25
Ewe fanü Juta epwe pönüla ren chon Papilon lon ükükün fik ier
25.1-14
1 Iwe, lon arüanün ierin mwün Jehoiakim ewe kingen Juta nöün Josia we mwän eu pworaus a tori Jeremaia fän äsengesin ekewe aramasen Juta meinisin. Iei aeuin ierin mwün Nepukatnesar ewe kingen Papilon.
2 Iei ekewe kapas ewe soufos Jeremaia a üreni ekewe aramasen Juta me chon Jerusalem meinisin,
3 “Lon ükükün rüe me ülüngat ier, seni ewe engol me ülüngatin ierin mwün Josia ewe kingen Juta nöün Amon we mwän tori ikenai ewe Samol mi Lapalap a kapas ngeniei. Iwe, üa asile ngenikemi ekei kapas iteiten fansoun, nge ämi ousap aüseling.
4 Ämi ousap mochen aüseling ika aü selingemi pwe oupwe rongorong, inamwo ika ewe Samol mi Lapalap a tinikisiela remi nöün kewe chon angang ekewe soufos.
5 Ir ra ürenikemi, ‘Oupwe kul seni ämi kewe lapalap mi ngau me ämi kewe föför mi ngau, pwe oupwe sopwela le nonom lon ewe fanü ewe Samol mi Lapalap a ngenikemi me ämi kewe lewo pwe oupwe fanüeni tori feilfeilachök.
6 Ousap fel ngeni pwal ekoch kot ika angang ngeniir, ousap pwal asonga Kot ren ämi fel ngeni ekewe uluulun anümwäl oua föri. Mürin esap afeiengauakemi.’
7 Nge ewe Samol mi Lapalap a püsin apasa pwe ousap aüselinga i, nge oua fen asonga ren ämi kewe uluulun anümwäl oua föri o atoto womi feiengau.”
8 Iei mine ewe Samol mi Unusen Manaman a apasa, “Pokiten ämi ousap aleasochis ngeni ai kewe kapas,
9 üpwe titila ren chon ekewe mwü meinisin mi nom efeng, pwal ren nei chon angang Nepukatnesar ewe kingen Papilon. Üpwe emwenireto pwe repwe maun ngeni ei fanü Juta me aramasan, pwal ngeni chon ekewe mwü meinisin mi nom pwelin ünükün. Üpwe fokun aroserela o föri pwe repwe och minen eniweniw, och minen turunufas me itengau tori feilfeilachök. Ngang ewe Samol mi Lapalap üa kapas.
10 Üpwe aükätiu kölün mweireir me pwapwa, pwal pwapwan mongön apwüpwülü. Üpwe aükätiu püngüpüngün ewe lenien wüsüs o kunuela ewe lamp.
11 Unusen ei fanü epwe tala o pönüla, nge chon ekei mwü repwe angang ngeni ewe kingen Papilon lon ükükün fik ier.
12 Iwe, wesin ekewe fik ier, üpwe apwüngü ewe kingen Papilon me chon mwün fän iten ar tipis. Üpwe ataela fanüer pwe fanüer epwe pönüla tori feilfeilachök. Ngang ewe Samol mi Lapalap üa kapas.
13 Üpwe atoto won Papilon ekewe feiengau meinisin üa fen apasa fän itan, meinisin mine a mak lon ei puk, ekewe kapasen feiengau Jeremaia a osuni fän iten ekewe mwü meinisin.
14 Üpwe liwini ngeni ekewe chon Papilon liwinin ar föför me angangen pöür. Iwe, chomong mwü me king mi lap repwe nöüniir amanau.”
Kapasen lingeringer fän iten chon ekewe mwü
25.15-38
15 Iei usun mine ewe Samol mi Lapalap ewe Koten Israel a üreniei, “Kopwe angei seni lepei ei kap mi ur ren wainin lingeringer. Kopwe aünü ngeni chon ekewe mwü meinisin üa tinukela rer.
16 Repwe ün o taroporop, repwe puchala ren pokiten ewe maun üpwe tinala leir.”
17 Mürin, üa angei ewe kap seni lepöün ewe Samol mi Lapalap o ngeni chon ekewe mwü meinisin, chokewe ewe Samol mi Lapalap a tinieila rer, pwe repwe ün seni.
18 Üa aünü ngeni Jerusalem me ekewe telinimwen Juta, ngeni ar kewe king me nöür kewe nöüwis, pwe ekewe leni repwe wiliti eu leni mi ta o pöön, aramas repwe rükö rer, repwe turunufaseer o eäniir kapasen ottek, usun a chüen fis tori ei fansoun.
19 Üa pwal aünü ngeni Farao ewe kingen Isip, ngeni nöün kewe nöüwis, nöün kewe souemwen me nöün aramas meinisin,
20 pwal ngeni ekewe chon ekis mi nom leir. Üa aünü ngeni ekewe kingen ewe fanü Us meinisin me kingen ekewe telinimwen Filistia: Askelon, Kasa, Ekron me ekewe mi chüen manau lon Astot.
21 Üa aünü ngeni chon Etom, Moap me Amon,
22 ngeni ekewe kingen Tirus me Siton meinisin, pwal ngeni ekewe kingen ewe fanü mi nom aroset pekilan ewe matau,
23 ngeni ekewe telinimw Tetan, Tema me Pus, pwal ngeni chokewe meinisin mi fichi mökürer.
24 Üa pwal aünü ngeni ekewe kingen Arapia me kingen ekewe sokopaten ainang mi nonom lon unusen ewe fanüapö,
25 ngeni ekewe kingen Simri, kingen Elam me kingen Metia meinisin,
26 ngeni ekewe kingen efeng meinisin, chokewe mi nom toau ika arap, eman mürin eman. Ekewe mwü meinisin mi nom fanüfan ra ün seni. Nge mürir meinisin ewe kingen Papilon epwe ün.
27 Mürin, ewe Samol mi Lapalap a üreniei, “Kopwe kapas ngeni ekewe aramas pwe iei alon ewe Samol mi Unusen Manaman, ewe Koten Israel, ‘Oupwe ün tori oupwe pulas o mus. Oupwe turula, nge ousap chüen ütäsefäl pokiten ewe maun üpwe tinala remi.’
28 Nge are resap mochen angei ewe kap seni lepoum pwe repwe ün, mürin kopwe üreniir, ‘Iei alon ewe Samol mi Unusen Manaman: Oupwe fokun ün.
29 Pun nengeni, üpwe popuetä ewe angangen kata me lon ei telinimw mi föü itei won. Nge ifa usun, üsap pwal apwüngükemi? Üpwe fokun apwüngükemi, pun üpwe awarato maun ngeni chon fanüfan meinisin. Ngang ewe Samol mi Unusen Manaman üa kapas.’
30 Iei mine kopwe osuni ngeniir ekei kapas meinisin o üreniir,
‘Ewe Samol mi Lapalap epwe kökkö fän leüömong seni läng,
epwe alapatä mwelian seni lenian mi pin.
Epwe fokun kökkö fän leüömong ngeni nöün aramas
o mweir usun chokewe mi puri föün wain.
Epwe apwas ngeni chon fanüfan meinisin.
31 Ewe apwas epwe tori lesopun fanüfan.
Pun ewe Samol mi Lapalap a atipisi chon ekewe mwü meinisin.
Epwe eäni kapwüng ngeni aramas meinisin,
nge epwe niela ekewe aramasangau.’
Iei alon ewe Samol mi Lapalap.”
32 Iwe, ewe Samol mi Unusen Manaman a apasa pwe feiengau epwe tori mwü me mwü, nge eu mölümöl mi watte epwe eiätä seni ekewe kinikinin lesopun fanüfan.
33 Iwe, chokewe mi ninnila me ren ewe Samol mi Lapalap lon ewe ränin repwe toropasfeil seni epek fanüfan tori epek. Esap wor eman epwe kechüeitiir, ika ionifengeniir, ika peiaseniir. Repwe usun chök kiten mongö me won pwül.
34 Ämi chon mas, oupwe kechü o ngüngüres, ämi souemwenin nei aramas, oupwe asokopälakemi lon pwül. Pun fansoun ämi ninni a war. Oupwe turutiu o tatakis usun eu pör mi mürina.
35 Esap chüen wor eu lenien op fän itemi chon mas, ämi souemwenin nei aramas ousap tongeni süla.
36 Oupwe rongorong än ekewe chon mas siö me än ekewe souemwenin nei aramas ngüngüres. Pun ewe Samol mi Lapalap a ataala mwür,
37 nge fanüer mi kinamwe a tatakis pokiten an song mi watte.
38 Ewe Samol mi Lapalap a likitala lenian usun eman laion a likitala pwangan. Ewer, fanüer a wiliti eu fanüapö, pokiten ataien maun me än ewe Samol mi Lapalap song mi watte.