7
Salomon a aüetä pwal ekoch imw
7.1-12
1 Iwe, lon ükükün engol me ülüngat ier, Salomon a aüetä püsin imwan o awesi unusan meinisin.
2 Iwe, a aüetä eu imw imwen wöllapen Lepanon, langataman ükükün ipükü lime fiit, chölapan ükükün fik me limu fiit, nge tekian ükükün faik me limu fiit. A wor ülüngat telin ür seni ewe irä setar, nge irälapan seni ewe irä setar ra nom won ekewe ür.
3 Iwe, a wor faik me limefoch ür, engol me limefoch won eu me eu telin. Osun ewe imw a seni ewe irä setar, nge ewe os a soposopowu won ekewe imwen iseis mi nom won ekewe ür.
4 Mi pwal wor asamwacho lon ülüngat tettel, nge eu asamwacho a sunu ngeni pwal eu.
5 Chölapen me tekian ekewe asam ra nönnöfengen, pwal chölapen me tekian ekewe asammwacho ra nönnöfengen, nge eu asammwacho a sunu ngeni pwal eu lon ülüngat tettel.
6 Iwe, Salomon a aüetä eu utten ür, langataman ükükün fik me limu fiit, nge chölapan faik me limu fiit. Mi wor eu kengkangan me fän mesan a wor üran, a pwal wor osun.
7 Salomon a pwal aüetä eu ut fän iten ewe lenien motun king, iei ewe utten kapwüng, ewe ia a eäni kapwüng ie. Iwe, a papeni ngeni ewe irä setar seni fan tori won.
8 Nge püsin imwan a nom lükisökürün ewe utten kapwüng, a wewefengen förün me ei ut. Salomon a pwal aüetä eu imw a wewefengen me ei ut fän iten nöün Farao we fefin a pwülüeni.
9 Ekei imw meinisin ra för seni fau mi mürina, ra fal lon aükük o ngerenger lepekir me lon, pwal lepekir me lükün. Iwe, ra aea ekewe fau won longolongun ekewe imw tori aser, pwal won tittin ewe leni lükün me tittin ewe leni mi watte.
10 Iwe, ekewe longolong ra för seni fau mi mürina o watte ükükün langatamen ekoch engol me ruu fiit, nge ekoch engol me limu fiit.
11 Nge won ekewe longolong a wor fau mi mürina ra fal lon aükük, pwal irälap seni ewe irä setar.
12 Iwe, tittin ewe leni watte mi nom pwelin lükün ewe imwen king a wor ülüngat sässärin fau mi fal, pwal eu sässär seni ewe irä setar. Pwal tittin ewe leni mwen imwen ewe Samol mi Lapalap me kengkangan ra för lon ei sokun lapalap.
Än Huram angang ngeni ewe imwenfel
7.13-51
13 Iwe, ewe king Salomon a titi Huram seni Tirus.
14 Huram nöün eman fefin mi mä pwülüan seni ewe ainangen Naftali, nge saman eman re Tirus. Ätei eman mi sile angang ngeni piras, a fokun tipachem me silelap me sipeöch le föri sokopaten angang ngeni piras. Iwe, a feito ren ewe king Salomon o föri an kewe angang meinisin.
15 Iwe, Huram a föri ruofoch ür seni piras, ükükün tekian efoch me efoch rüe me fisu fit, nge ükükün öün engol me walu fiit. Malülün ewe ür ükükün ülüngat inis, nge lon a pwang.
16 A pwal föri ruu leton seni piras, pwe repwe nom won ekewe ür. Nge tekian eu me eu kewe leton ükükün fisu esop fiit.
17 A afouta ekewe leton ngeni sein mi nut, füpa sein mi nut nge eu leton.
18 A pwal föri uluulun apel o apacheretä lon ruu tettel won pwelin ewe sein mi nut, pwe repwe pwölüela letonen ewe ür. Iwe, a föri iei usun ngeni pwal ewe eu leton.
19 Iwe, letonen ekewe ür ra usun lapalapen pön kiop, ükükün tekiar wonu fit.
20 Ekewe leton mi nom asen ekewe ür ra nom won eu leni mi kukumos ren ewe sein mi nut. Nge mi wor ruupükü uluulun apel lon ruu tettel pwelin eu me eu leton.
21 Iwe, Huram a aüetä ekewe ruofoch ür mesen kengkangen ewe imwenfel. Ewe efoch a aüetä me ör o aita ngeni Jakin, nge pwal ewe efoch a aüetä me efeng o aita ngeni Poas.
22 Ekewe leton mi usun lapalapen pön kiop ra nom asen ekewe ür. Iei usun angangen ekewe ür a wes.
23 Mürin, Huram a föri eu sepien koluk mi fokun watte seni piras. Iwe, a kumosumos, nge chölapan seni epek tori epek ükükün engol me limu fiit, alololun ükükün fisu esop fiit, nge pwelin won aaman ükükün faik me limu fiit.
24 Iwe, pwelin ünükün fän aamen ewe sepien koluk a wor ruu telin uluulun pamkin mi förunusfengen me ewe sepien koluk.
25 Ewe sepien koluk a nom won engol me ruoman uluulun ätemwänin kow, ülüman ra sape ngeni efeng, ülüman ra sape ngeni lotou, ülüman ra sape ngeni ör, nge ülüman ra sape ngeni ötiu. Iwe, ewe sepien koluk a nom wor, nge wänükür a sorolong fan.
26 Malülün ewe sepien koluk ükükün ülüngat inis, nge aaman a usun chök aamen eu kap, usun chök epö pön kiop mi mas. Iwe, masouen ewe sepi ina epwe ükükün engol ngeröü kalon koluk.
27 Huram a pwal föri engol kuruma seni piras. Langatamen me chölapen efoch me efoch ükükün wonu fiit, nge tekian ükükün rüanü esop fit.
28 Iei usun lapalapen förün ekewe kuruma: Mi wor lepekir, ra katupulong lon mächän ekewe pwokuku.
29 Iwe, won lepekir kewe a wor liosun laion, ätemwänin kow me kerop. Nge won mächän ekewe pwokuku, pwal asen me fän ekewe liosun laion me ätemwänin kow a wor lapalapen mwäramwär mi fires.
30 Iteiten efoch me efoch kewe kuruma a wor fofoch willan seni piras me waaser seni piras. Nge won ekewe rüanü pwokuku mi wor peres fän ewe sepi seni piras. Ekei peres ra fout ngeni lapalapen mwärämwär mi fires.
31 Mi pwal wor aamen pwangen won ekewe kuruma, a sükütä won ükükün engol me walu inis o kokotiu won ükükün fisu inis, nge pwangan a kukumos. Iwe, aropen pwelin ewe pwang a wor lios mi rup. Lepekin ekewe kuruma a wor rüanü pekin mi nönnöfengen, nge resap kumosumos.
32 Ekewe rüanü wiil ra nom fän ekewe pekin, nge waasen ekewe wiil ra chök förunusfengen me ewe kuruma. Iwe, tekian efoch wiil ükükün rüe me limu inis.
33 Ekewe wiil ra för usun chök willen woken. Iwe, waasen ekewe wiil me kukumosur, nikaütütür me lukalaper ra för seni piras meinisin.
34 Mi wor rüanü lenien kamwöch lon ekewe rüanü pwokukun iteiten efoch me efoch kuruma. Nge ekewe lenien kamwöch ra förunusfengen me ekewe kuruma.
35 Iwe, asen ekewe kuruma a wor eu rof mi kumosumos ükükün tekian tiu inis. Nge peresin me lepekin ewe kuruma ra förunusfengen me ewe kuruma.
36 Won peresin me lepekin ewe kuruma, pwal ekis meinisin ia a wor leni ie, Huram a ruputi liosun kerop, laion me irä palm, a pwal föri lapalapen mwärämwär mi fires pwelin ünükün.
37 Iei usun Huram a föri ekewe engol kuruma. Ir meinisin a wewefengen nönnör me lapalaper.
38 Huram a pwal föri engol sepi seni piras, eu sepi fän iten efoch me efoch kewe engol kuruma. Ükükün masouen eu me eu sepi ina epwe rüepükü ilik kalon koluk, nge chölapen eu me eu sepi ükükün wonu fiit seni epek tori epek.
39 Huram a anomu limefoch ekewe kuruma peliörün ewe imwenfel, nge limefoch a anomu peliefengin. Iwe, ewe sepien koluk mi fokun watte Huram a anomu lükün pwokukun ewe imwenfel me ötiuörün.
40 Huram a pwal föri nape, söföl me kükün sepi. Iei usun Huram a awesi ekewe angang meinisin a föri fän iten ewe king Salomon me won imwen ewe Samol mi Lapalap.
41 Ikkei mine Huram a föri: Ruofoch ür, ruu leton usun lapalapen sepi mi nom asen ekewe ür, me ruapa sein mi nut ra nom won ekewe ruu leton,
42 föpükü uluulun apel fän iten ekewe ruapa sein mi nut, ruu telin uluulun apel won epa sein mi nut pwe repwe nom won ekewe ruu leton,
43 engol kuruma me engol sepi mi nom won ekewe kuruma,
44 ewe sepien koluk mi fokun watte me ekewe engol me ruoman uluulun ätemwänin kow mi nom fan,
45 pwal nape, söföl me kükün sepi. Ekei pisek meinisin Huram a föri seni piras mi misimis fän alon ewe king Salomon fän iten imwen ewe Samol mi Lapalap.
46 Iwe, ewe king a föri ekei pisek me lon ewe lenien ketel me för pisek seni mächä lon pan seni pwülüpar lefilen Sukot me Saretan lon maasiesin ünükün ewe chanpupu Jortan.
47 Nge Salomon esap kiloni ekewe pisek, pun ra kon chomong. Iei mine esap fat ükükün choun ewe piras.
48 Iwe, Salomon a pwal föri pisekin lon imwen ewe Samol mi Lapalap meinisin seni kolt: Ewe rongen asor, ewe chepel fän iten ewe pilawa mi pin,
49 ekewe lenien atittin, limefoch ra nom peliör, nge limefoch ra nom peliefeng me mwen ewe rum mi unusen pin. A föri ekewe ululun pön irä, ekewe lamp me ekewe acchip,
50 ekewe kap, ekewe fich, ekewe sepi mi kükün, pwal ekewe sepi fän iten apach mi pwokus me ekewe sepi fän iten moli. Iwe, a pwal föri inisesin ekewe asamen ewe rum mi unusen pin me ekewe asamen lon ewe imwenfel. Ekei pisek meinisin ra för seni kolt.
51 Lupwen a wes ewe angang meinisin ewe king Salomon a föri won imwen ewe Samol mi Lapalap, Salomon a uwato ekewe pisek Tafit saman we a apini, ewe silifer me kolt me ekewe sepi, o iseniir lon ekewe lenien iseis pisek mi aüchea me lon imwen ewe Samol mi Lapalap.