JUANRA QUIRICA HUENEMETSE ACUAREQUE
1 JUAN
Riyaque quirica ri Juan Jesúsja emepera huenemetse acuareque. Amena esiri cuitara rejari huenecuare. Turatu huenecuare etataquera ebacua cuanaque jida ecuejau bucha cuejae. Bahuityacuare tujatu yurameta iyuhuedapa ecuana peya cuana tsehue cabatijacataqui ama jadya. Cuejacuare rejari ecuana amena Yusu jaque tibu eje bucha anie jutaquique. Riyaque yahuaju cuanaque bucha ama ecuana. Yusura cuatsashaya eque juyaque ama bucha ama ecuana. Pana ejenedyapa tuque ecuanaja ataqui Yusu tsehue tere baecua anidirunucabuqueque, Jesús queja catyatihuaque juatsu.
Umae versículo cuana jida cabahuityati ishuque ri: 1.7, 9; 2.15, 28; 3.2-3; 4.10-12; 5.13-15.
1
Yusu eje bucha caadebameretie ecuita cuana queja jucuareque
1 Quirica rique micuanaja cuadishaya micuana Jesús queja ecatyati cuanaja ishu. Ique Juan. Jesucristo eje buchique rique micuanaja hueneya. Tuquetu Yusu Adebamerequique. Tudyatu Ecuana Anisirishaquique. Yahua iyama jarijutu anicuare. Tuque riyaque yahuaju junahuaju ecuana tura mepecuare cuanara tuque ecuana bacacuare tuque quisaratiyaju. Ecuanaja yatuca tsehue cuitadya tuque ecuana bacuare. Bacuare ecuana tuque ai juyaju. Ecuanara cuitadyatu ecuanaja emetucu tsehue jabacuare.
2 Riyaque ecuana ani tere baecuaque tyaquiquetu ecuana queja cabameretihua. Bacacuare tuque ecuanara. Jadya tibudya micuana iyacua ecuanara tuque eje buchique cuejaya. Tuque maju baecua siri aniyaque micuana ecuanara cuejaya. Icuene cuitatu tuque Etataque tsehue anicuare. Tuequedyatu ecuana queja cabamereticuare.
3 Ecuanara bacuareque, bacacuareque jadya micuana ecuanara cuejaya, ecuanara ejeneyaque micuanaja ejene ishu, ecuana tsehue micuana peadya camadya bucha juishu. Tume tuque ecuanaja dutya micuana tsehue ecadutyati aniya ecuanaja Etata Yusu tsehue, tuja Ebacuaque Jesucristo tsehue jadya.
4 Micuanara ni pana baca aya era riyaque quiricaju cuejayaque, tume micuana dyaque jida juya ecuana bucha. Jadya juatsu rique micuanaja quirica cuadishaya.
Dyaque jidaque juya tibu Yusu hueca buchique
5 Riyaque quisarati ri Jesucristora ecuana bahuityacuareque. Cuejaya micuana ecuanara. Yusu tu dyaque jidaque; hueca buchique tume. Aijama tujatu jidamaque; ni apidya tujatu jidamaque aya ama. Apuda buchique ama tume.
6 “Yusu tsehue ecadutyati ecuana aniya”, jadya ni ecuana juya, arepa Yusu adeba baecua cuanaque aniya baedya jutidya ecuana aniajeya ama bucha, tume ecuana pusha pusha arida.
7 Yusu tu hueca buchique, tuque jida jujacaya ama tibu. Tuque bucha tuyu ni ecuana aniya, tume tuque ecuanaja cacareneti ishuque aniya peya cuana tsehue. Tume tura tuque ecuanaja dutya jucha apupashaya, tuja Ebacuaque Jesucristo ecuana jiteque curusuju ami quijehueti, maju jadya juhua tibu.
8 “Juchama ique”, jadya ni ecuana pusha pusha juya, ecuana tacadya jutidya ecuana ijahue catiya.
9 Jucha cuana ni ecuana Yusu queja cacuejatiya, tillayadya tuja tuque ecuanaja, tura aana ahua baedya. Dutya jidama cuanaque tuja tuque ecuanaja tillaya. Ayadya tuja tuque, tuque tuyu jujacaya ama tibu. Ayadya tujatu tura aana ahuaque ayadya tibu.
10 Aya ni ecuana quisarati: “Ique ni riya piji buchique cajuchatima”, tume taa tuque ecuana Yusu pusha pusha ariju aya, tura ecuana dutya juchaqui jadya aya tibu. Ejeneya ama di taa tuque ecuana tuja quisarati yunerique, ai ecuana tuja quisarati yuneri eque aniya batudya.