9
Kot epwe arosala chon ekewe mwü lon Kanaan
9.1-6
1 “Oupwe aüseling ämi chon Israel: Iei oupwe feila pekilan ewe chanpupu Jortan pwe oupwe fanüeni fanüen chon ekewe mwü mi watte o pöchökül senikemi, chor ra imweimw lon telinimw mi watte o tit tori läng.
2 Ir eu mwichen aramas mwirimwirin Anak, ra watte o mwänemong, oua sileer, oua pwal rong usun pworauser pwe esap wor eman a tongeni ü ngeniir.
3 Iei mine oupwe silei ikenai pwe ewe Samol mi Lapalap ämi we Kot a akomwola mwemi usun chök eu ekkei mi kü. Iwe, epwe akufuur o nirela me mwemi, nge ämi oupwe asürela o müttir aroserela, usun ewe Samol mi Lapalap a pwon ngenikemi.
4 Iwe, mürin än ewe Samol mi Lapalap asürela me mwemi, ousap ekieki lon lelukemi pwe a afanüa ngenikemi ei fanü pokiten ämi pwüng. Apwi, ewe Samol mi Lapalap a asüela chon ekewe mwü me mwemi pokiten ar föföringau.
5 Ousap tolong o fanüeni fanüer pokiten ämi pwüng me wenecharen lelukemi, nge pokiten än chon ekewe mwü föföringau ewe Samol mi Lapalap ämi we Kot a asürela me mwemi, pwe epwe apwönüetä ewe pwon a eäni fän akapel ngeni ämi kewe lewo Apraham, Isaak me Jakop.
6 Iei mine oupwe silei pwe ewe Samol mi Lapalap esap ngenikemi ewe fanü mi mürina pwe oupwe fanüeni pokiten ämi pwüng, pun ämi eu mwichen aramas mi tipeförea.”
Chon Israel ra ü ngeni Kot me fäsonun ewe chuk Horep
9.7-29
7 “Iwe, oupwe chechemeni, nge ousap manlükala usun oua asonga ewe Samol mi Lapalap me lon ewe fanüapö. Seni ewe ränin oua towu seni Isip tori oua tolong lon ei fanü oua ü ngeni ewe Samol mi Lapalap.
8 Pwal me fäsonun ewe chuk Horep oua asonga ewe Samol mi Lapalap, pwe i a fokun song ngenikemi o ekiekin nikemiila.
9 Lupwen üa feitä won ewe chuk pwe üpwe angei ekewe rüepek fau mi chöpöp, ia a mak ie kapasen ewe pwon ewe Samol mi Lapalap a eäni ngenikemi, üa nonom won ewe chuk lon ükükün faik rän me faik pwin. Üsap mongö, üsap pwal ün.
10 Mürin, ewe Samol mi Lapalap a ngeniei ekewe rüepek fau mi chöpöp, a makei wor ngeni öütün ekewe fos meinisin a ürenikemi me won ewe chuk seni lukalapen ewe ekkei lon ewe ränin oua mwichefengen.
11 Iwe, amüchülan ekewe faik rän me faik pwin, ewe Samol mi Lapalap a ngeniei ekewe rüepek fau mi chöpöp, ia a mak ie kapasen ewe pwon.
12 Mürin, ewe Samol mi Lapalap a üreniei, ‘Kopwe müttiritiu seni ikei, pun noum kewe aramas ka emwenirewu seni Isip ra föföringau. Ra müttir tokola seni mine üa allük ngeniir o föri eu uluulun anümwäl fän iter.’
13 Iwe, ewe Samol mi Lapalap a pwal üreniei, ‘Üa nengeni ekei aramas o küna pwe ir eu mwichen aramas mi tipeförea.
14 Kopwe mwüt ngeniei pwe üpwe aroserela o tölala iter seni won fanüfan. Mürin üpwe föri senuk eu mwichen aramas mi pöchökül o chomong seniir.’
15 Iei mine üa liwinsefälitiu me won ewe chuk, nge ewe chuk a kar. Iwe, ekewe rüepek fau ia a mak ie kapasen ewe pwon ra nom lepei.
16 Lupwen üa nenengeni, üa küna pwe oua tipis ngeni ewe Samol mi Lapalap ämi we Kot. Oua föri fän itemi eu uluulun kow, oua pwal müttir aleasolap ngeni ekewe allük ewe Samol mi Lapalap a ngenikemi.
17 Iei mine üa aturätiu ekewe rüepek fau mi nom lepei o amökküür me fän mesemi.
18 Mürin üa chapetiu fän mesen ewe Samol mi Lapalap faik rän me faik pwin usun me mwan. Üsap mongö, üsap pwal ün pokiten ämi tipis meinisin oua föri, pun oua föri mine a ngau fän mesen ewe Samol mi Lapalap, oua pwal asonga.
19 Pun üa niuokusiti än ewe Samol mi Lapalap song ngenikemi me an lingeringeritikemi, pwe a ekiekin arosakemiila. Nge ewe Samol mi Lapalap a aüselinga ai tüngor lon pwal ei fansoun.
20 Iwe, ewe Samol mi Lapalap a pwal song ngeni Aaron, pwe a ekiekin niela. Iei mine üa pwal tüngor fän äsengesin Aaron lon ewe chök fansoun.
21 Mürin üa angei ewe uluulun kow oua föri, ewe mettoch oua tipis ren, o aturalong lon ekkei. Üa pwal amökkü o atatakisi tori a usun chök pipisüsü. Mürin üa aturalong pipisüsün lon ewe öüwö mi pu seni ewe chuk.
22 Iwe, oua pwal asonga ewe Samol mi Lapalap me lon Tapera, Masa me Kiprot-attawa.
23 Nge lupwen ewe Samol mi Lapalap a tinikemiila seni Kates-parnea, a ürenikemi pwe oupwe feitä o angei ewe fanü a ngenikemi pwe oupwe fanüeni, ämi oua ü ngeni ewe allük än ewe Samol mi Lapalap ämi we Kot. Ousap lükü i, ousap pwal aleasochisi alon.
24 Seni ewe rän üa silekemi, oua chök ü ngeni ewe Samol mi Lapalap.
25 Iei mine üa chapetiu fän mesen ewe Samol mi Lapalap lon ekewe faik rän me faik pwin, pun üa silei pwe a fokun ekiekin arosakemiila.
26 Iwe, üa tüngor ngeni, ‘Ai Kot Samol mi Lapalap, kosap arosala noum aramas, pun ir noum, ka angeseer ren om manaman, ka pwal emwenirewu seni Isip ren poum mi manaman.
27 Kopwe chechemeni noum kewe chon angang Apraham, Isaak me Jakop. Kosap nenengeni än ekewe aramas tipeförea ika ar föföringau ika ar tipis.
28 Pun chon Isip repwe apasa: Pokiten ewe Samol mi Lapalap esap tufichin emwenirelong lon ewe fanü a pwon ngeniir, a pwal oputeer, iei mine a emwenirewu pwe epwe nirela lon ewe fanüapö.
29 Nge ir noum aramas ka nöüniir, ka emwenirewu seni Isip ren om manaman mi lapalap, pwal ren poum mi aköüpöü.’ ”