11
Kot a pwon pwe epwe wor ochän chon Israel fituk
11.1-23
1 Nge ekewe aramas ra popuetä le lal ngeni ewe Samol mi Lapalap usun ar weires. Iwe, lupwen ewe Samol mi Lapalap a rong, a song o awora eu ekkei lefiler. A küwu me leir o kenala eu kinikinin lesopun ewe ia ra nonom ie.
2 Mürin, ekewe aramas ra siö ngeni Moses. Nge Moses a iotek ngeni ewe Samol mi Lapalap. Iwe, ewe ekkei a kunula.
3 Iwe, ra aita ngeni ewe leni Tapera , pun ewe ekkei seni ewe Samol mi Lapalap a küwu me leir.
4 Iwe, a wor eu mwichen chon ekis mi ngau mi eti ekewe chon Israel lon ar sai. Ekei aramas ra mwäräkich won fituk, pwal ekewe aramasen Israel ra lalsefäl o apasa, “Amwo sia fen ochoch fituk.
5 Sia chechemeni ekewe ik sia mongö lon Isip, nge sisap möni. Sia pwal chechemeni ach ochoch küri me senia, nengi me anion pwal ninnikü.
6 Nge iei sia chök apwangapwangala. Esap fokun wor och sokun mongö lükün ewe mana sia küna.”
7 Iwe, ewe mana a usun chök kükün föün irä, nge anüwan a oleolepwech.
8 Iwe, ekewe aramas ra fetalfeil o ionifengeni ewe mana, ra pwal fööira lon lenien fööir ika wüsi lon lenien wüsüs. Mürin ra kuku lon nape o nokopuni. Iwe, nennan a usun nennen nokop mi firain lon apüra.
9 Iwe, lupwen amurenipwin a püngütiu lepwin won ewe ia ra nonom ie, ewe mana a pwal püngütiu.
10 Iwe, Moses a rong än ekewe aramas lal lon en me asamalapen imwan imw mangaku lon iteiten en me an famili. Iwe, ewe Samol mi Lapalap a fokun song, nge Moses a weires ren.
11 Iwe, Moses a aisini ewe Samol mi Lapalap, “Pwota ka aweiresiei ngang noum chon angang? Pwota kosap ümöümöch ngeniei pwe ka fen uwätä woi weiresin tümwünün ekei aramas meinisin?
12 Ifa usun, upun woi ir meinisin? Ir nei, pwe kopwe üreniei pwe üpwe pwisiir lepei usun eman chon tümwün a pwisi eman mönükol mi chüen oupw? Ifa usun, üpwe pwisirelong lon ewe fanü ka pwon ngeni ar kewe lewo pwe kopwe ngeniir?
13 Ia üpwe küt me ie fituk pwe üpwe ngeni ekei aramas meinisin? Pun ra lal ngeniei o üra, ‘Kopwe ngenikem fituk pwe aipwe ochoch.’
14 Ngang üsap tufich le akaleäman ngeni weiresin tümwünün ekei aramas, pun a kon chou ngeniei.
15 Nge are kopwe föri iei usun ngeniei, kopwe ümöümöch ngeniei o nieila iei chök pwe üsap chüen küna ei sokun weires.”
16 Iwe, ewe Samol mi Lapalap a üreni Moses, “Kopwe körato rei fik mwän seni lein ekewe souakomwen Israel, chokewe ka sileer pwe ir souakom me sounemenemen ekewe aramas. Kopwe emwenireto ren ewe imw mangaku ia aramas ra churiei ie, pwe repwe etuk le ütä ikenan.
17 Ngang üpwe feitiu o kapas ngonuk ikenan. Iwe, üpwe angei och manamanen ewe ngün mi nom womw o isetä wor. Repwe etuk le mwärelong fän weiresin tümwünün ekewe aramas pwe kosap akaleäman le mwärelong fan.
18 Iwe, kopwe üreni ekewe aramas, ‘Oupwe apinikemi fän iten lesor pwe oupwe ochoch fituk. Pun ewe Samol mi Lapalap a rongorong ämi lal pwal ämi apasa: Iö epwe ngenikem ochäm fituk? Pun aia nonomöch lon Isip. Iei mine ewe Samol mi Lapalap epwe ngenikemi fituk pwe oupwe ochoch.
19 Nge ousap ochoch fituk lon eu chök rän ika ruu rän ika limu rän ika engol rän ika rüe rän,
20 pwe lon unusen eu maram, tori epwe nipoon ngenikemi o notä womi. Pun oua oput ewe Samol mi Lapalap mi nom lefilemi o lal ngeni lupwen oua apasa: Pwota mwo chök sia towu seni Isip?’ ”
21 Nge Moses a üreni Kot, “Iei üa emweni wonopükü ngeröü aramas, nge en ka apasa pwe kopwe ngeniir fituk, pwe repwe ochoch lon ükükün unusen eu maram.
22 Ifa usun, epwe naf ekewe pwiin sip me kow, pwe repwe ninnila fän iter? Ika epwe naf ngeniir ikenen leset meinisin?”
23 Nge ewe Samol mi Lapalap a pälüeni Moses, “Ifa usun, a aükük ai manaman? Iei kopwe küna ika ai kapas ngonuk epwe fis ika esap fis.”
Än ekewe souakom osuni
11.24-30
24 Iwe, Moses a feila o asile ngeni ekewe aramas än ewe Samol mi Lapalap kapas. A emwichato fik mwän seni me lein ekewe souakomwen ekewe aramas o anomuur pwelin ewe imwenfel seni mangaku.
25 Mürin, ewe Samol mi Lapalap a feitiu lon ewe kuchu o kapas ngeni Moses. A angei och manamanen ewe ngün mi nom won Moses o isetä won ekewe fik souakom. Iwe, lupwen ewe ngün a nom wor, ra osuni. Nge mürin resap chüen osunisefäli.
26 Nge mi wor ruoman mwän iter Eltat me Metat ra alealaong lein ekewe fik ra chök nom lon ewe ia ra nonom ie, nge resap feila ren ewe imwenfel seni mangaku. Iwe, ewe ngün a feito wor pwe ra pwal osuni me ewe ia ra nonom ie.
27 Iwe, eman alüal a säla ren Moses o üreni, “Eltat me Metat ra osuni me lon ewe leni ia ra nonom ie.”
28 Nge Josua nöün Nun mwän, nöün Moses we soualilis seni lealüalün, a apasa, “Ai samol Moses, kopwe aükätiu ar osuni.”
29 Nge Moses üreni, “Ifa usun, ka apangau won wisei? Amwo, nöün ewe Samol mi Lapalap aramas meinisin repwe soufos, pwe epwe anomu Ngünün wor.”
30 Mürin, Moses me ekewe souakomwen Israel ra liwiniti ewe ia ekewe aramasen Israel ra nonom ie.
Kot a tinato kweil
11.31-35
31 Iwe, ewe Samol mi Lapalap a awora och asepwäl mi pönato mansüsü iter kweil seni lematau. Iwe, ra nom pwelin ewe ia ekewe aramasen Israel ra nonom ie ükükün langatamen än eman sai lon eu rän me lepelian meinisin, nge ra ässitiu tori ükükün ülüngat fiit seni won pwül.
32 Iwe, ekewe aramas ra ütä o ionifengeni ekewe kweil lon unusen ewe rän me unusen ewe pwin tori unusen ewe rän mürin. Nge ätewe mi chokükün ionian a ioni ükükün ülüngat ngeröü wonopükü paun. Iwe, ra apwaseer pwelin ünükün lenier we.
33 Nge lupwen ra chüen ochoch ewe fituk, nge esamwo itela, ewe Samol mi Lapalap a fokun song ngeniir, pwe a niela ekewe aramas ren eu mätter mi watte.
34 Iei popun ewe leni a iteni Kiprot-atawa , pun ikenan ra peiaseni ekewe aramas mi mwäräkich.
35 Iwe, ekewe aramas ra sai seni Kiprot-atawa o sai ngeni Haserot. Iwe, ra nonom Haserot.