10
Ewe chon läng mi amwöchü echö kükün toropwe
10.1-11
1 Mürin üa küna pwal eman chon läng mi pöchökül, a feitiu seni läng. A pwölüpwölüla ren eu kuchu o eu resim a pwäli won möküran. Won mesan a usun chök akkar, nge pechen kana ra usun chök üreekkei.
2 A amwöchü lon pöün echö kükün toropwe mi suk. Iwe, a ipwetiu won matau ren pelifichin pechen, nge a ipwetiu won fanü ren pelimöngün pechen.
3 Iwe, a kökkö ren mwelian mi leüömong mi wewe ngeni wörüwörün eman laion. Mürin an kökkö, fisu chopulap ra leüömong le pölüeni.
4 Lupwen ekewe fisu chopulap ra kapas, üa mochen makkei met ra apasa. Nge üa rongorong mwelien eman mi kapas seni läng, “Kopwe amonomonala mine ekewe fisu chopulap ra apasa. Kosap makkeetiu!”
5 Mürin ewe chon läng, ewe üa küna pwe a ipw won matau ren efoch pechen, nge ren efoch a ipw won fanü a aitietä pöüifichin läng
6 o a pwon ren an öpölü iten Kot ewe mi manau tori feilfeilachök, ewe mi föri läng me fanüfan me matau pwal meinisin mine a nom lor. Iwe, ewe chon läng a apasa, “Esap chüen wor fansoun witiwit.
7 Nge lon ena rän lupwen ewe afümanün chon läng epwe ettiki nöün rappwa, Kot epwe apwönüetä an we akot mi monomon, usun a fen asile ngeni nöün kewe chon angang ekewe soufos.”
8 Mürin ewe möngüngü üa fen rongorong seni läng a kapassefäl ngeniei, “Kopwe feila o angei ewe toropwe mi suk seni lepöün ewe chon läng mi ipw won matau pwal won fanü.”
9 Iei mine üa feila ren ewe chon läng o tüngor ngeni, pwe epwe ngeniei ewe kükün toropwe. Iwe, a üreniei, “Kopwe angei o äni. Epwe maras me lon lukom, nge epwe arar me lon awom usun chönün chunen.”
10 Mürin üa angei ewe kükün toropwe seni lon pöün o äni. Iwe, nennan me lon awei a arar usun chönün chunen. Nge me mürin ai orumala a maras me lon lukei.
11 Iwe, eman a üreniei, “Kopwe fokun osunisefäli usun chomong mwü, ainang, kapas me king kana.”