GT:cak:Kaqchikel Apocalipsis 16

Ri vuku' ruvech k'axomal ri xquepe pa ruvi' ri roch'ulef

1 Jac'ari' xinvac'axaj jun kulaj ri riq'uin ruchuk'a' nich'o-pe pa racho ri Dios y quire' nu'ij-pe chique ri vuku'* ángeles: Vacami quixbin y tic'uaj-e ri vuku' lak ri nojnak-e ri royoval ri Dios* chupan, y (te'ik'eja', te'ik'ija') pa ruvi' ri roch'ulef.

2 Xbe ri na'ey ángel* y (xuk'ej, xuk'ij) pa ruvi' ri roch'ulef ri ruc'uan chupan ri lak, y conojel c'a ri quic'uan ri retal ri na'ey itzel chicop, y ri quibanon xuculen chuvech ri ruvachibel, xel-pe chiquij jun itzel ch'a'c* ri yeruya' pa k'axomal.

3 Ri ruca'n ángel pa ruvi' ri mar (xberuk'eja', xberuk'ija') vi ri ruc'uan chupan ri lak, y ri ya' xchuvir achel ruquiq'uel jun ámna, y conojel ri c'o quic'aslen chupan ri mar (xecom, xequen).*

4 Ri rox ángel (xberuk'eja', xberuk'ija') ri ruc'uan chupan ri lak pa quivi' ri rakan tak ya' y pa quivi' ri alaxbel tak ya',* y ronojel ri ya' ri' xoc quic'.* 5 Jac'ari' xinvac'axaj chi ri ángel ri yo'on pa ruk'a' chi nitakchi'in pa quivi' ri ya', quire' xu'ij: Ajaf, rat ri jumul ratc'o, y can ratc'o-vi-pe,* y rat lok'olaj, can choj* vi ri xa'an, riq'uin ri quire' rajil-ruq'uexel ri xaya'. 6 Quiri' nin-ij chave, roma ri xecamisan quichin ri erichin ri lok'olaj atinamit y quichin ri xeyo'on rubixic ri xa'ij-pe pa cánima,* rat na'an chique chi niquikum quic'.* ¡Can jari' ri nuc'ul chi xaya' chique! xcha' ri ángel. 7 Jac'ari' xinvac'axaj chi riq'uin ri altar c'o chic jun ri nich'o-pe, y quire' nu'ij: Ajaf Dios, rat ri c'o ronojel uchuk'a' pan ak'a', can pa ruchojmil vi* y can ja achel ri xasuj chi na'an tok xaya' ri rajil-ruq'uexel re'.

8 Jac'ari' tok ri rucaj ángel* (xberuk'eja', xberuk'ija') ri ruc'uan chupan ri lak chirij ri k'ij, y ri k'ij xjach uchuk'a' pa ruk'a' richin queruporoj ri vinak riq'uin ri ruk'ak'al. 9 Jari' xbano chi xec'at ri vinak riq'uin ri nimalaj ruk'ak'al ri k'ij, y xa xquiyok'* rubi' ri Dios ri c'o ruk'a' che ronojel ri k'axomal re'. Pero xa man xquijal ta quino'oj chi xquiya' can ri quimac richin can ta xquiya' ruk'ij.

10 Ri quinto ángel (xberuk'eja', xberuk'ija') ri ruc'uan chupan ri lak pa ruvi' rutz'uyubal ri na'ey chicop, y xka jun nimalaj k'eku'n* pa ruvi' ronojel ri nu'on-vi gobernar ri chicop ri'. Y ri vinak, roma k'axomal niquicach'uj-ka cak', 11 y niquiyok' rubi' ri Dios ri c'o chicaj roma ri quik'axomal, y roma ri ch'a'c ri xel-pe chiquij.* Pero rije' man xquijal ta quino'oj richin ta xquiya' can ri itzel ri yetajin riq'uin.

12 Ri sexto ángel (xberuk'eja', xberuk'ija') ri ruc'uan chupan ri lak pa ruvi' ri nimalaj rakan-ya' Eufrates,* y xchakij* c'a ka ri rakan-ya', richin quiri' mesmoj ri bey nuquila' ri reyes ri xquepe achique lugar ntel-vi-pe ri k'ij.* 13 Jac'ari' xintz'et oxi' itzel tak espíritu ri e'achel ranas, jun ntel-pe pa ruchi' ri itzel dragón* quiek rij, jun ntel-pe pa ruchi' ri na'ey chicop y jun ntel-pe pa ruchi' ri jun ri ruk'eban-ri'* chi ri nu'ij, ja ri Dios ni'in-pe pa ránima.* 14 Ri oxi' itzel tak espíritu re' niqui'en nimalaj tak milagros,* y yebe quiq'uin ri reyes pa ruvi' ronojel ri roch'ulef, yequimol-apu richin ri guerra* ri xtibanataj chupan ri nimalaj k'ij richin ri Dios ri c'o ronojel uchuk'a' pa ruk'a'. 15 Jac'a ri Jesucristo quire' nu'ij: Yin man jun nutzijol tok xquipe, achel nu'on jun elek'on.* Utzulaj tzij rubanon ri Dios che ri q'ues ruvech pa ruvi' ri ruc'aslen, y rucusan rutziak. Richin quiri' man ch'anel ta nibin, y nis-ta xtitz'etetaj ri ruq'uix. Quiri' nu'ij ri Jesucristo. 16 Y ri oxi' itzel tak espíritu, xequimol conojel ri reyes pa jun lugar ri ni'ix Armagedón che pa ch'abel hebreo.

17 Jac'ari' tok ri séptimo ángel (xuk'ej, xuk'ij) pe pa cak'ik' ri ruc'uan chupan ri lak, y riq'uin c'a ruchuk'a' xch'o-pe jun kulaj pa racho ri Dios chicaj, ri achique lugar c'o-vi ri nimalaj rutz'uyubal, y quire' nu'ij-pe: Xbanataj yan ronojel,* xcha'. 18 Jari' tok xek'alajin-pe coyopa', xec'axataj kulaj y rayos, y xu'on jun nimalaj cobrakan ri man jun bey quiri' rubanon chupan ri ajani tiempo ec'o vinak choch'ulef.* 19 Ri nimalaj tinamit xel pan oxi', y ri jalajoj tak tinamit ri ec'o pa ruvi' ri roch'ulef, xetzak pan ulef. Jari' tok ri Dios xuc'uxlaj-pe ri siq'uisel tinamit Babilonia* richin nuya' chique ri aj chiri' chi tiquikumu-ka* ri royoval ri catajnak ruchuk'a' pa quivi'. 20 Riq'uin ri cobrakan ri xbanataj, ri roch'ulef ri ec'o pa mar xebe chuxe' ya', y ri chovon tak juyu' man chic xetz'etetaj ta.* 21 Chicaj xka-pe jun nimalaj sakbech* ri juba' ma jujun quintal calal pa quivi' ri vinak. Y roma ri camic sakbech, ri vinak xquiyok' ri Dios, roma man juba' ta oc ri k'axomal ri ec'o-vi.

* 16:1 Ap. 15:1. * 16:1 Ap. 14:10. * 16:2 Ap. 8:7. * 16:2 Ex. 9:9; Dt. 28:27; 1 S. 5:6, 9. * 16:3 Ap. 8:9. * 16:4 Ap. 8:10. * 16:4 Ex. 7:17, 20. * 16:5 Ap. 1:4, 8; 4:8; 11:17. * 16:5 Sal. 97:2. * 16:6 Mt. 23:34. * 16:6 Is. 49:26. * 16:7 Ap. 19:2. * 16:8 Ap. 8:12. * 16:9 Is. 8:21. * 16:10 Ex. 10:21. * 16:11 Ap. 16:2. * 16:12 Ap. 9:14. * 16:12 Jer. 50:38; 51:36. * 16:12 Is. 41:2, 25. * 16:13 Ap. 12:3. * 16:13 Ri jun ri nuk'ebaj-ri' re', jare' ri itzel chicop xutz'et ri Juan ri pa 13:11. * 16:13 1 Jn. 4:1. * 16:14 2 Ts. 2:9. * 16:14 Ap. 20:8. * 16:15 Mt. 24:43; 1 Ts. 5:2; 2 P. 3:10. * 16:17 Ap. 21:6. * 16:18 Dn. 12:1. * 16:19 Ap. 14:8. * 16:19 Is. 51:17; Jer. 25:15, 16. * 16:20 Ap. 6:14. * 16:21 Ap. 11:19.