21
Jesus a tolong lon Jerusalem fän än aramas mweireir
21.1-11
(Mark 11.1-11; Luk 19.28-40; Joh 12.12-19)
1 Lupwen Jesus me nöün kewe chon kaiö ra tori Petfake arun ewe Chukun Olif, arap ngeni Jerusalem, Jesus a tinala ruoman ekewe chon kaiö pwe repwe akomwola mwer.
2 Iwe, a üreniir, “Oupwe feila lon ewe sopw mi nom mwemi. Lupwen oupwe tolong lon, oupwe müttir küna eman aas a riri ikenan, nge nöün a nom ren. Oupwe apichiir o emweniireto rei.
3 Nge are eman epwe apasa och ngenikemi, oupwe üreni, ‘Äm samol a mochen wawa.’ Mürin ätewe epwe mwütiritä lon ewe chök otun.”
4 Ei a fis, pwe epwe pwönüetä mine ewe soufos a apasa:
5 “Oupwe üreni chon ewe telinimw Sion:
Nengeni ämi king a feito remi!
A tipetekison o wawa eman aas,
me eman nienifön aas.”
6 Iei mine ekewe chon kaiö ra feila o föri usun mine Jesus a üreniir.
7 Ra emwenato ewe aas me ewe nienifön aas, ra isetä üfer kewe wor, nge Jesus a mot wor.
8 Iwe, eu mwichen aramas mi chomong ra oletala üfer kewe won ewe al, nge ekoch ra pwal pöküetiu palen irä o enenala won al.
9 Iwe, ekewe chomongun aramas mi akom mwen Jesus, pwal chokewe mi tapweto mürin ra popuetä le kökkö, “Sipwe mwareiti Nöün Tafit! Kot epwe afeiöchü ätewe mi feito fän iten ewe Samol! Ousipwe mwareiti Kot!”
10 Iwe, lupwen Jesus a tolong lon Jerusalem, unusen chon ewe telinimw ra mwökütüküt ren. Ra ais, “Iö ätewe?”
11 Ekewe aramas ra pölüeni, “Iei i ewe soufos Jesus seni Nasaret lon Kalilea.”
Jesus a tolong lon ewe imwenfel
21.12-17
(Mark 11.15-19; Luk 19.45-48; Joh 2.13-22)
12 Iwe, Jesus a tolong lon ewe imwenfel o asüowu ätekewe meinisin mi kamö o amömöla pisek ikenan. A akulätä ekewe chepel än ekewe chon akasiwili moni me ekewe lenien mot än ekewe chon amömö lisom.
13 A üreniir, “A mak lon ekewe Toropwe mi Pin pwe Kot a apasa, ‘Ai imwenfel epwe iteni imwen iotek,’ nge ämi oua awili ngeni eu lenien open chon solä.’ ”
14 Iwe, chomong mi mesechun me chon pechemä ra feito ren Jesus lon ewe imwenfel, nge i a apöchöküleeretä meinisin.
15 Nge lupwen ekewe souasor mi lap me ekewe Sensen Allük ra küna ekewe manaman mi amwarar Jesus a föriir, ra pwal küna ekewe semirit mi kökkö lon ewe imwenfel, “Sipwe mwareiti Nöün Tafit,” ra song.
16 Iei mine ra aisini Jesus, “Ka rongorong mine ekei semirit ra apasa?” Jesus a pölüeniir, “Ewer, üa rongorong. Ousamwo aleani mine a mak lon ekewe Toropwe mi Pin? ‘En ka föri pwe än ekewe semirit me mönükol kölün mwareituk epwe unusöch.’ ”
17 Mürin Jesus a likitiirela, a towu seni ewe telinimw o feila Petania. Ikenan a pwinipwin ie.
Jesus a anümamaua efoch irä fiik
21.18-22
(Mark 11.12-14,20-24)
18 Iwe, lesosorusichin sorotän ewe rän, lupwen Jesus a liwinsefäliti ewe telinimw Jerusalem, a mefi an echik.
19 Nge lupwen an fetal a küna efoch irä fiik lepekin ewe al. Iwe, a asai ngeni, nge esap küna uan, pwe chöön chök. Iei mine a fos ngeni ewe irä fiik, “Esap fokun chüen wor uomw!” Lon ewe chök otun ewe irä fiik a pwasala.
20 Lupwen ekewe chon kaiö ra küna pwe ewe irä a pwasala, ra weitifengeniir o üra, “Ifa usun än ei irä fiik pwasakaila?”
21 Jesus a pölüeniir, “Enlet, üpwe ürenikemi, pwe are oua lükü, nge ousap fokun tipemwaramwar, oupwe tongeni föri met ngang üa föri ngeni ei irä fiik. Nge sap chök ei, nge oupwe fen mwo nge tongeni apasa ngeni ei chuk, ‘Kopwe mwöküt seni ei leni o turulong le matau,’ iwe, epwe fis.
22 Are oua lükülük, oupwe angei mettoch meinisin mine oua tüngor lon ämi iotek.”
Kapas ais usun än Jesus pwüüng
21.23-27
(Mark 11.27-33; Luk 20.1-8)
23 Iwe, Jesus a liwinsefälilong lon ewe imwenfel, nge lupwen a afalafal, ekewe souasor mi lap me ekewe souakomwen chon Juta ra feito ren o aisini, “Ka angei me ia om pwüüng pwe ka föri ekei mettoch? Iö a ngonuk om pwüüng?”
24 Jesus a pölüeniir, “Pwal ngang üpwe aisinikemi eu kapas ais. Are oupwe ngeniei pölüan, üpwe pwal ürenikemi ia üa angei me ie ai pwüüng pwe üpwe föri ekei mettoch.
25 Ia Johannes a angei me ie an pwüüng pwe epwe papatais? A feito seni Kot ika seni aramas?” Iwe, ra popuetä le kapasfengen lefiler, “Met sipwe apasa? Are sipwe üra, ‘A feito seni Kot,’ epwe aisinikich, ‘Pwota chök ousap lükü Johannes?’
26 Nge are sipwe üra, ‘A feito seni aramas,’ sia niuokusiti ekewe aramas, pun ir meinisin ra lükü pwe Johannes eman soufos.”
27 Iei mine ra pölüeni Jesus, “Äm aisap silei.” Iwe, Jesus a üreniir, “Ika ina, ngang üsap pwal ürenikemi ia üa angei me ie ai pwüüng pwe üpwe föri ekei mettoch.”
Pworausen awewe usun ruoman nau
21.28-32
28 “Met oua ekieki? A wor eman mwän a nöüni ruoman alüal. A feila ren ewe mi watte o üreni, ‘Nei, kopwe feila o angang lon ewe tanipin wain ikenai.’
29 Iwe, a pölüeni, ‘Ngang üsap feila.’ Nge me mürin a siwili an ekiek o feila.
30 Mürin ewe sam a feila ren ewe aruomanün nau o üreni usun met a üreni ewe mi watte. Ewe nau a pölüeni, ‘Ewer, ai samol, üpwe feila,’ nge esap feila.
31 Iwe, iö lein ekewe ruoman nau a föri letipen saman?” Iwe, ra pölüeni, “Ewe mi watte.” Iei mine Jesus a üreniir, “Enlet, üpwe ürenikemi, pwe ekewe chon ioni takises me ekewe fin lisowu repwe tolong lon Mwün Kot mwemi.
32 Pun Johannes Soupapatais a feito remi o aiti ngenikemi ewe al mi pwüng oupwe fetal won, nge ämi ousap lükü an afalafal. Nge ekewe chon ioni takises me ekewe fin lisowu ra lükü an afalafal. Inamwo lupwen oua küna ar lükü, ämi ousap siwili ämi ekiek o lükü an afalafal.”
Pworausen awewe usun ekewe chon mälämäl mi ngau
21.33-46
(Mark 12.1-12; Luk 20.9-19)
33 Iwe, Jesus a üra, “Oupwe rongorong ngeni pwal eu pworausen awewe: A wor eman soufanü mi fotuki eu tanipin wain, a föri eu tit ünükün, a tuw eu pwang fän iten ewe lenien üchüch föün wain o aüetä eu imwen mamas mi tekia lon. Mürin a awisa ekoch chon mälämäl pwe repwe tümwünü an tanipin wain. Iwe, a saila lon eu fanü toau.
34 Nge lupwen a tori fansoun kinikin, a tinala nöün kewe chon angang ren ekewe chon mälämäl, pwe repwe angei seniir wisan me lon ekewe föün wain.
35 Iwe, ekewe chon mälämäl ra turufi nöün kewe chon angang. Ra wichi eman, ra niela pwal eman o monei fau ngeni pwal eman.
36 Mürin ewe mwän a pwal tinala ekoch chon angang mi chomong seni ekewe me mwan. Iwe, ekewe chon mälämäl ra pwal föri ngeniir usun met ra föri ngeni ekewe mi akom.
37 Amüchülan a tinala nöün we ren ekewe chon mälämäl, pun a üra, ‘Enlet, repwe meniniti nei we.’
38 Nge lupwen ekewe chon mälämäl ra küna ewe nau, ra kapasfengen lefiler, ‘Iei i alemürin ätewe mine an ei tanipi. Ou etto, ousipwe niela, pwe sipwe angei mine an me ren saman!’
39 Iei mine ra turufi ewe nau, ra aturawu lükün ewe tanipin wain o niela.”
40 Mürin Jesus a aisiniir, “Lupwen mine an ewe tanipin wain epwe war, met epwe föri ngeni ekana chon mälämäl?”
41 Ra pölüeni, “Epwe fokun niela ekana mwän mi ngau o awisa ewe tanipin wain ngeni pwal ekoch chon mälämäl mi awora wisan föün wain lon fansoun kinikin.”
42 Iwe, Jesus a üreniir, “Ousamwo fen aleani lon ekewe Toropwe mi Pin?
‘Ewe fau ekewe chon kaü imw ra pöütala pun resap aücheani
a wiliti ewe föün lepwokuku mi fokun aüchea.
Iei än ewe Samol föför
a fokun amwarar mwen mesach!’
43 Iei mine üpwe ürenikemi, pwe Kot epwe angei senikemi Mwün we o ngeni eu mwichen aramas mi awora ua ren ar föri föför mi pwüng.
44 [Iö a turutiu won ei fau epwe tatakis, nge are ewe fau epwe turutiu won eman, epwe fokun pachach.]”
45 Lupwen ekewe souasor mi lap me ekewe Farisi ra rong än Jesus kewe pworausen awewe, ra mefi pwe a kapas usur.
46 Iei mine ra sotuni ar repwe turufi Jesus, nge ra niuokusiti ewe mwichen aramas, pun ra ekieki ngeni Jesus pwe i eman soufos.