3
Ida sarëɗiŋ vë Eden hna
1 Awa, hnë fop wulaw̃ wule ntiko Ahwëhn a W̃ënu ŋa, lën ỹa yeho ale ỹak ritëka. Tëƴëkawo asëval a: «Paryi bi ntehnëk W̃ënu ŋa: “Antë aroku vatëh vambë sarëɗiŋ vi fop!”»
2 Asëval a më ntëkwaka: «Hali, koɗëfun rokëfu.
3 Ɓare soŋe atëh nte ye fagant sarëɗiŋ ŋi, W̃ënu ŋa më lehnëk: “Antë aroku do antë aỹaku; ge gena më cëmëɗun!”»
4 Awa lën ỹa më ntehnëka asëval a: «Muk! Cëmëɗiluhna!
5 W̃ënu ŋa nësëk umë kaɓi njëtëk, hale tokëɗun, vinkër hun va ŋesëɗ do nkeɗun had Umë dënk: njëtëɗun ile yivëk g'ile w̃ek.»
6 Asëval a kamahnëko atëh ŋa nkwamëk njëki do tëfëka nëŋ toki. Ñaɗëho tok nuỹahna uyët. Awa më kwëcëk do tok. Më njëɗaka fëna asanu do umë fëna më tokëk.
7 Taŋ piɗëtalehnëhni vinkër va, do kamahnëlehnëni wëtata fo nkeni. Më mbahnëni yaryef atëh nte w̃acik anuỹ ŋa do palani.
8 Awa g'anëka ga, më nkwëryëniha Ahwëhn a W̃ënu ŋa, sarëɗiŋ hna njasëlehnëɗëho. Asan a g'asëvalu umë cow̃ani hnë vatëh vamb sarëɗiŋ hna soŋe antë nuhni Ahwëhn a W̃ënu ŋa.
9 Ahwëhn a W̃ënu ŋa më macëka asan a, tëƴa: «Ne nkeru?»
10 Më ntëkwak: «Nkwëryakëmi, më ntakëko kaɓi wëtata fo yeɓu. Awa më sow̃aɓu.»
11 Ahwëhn a W̃ënu ŋa më tëƴëka: «Mo fëƴaki wëtata fo yeru? Tokëru bi atëh nte vañëhnëmino ŋa?»
12 Asan a më ntëkwak: «Asëval, ale yëɗaruhow̃a yefu ỹa, umë yëɗako atëh tac, do tokëɓu.»
13 Awa Ahwëhn a W̃ënu ŋa më ntehnëka asëval a: «Soŋe ye liru iỹin?»
Më ntëkwak: «Lën ỹa tokako, do tokëɓu atëh ŋa.»
14 Awa Ahwëhn a W̃ënu ŋa më ntehnëka lën ỹa:
«Kaɓi ntiru iỹin, araɓi nkeỹi w̃eh.
Hnë wusaw̃ gë wulaw̃ wule ntik W̃ën hna fop,
wëjë g'iɗonk hu ŋi rëkëɗu ayasënd
do ahohnënd ivëɗ
hnë wafac hu hna fop.
15 Ntiɗëfu takëla yëbëlan hun wëjë g'asëval a,
yëbëlan vële nagëɗ va do gë vële hnagëɗu va.
Vële nagëɗ asëval a nihëɗënihi nkaf ŋi,
do wëjë itak ŋi ỹarëɗuhëhni.»
16 Tac Ahwëhn a W̃ënu ŋa më ntehnëka asëval a:
«Ntiɗëfu horot sankaf hnë waryonk hnag hu hna,
rëkëɗu ahorotënd ahnagahnëndëhni vutah hu va.
Iña hu ŋa hnë asan hu hna nkeɗ,
ɓare umë hwëhnëɗëhi.»
17 Awa tac Ahwëhn a W̃ënu ŋa më ntehnëka asan a: «Maw̃ëru wanës asëval hu ŋa do tokëru atëh nte vañëhnëmino ŋa.
«Soŋe ile lëntëru ỹi,
araɓi nkal iŋi me.
Rëkëɗu ahorotënd ɗus
ahnuỹahnënd ile rokëɗu ỹa
hnë wafac hu hna fop;
18 inkal iŋa pëhnëndanëɗ
wadëmpëhn do idël meh.
Do tëfëka arok
ile fëhnëɗ wëhaỹ hna;
19 gë ŋacëŋac hu ŋa rëkëɗu ahnuỹand ile rokëɗu ỹa,
hafo avoka g'inkal
nte hnufiko aỹahani ŋa.
Kaɓi inkal yeru,
do g'inkal mbokaɗu.»
20 Asan a Adam maciko do umë Ev macëkawo asëvalu. Umë fëhnëtanëɗ «Uwám» kaɓi umë ye hnëm vahnë ỹa fop.
21 Ahwëhn a W̃ënu ŋa më ntinëhnëkëhni asan a g'asëvalu viỹi waƴand do cuɗahni.
22 Tac më ntehnëk: «Awa ahn'a had Fuhnë nke: njëtëk ile yivëk g'ile w̃ek. Tame, tëfëka memaỹehni antë tëkën atëh ante yëɗahneɗ uwám usër w̃a; age tokëk, cëmëɗina muk.»
23 Awa Ahwëhn a W̃ënu ŋa më ntakëhni sarëɗiŋ vë Eden hna, soŋe njini njamëndëni nkal nte nufiniho do ntiyini ŋa.
24 Ga ntaka ahn'a sarëɗiŋ vë Eden hna, Ahwëhn a W̃ënu ŋa më kwëtëkëhni gë pëhna lav haryënkw sarëɗiŋ hna wamëleka wade ye vëyëka, (waseruben maciniho). Gë sëlame hwëɗëh ile wërënaɗëho vacape va fop, wamëleka ŋa ankaw̃ ante yihahnëɗe g'atëh ante yëɗahnëɗ uwám usër w̃a njëkaɗëniho.