1 Mürin, Samuel a angei eu rumen lö o ninätiu won möküren Saul, a mitiri o üreni, “Ewe Samol mi Lapalap a epituk pwe kopwe samolun nöün aramasen Israel. Kopwe nemenem won nöün ewe Samol mi Lapalap aramas o angaseer seni chon oputeer mi nom ünükür. Nge ei epwe eu asisil ngonuk, pwe ewe Samol mi Lapalap a epituk pwe kopwe samolun nöün aramas: 2 Lupwen kopwe feil seniei ikenai, kopwe churi ruoman mwän ünükün peiasen Rahel me lon Selsa lon kinikinin ewe fanü Peniamin. Iwe, repwe ürenuk pwe ekewe aas ka feila o kütteer ra pwä. Iei semom a ükütiu le ekieki ekewe aas, nge a aürekikemi o apasa, ‘Met üpwe för ngeni nei we mwän?’ 3 Mürin kopwe feila seni ikenan o tori ewe ook lon Tapor. Ikenan kopwe churi ülüman mwän mi feitä Petel pwe repwe asor ngeni Kot. Eman ina epwe nuki ülüman apanen kuuch, eman epwe uwei ülüfoch pilawa, nge eman epwe uwei eu rumen wain seni silin man. 4 Iwe, repwe kapong ngonuk o fang ngonuk ruofoch pilawa, nge kopwe angei seniir. 5 Mürin kopwe feila Kipiat-elohim * ia a wor ie eu mwichen sounfiun Filistia. Lupwen kopwe tori ewe telinimw, kopwe churi eu mwichen soufos ra feitiu seni ewe lenien fel won ewe chuk, nge chon ettik kitar me pisekin kaktai, aangün me ükülele ra akom mwer. Iwe, ekewe soufos repwe osuni. 6 Mürin, Ngünün ewe Samol mi Lapalap epwe fokun feitiu womw. Iwe, kopwe etiir le osuni, nge manauom epwe siwil. 7 Lupwen ekei asisil repwe toruk, kopwe föri meinisin mine ka wisen föri, pun Kot epwe etuk. 8 Iwe, kopwe akomwetiu me mwei Kilkal. Ngang üpwe feila reöm pwe üpwe eäni asoren kek me asoren kinamwe. Kopwe witiwitiei lon ükükün fisu rän, tori üpwe feito reöm o ürenuk mine kopwe föri.”

9 Nge lupwen Saul a kul seni Samuel pwe epwe feila, Kot a fang ngeni eu leluk mi fö. Iwe, ekewe asisil meinisin ra fisitä lon ewe ränin. 10 Lupwen Saul me nöün we chon angang ra tori Kipea, a churi eu mwichen soufos. Lon ei otun Ngünün Kot a feitiu won Saul pwe a osuni me leir. 11 Iwe, lupwen ekewe aramas mi silei Saul me lom ra küna pwe a eti ekewe soufos le osuni, ra kapasfengen lefiler, “Met a fis ngeni nöün Kis ei mwän? Ifa usun, Saul a pwal eman lein ekewe soufos?” 12 Nge eman mwän me lon ewe leni a apasa, “Ifa iten semer?” Iei mine a fis ei mwiitun, “Ifa usun, Saul a pwal eman lein ekewe soufos?” ✡ 13 Nge lupwen Saul a wes me osuni, a feila ngeni ewe lenien fel won ewe chuk.

14 Iwe, pwin semen Saul a churi Saul me nöün we chon angang o aisiniir, “Ia oua feila ie? Saul a üreni, “Aia kütta ekewe aas. Nge lupwen aisap küneer, aia feila ren Samuel.” 15 Mürin, pwin semen Saul a üreni, “Kose mochen pwäri ngeniei mine Samuel a ürenikemi.” 16 Nge Saul a üreni pwin seman, “A afata ngenikem pwe ekewe aas ra pwä.” Nge esap pwäri ngeni pwin saman we mine Samuel a kapas ngeni usun an epwe king.

17 Iwe, Samuel a amwichafengeni ekewe aramasen Israel fän mesen ewe Samol mi Lapalap me lon Mispa 18 o üreniir, “Iei alon ewe Samol mi Lapalap ewe Koten Israel, ‘Üa emwenikemiwu seni Isip o amanauakemi seni ekewe chon Isip, pwal seni chon ekewe mwü mi ariaföüükemi.’ 19 Nge ikenai oua pöütala ämi we Kot mi amanauakemi seni ämi feiengau me riaföü meinisin. Ämi oua apasa, ‘Kopwe seikätä eman nöüm king.’ Iei mine iei oupwe feito fän mesen ewe Samol mi Lapalap lon en me an ainang, pwal lon en me an eterekes.”

20 Mürin, Samuel a emwenato ekewe ainangen Israel meinisin pwe epwe fis üttüt wor. Iwe, ewe ainangen Peniamin a är. 21 Mürin a emwenato ewe ainangen Peniamin lon en me an famili. Iwe, ewe familien Matri a är. Lesopolan a emwenato eman me eman mwän seni ewe familien Matri. Iwe, Saul nöün Kis we mwän a är. Nge lupwen ra kütta Saul, resap tongeni küna. 22 Iei mine ra aissefäl ngeni ewe Samol mi Lapalap, “Ifa usun, ewe mwän a feito ikei?” Nge ewe Samol mi Lapalap a pälüeni, “Ina i, a op lein ekana pisek.” 23 Mürin ra sä o nukieto seni ikenan. Nge lupwen a ü lein ekewe aramas, a langatam seniir meinisin seni afaran tori ulungen möküran. 24 Iwe, Samuel a üreni ekewe aramas meinisin, “Iei i ewe mwän ewe Samol mi Lapalap a filätä. Esap fokun wor eman mi wewe ngeni lein ekewe aramas meinisin.” Iwe, ekewe aramas meinisin ra kökkö fän leüömong, “Ewe king epwe manauatam.”

25 Mürin, Samuel a aiti ngeni ekewe aramas pwüngün wisen eman king me an angang. Iwe, a makerelong lon eu puk o iseis lon eu leni mi pin. Mürin Samuel a tinsefälirela eman me eman ngeni lenian. 26 Iwe, pwal Saul a liwiniti lenian lon Kipea, nge mwän mi pöchökül o pwora ra eti, pun Kot a angang lon leluker. 27 Nge mi wor ekoch mwän mi aramasangau ra üra, “Ren met ei mwän a tongeni amanauakich?” Iwe, ra aücheangaua, nge resap uwato ar lifang ren. Nge Saul a chök asorongorongola.