni tutunaŋa.”
15 Nuruma ale wom dila la, ku yaa deri cha ba ate ba deri ta yiila a poli ayen da dii dai Jɔɔn ka Kirisitawa waai ate Naawen le tom ate wa jam la.
16 Alege Jɔɔn yaa tulisi ba meena ayen, “Mi a te ni soka ale ka nyiam nyiini, alege nuru ale bo ŋaaŋ cheena. Wa ta pagrim gaam mi. Mi posima ale m nin chim waai ale wa domsi a kali wa niŋ a yeeri wa nuensaŋa a te wa la. Nuru wala ale cheena la, wa le pa ka Naawen Chiika ale bolim a sueri ni suniimaŋa.
17 Wa gomsi magsi kama ayen wa yali wa zaaŋa. Wa dan yali nueri, wa le tali zabeeŋa nyo wa bunni po abe wa yaa ju vottaŋa ale bolim buui ale kan a kpimsi la.”
18 Jɔɔn jam magsi ka wie ŋa chaab nna yegayega ase nna la, a sak nuruma Naawen wamaŋsaŋa wie.
19 Alege da yeŋ ate Jɔɔn tɔariŋ naab Ayerod nuruma nimbie po ayen ka boa ale soa ate wa faari wa suoku powa Ayerodiasi, ale maara tom tuimbaata ti chaab me a gum du.
20 Dii ate Ayerod a nyɛ ate di ŋmasi bie la ale wa ale yik Jɔɔn a lik la.
21 Nuruma meena ale jam boro a tuesi soka la, Yeezu a jam maa tuesi soka kama. Yeezu yaa boro a puusi Naawen ate wenŋmazuku a deri lagri,
22 ate Naawen Chiika a siŋ jam wa zuk ase nangbaŋ la, ate lueluk a yaa nyini wenŋmazuku po a weeni Yeezu ayen, “Fi ale m dek biik. Mi a yaali fu ka nna yegayega. M sui peenti ale fu kama.”
23 Yeezu a jam a nyɛ ase ka bena pisita la alege yaa piilim wa sinsaŋŋa. Nuruba jam a poli kama ayen Yeezu kowa ale Josefi. Yeezu buuni po abe ale ka dii la ale nna:
Josefi kowa ale Ayeli. Ayeli kowa ale Matati.
24 Matati kowa ale Livai. Livai kowa ale Meliki.
Meliki kowa ale Janai. Janai kowa ale Josefi.
Josefi kowa ale Matatiasi.
25 Matatiasi kowa ale Amos.
Amos kowa ale Nayum. Nayum kowa ale Ɛzli.
Ɛzli kowa ale Nagai. Nagai kowa ale Maat.
26 Maat kowa ale Matatiasi. Matatiasi kowa ale Semein.
Semein kowa ale Josek. Josek kowa ale Joda.
Joda kowa ale Joanan.
27 Joanan kowa ale Aresa.
Aresa kowa ale Zerubabel. Zerubabel kowa ale Sealtiel.
Sealtiel kowa ale Neri. Neri kowa ale Meliki.
28 Meliki kowa ale Addi. Addi kowa ale Kosam.
Kosam kowa ale Ɛlimadam. Ɛlimadam kowa ale Ɛri.
Ɛri kowa ale Josua.
29 Josua kowa ale Ɛlieza.
Ɛlieza kowa ale Jorim. Jorim kowa ale Matati.
Matati kowa ale Livai. Livai kowa ale Simeyon.
30 Simeyon kowa ale Juda. Juda kowa ale Josefi.
Josefi kowa ale Jonam. Jonam kowa ale Eliakim.
Eliakim kowa ale Melea.
31 Melea kowa ale Mena.
Mena kowa ale Mataata. Mataata kowa ale Natan.
Natan kowa ale Deevid. Deevid kowa ale Jese.
32 Jese kowa ale Obed. Obed kowa ale Boazi.
Boazi kowa ale Salimon. Salimon kowa ale Naason.
Naason kowa ale Aminadab.
33 Aminadab kowa ale Ademin.
Ademin kowa ale Arini. Arini kowa ale Ayeziron.
Ayeziron kowa ale Perezi. Perezi kowa ale Juda.
Juda kowa ale Jekob.
34 Jekob kowa ale Aizik.
Aizik kowa ale Abraham. Abraham kowa ale Tɛra.
Tɛra kowa ale Nayo. Nayo kowa ale Serug.
35 Serug kowa ale Areu. Areu kowa ale Peleg.
Peleg kowa ale Ɛba. Ɛba kowa ale Sɛla.
Sɛla kowa ale Kenan.
36 Kenan kowa ale Afakasad.
Afakasad kowa ale Sɛm. Sɛm kowa ale Nowa.
Nowa kowa ale Lamek. Lamek kowa ale Metusela.
37 Metusela kowa ale Ɛnok. Ɛnok kowa ale Jared.
Jared kowa ale Mayalale. Mayalale kowa ale Kenan.
Kenan kowa ale Ɛnos.
38 Ɛnos kowa ale Sɛti.
Sɛti kowa ale Adam. Adam kowa ale Naawen.