Chru PƠH-TƠBIĂ PƠNUAĬ TƠRĐƠŬ 4

TƠGRƠ̆ PƠNUAĬ HŨ RÀNG-TƠBIĂ TƠ JĂNG

(Mư̆ng tăl 4:1 truh tăl 22:5)

Pơnuaĭ Duh-Dơlbăt Tơ Ngŏ Lơngì

1 Hơdơi mư̆ng nư̆n, dơlhă c̆ơ, sơ̆ng dih, sa boh bơh 'băng pơh tơbiă tơ ngŏ lơngì, sơ̆ng săp bloh mư̆ng dơlhơu dơlhă hũ mơhư̆, dơlờng dơnài yơu săp kơlwờk, đờm sơ̆ng dơlhă lài: “Đì bĕ tơ ngŏ ni, Kơu rơŭ pơto tơ hã 'buh tơgrơ̆ pơnuaĭ păl tơbiă truh hơdơi ni.”

2 Lăm tơk mư, dơlhă hũ dò lăm Bơngă Sơc̆ih-Sri, sơ̆ng dih, tơ ngŏ lơngì hũ sa boh sơbàn, tơ ngŏ sơbàn hũ sa Pô dò guh. 3 Pô dò guh tơ ngŏ sơbàn c̆ơ mơhiơ̆ yơu pơtơu-màng kò-sơrdah *sơ̆ng pơtơu-màng ia-kĕ mơr-yah, † tòmdăr sơbàn hũ dơwàng đĭng-yàng mơhiơ̆ yơu pơtơu-màng ia-mơtah sơla kơyơu. ‡ 4 Tòmdăr sơbàn hũ dua pluh pà boh sơbàn pơkơ̆n, tơ ngŏ du sơbàn nư̆n hũ dua pluh pà aràng mơnih gơnuăr-tha dò guh, rùp c̆ù ào kò, akŏ klŭm kơlmu-pơtau sơ̆ng mừh.

5 Mư̆ng sơbàn kơc̆rà tơbiă du c̆ă-kơrla, săp đờm sơ̆ng săp grơ̆m-kơtàl; găm sơ̆ng tơjuh apui đèng sơrdah kơc̆rà tơ anaŭ sơbàn, nư̆n la tơjuh bơngă gơdrưh Yàng Pô Lơngì. 6 Tơ anaŭ sơbàn hũ hơgĕ yơu ia-tơsì sơrdah 'blĕng mơhiơ̆ yơu krơh. Tơkrah sơbàn sơ̆ng tòmdăr sơbàn hũ pà Jơi-Phơ̆n Hơdiŭ, gah anaŭ sơ̆ng gah rŏng baŭ du găr mơta. 7 Jơi-Phơ̆n Hơdiŭ sa mơhiơ̆ yơu rơmòng-sơnuh, Jơi-Phơ̆n Hơdiŭ dua mơhiơ̆ yơu lơmo tơno, Jơi-Phơ̆n Hơdiŭ klơu hũ 'bò mơta mơhiơ̆ yơu 'bò mơta mơnih, sơ̆ng Jơi-Phơ̆n Hơdiŭ pà mơhiơ̆ yơu c̆ĭm klàng-prŏng dò pơ̆r. 8 Pà Jơi-Phơ̆n Hơdiŭ nư̆n, yàu drơi hũ năm boh siạu, tòmdăr sơ̆ng gah dơrlăm baŭ du găr mơta; hơrơi mơlăm đờm mĭt 'buh pơdơh:

“Sơc̆ih-sri, sơc̆ih-sri, sơc̆ih-sri,

Yàng la Yàng Pô Lơngì Gơnăp-Gơnuăr Wĭl-Tơ̆l,

Pô Hũ Mư̆ng Dơlhơu Bơjơ, Tŭ Ni Hũ, sơ̆ng Rơŭ Truh!”

9 Yàu tŭ du Jơi-Phơ̆n Hơdiŭ nư̆n pơyă pơnuaĭ màng-kơc̆rà, pơnuaĭ màng-rơyŭ sơ̆ng pơnuaĭ ưnjơmừn đì tơ Pô dò guh tơ ngŏ sơbàn, la Pô hơdiŭ rài pơdò rài, 10 nư̆n dua pluh pà aràng mơnih gơnuăr-tha pơđih rùp tơ anaŭ Pô dò guh tơ ngŏ sơbàn, sơ̆ng c̆ĕ-dơlbăt Pô hơdiŭ rài pơdò rài. Buơl guñu daŭ kơlmu-pơtau drơi tơ anaŭ sơbàn, sơ̆ng đờm:

11 “Khoai Yàng Pô Lơngì la Yàng buơl anà,

Yàng iơŭ păl biă đồ-mă pơnuaĭ màng-kơc̆rà, pơnuaĭ màng-rơyŭ sơ̆ng gơnăp-gơnuăr,

Kơyoa Pô hũ c̆rơ̆ng-tơbiă abih tơgrơ̆ jơi-phơ̆n,

Sơ̆ng kơyoa hơtai-khiăng Yàng bloh abih tơgrơ̆ jơi-phơ̆n hũ sơ̆ng hũ c̆rơ̆ng-tơbiă.”

* 4:3 Angăn mơta pơtơu-màng ni la Jesper. † 4:3 Angăn mơta pơtơu-màng ni la Kornelian, ‡ 4:3 Angăn mơta pơtơu-màng ni la Emeralt.