22
ᐱᒫᑎᓯᔫ ᓰᐲᐦ
1 ᐁᒄ ᐆ ᐁᓐᒋᓪ ᑳ ᐯᒋ ᐙᐸᐦᑏᑦ ᓰᐲᔫ᙮ ᐊᓐ ᒫᒃ ᓂᐲᐦ ᐊᓂᑦ ᐊᓐ ᓰᐲᐦ ᐁᑯᑦ ᐌᐦᒋ ᒥᔭᑲᓅᑦ ᐊᐌᓐ ᑳᒋᒉ ᐱᒫᑎᓰᐎᓂᔫ᙮ ᓈᔥᒡ ᒌ ᐙᔐᔮᑲᒥᔔ ᐊᓐ ᓂᐲ ᒬᐦᒡ ᐊᓯᓃᔥ ᐙᓭᓂᐦᑖᑲᓈᐱᔅᒄ ᐁ ᐃᔥᐱᔥ ᔖᑆᐤ ᐙᓭᔮᐱᔅᒋᓯᑦ ᐁᑯᓐ ᑳ ᐃᑖᑲᒥᐦᒡ ᐊᓐ ᓂᐲ᙮ ᔒᐹ ᒋᔐᒪᓂᑑ ᐁᒄ ᒫᒃ ᐊᓐ ᒫᓂᔥᒑᓂᔥ ᐅᒋᔐᐅᒋᒫᐤ ᑌᐦᑕᐳᐎᓂᐙᐦᒡ ᐁᑯᑌ ᑳ ᐅᐦᑖᒎᐦᒡ ᐆ ᓰᐲ᙮
2 ᑌᑖᐅᔅᑲᓅ ᒫᒃ ᐊᓐ ᒥᔅᑕᒣᔅᑲᓅ ᐊᓂᑦ ᐊᓐ ᐃᐦᑖᐎᓐ ᐁᑯᑦ ᐯᒫᒎᐦᒡ᙮ ᐄᑑᑳᒻ ᒫᒃ ᐊᓐ ᓰᐲ ᒌ ᒋᒥᓲᒡ ᒥᔅᑎᑯᒡ ᐊᓂᑦ ᐌᐦᒋ ᐊᔮᑦ ᐊᐌᓐ ᐱᒫᑎᓰᐎᓂᔫ᙮ ᐁᔑᑯᒻ ᐲᓯᒻ ᒫᒃ ᒌ ᓂᐦᑖᐅᒋᓐ ᒦᓐᓴ ᐊᓂᑦ ᐊᓂᒌ ᒥᔅᑎᑯᒡ, ᓃᔓᔖᑆᐤ ᐯᔭᒄ ᐱᐳᓐ᙮ ᐊᓂᔫ ᒫᒃ ᓃᐱᓰᐦ ᐁᑯᑦ ᐌᐦᒋ ᒦᓄᐙᒋᐦᐄᓱᑣᐤ ᒥᓯᐌ ᐁ ᐃᑎᔅᑳᓀᓯᑣᐤ ᐊᐌᓂᒌ᙮
3 ᓇᒧᐃ ᒫᒃ ᐁᒄ ᒦᓐ ᓂᐦᑖ ᒋᑲ ᐅᐦᒋ ᐃᐦᑕᑯᓐ ᐊᓂᑦ ᐃᐦᑖᐎᓂᐦᒡ ᒉᒀᓐ ᒉᒌ ᐃᑗᑦ ᒋᔐᒪᓂᑑ ᐁ ᐅᐦᑳᑌᔨᐦᑕᐦᒃ᙮
ᒋᔐᒪᓂᑑ ᑲᔦ ᐊᓐ ᒫᓂᔥᒑᓂᔥ ᐅᒋᔐᐅᒋᒫᐤ ᑌᐦᑕᐳᐎᓇᐙᐤ ᒋᑲ ᐃᐦᑕᑯᓂᔫ ᐊᓂᑦ ᐃᐦᑖᐎᓂᐦᒡ᙮ ᒋᑲ ᓅᒌᔥᑖᑰ ᒫᒃ ᒋᔐᒪᓂᑑ ᐅᑖᐸᒋᐦᐋᑲᓐᐦ᙮
4 ᐌᒌᐦᒡ ᒋᑲ ᐙᐸᐦᑕᒥᔫᐦ ᐅᑖᔥᑕᒧᐦᒄ᙮ ᐅᑎᔑᓂᐦᑳᓱᐎᓐ ᒋᑲ ᒪᓯᓈᑌᔫ ᐅᔅᑲᐦᑎᑯᐐᐦᒡ᙮
5 ᓇᒧᐃ ᐐᔅᑲᒡ ᒋᑲ ᐅᐦᒋ ᑎᐱᔅᑳᐤ ᐊᓂᑦ᙮ ᓇᒧᐃ ᑲᔦ ᑲᑕ ᐅᐦᒋ ᓂᑐᐌᔨᐦᑕᒧᒡ ᐙᔥᑌᓇᒫᑲᓐᐦ ᑲᔦ ᓇᒧᐃ ᒋᑲ ᐅᐦᒋ ᓂᑕᐌᔨᒣᐅᒡ ᐲᓯᒻ ᒉᒌ ᐙᔥᑌᓇᒫᑯᑣᐤ᙮ ᐌᔥ ᐊᓂᔫ ᐁ ᐃᔥᐱᔥ ᒌᐦᑳᔮᔥᑐᐌᔨᒡ ᒋᔐᒪᓂᑑ ᐁᐅᒄ ᐅᔫ ᒉ ᐅᐙᔅᑌᓂᒫᑲᓂᑣᐤ᙮ ᑳᒋᒉ ᒫᒃ ᑲᑕ ᒋᔐᐅᒋᒫᐅᒡ᙮
ᔖᔥ ᐐᐸᒡ ᒋᑲ ᑕᑯᔑᓐ ᒌᓴᔅ
6 ᐁᒄ ᐊᓐ ᐁᓐᒋᓪ ᑳ ᐯᒋ ᐄᔑᑦ, ᑖᐺᒪᑲᓂᔫ ᐅᔫ ᑳ ᐃᑗᑦ ᑲᔦ ᒉᔥᑎᓈᑌᔨᐦᑖᑯᓂᔫ ᐁᑯᓐ ᒉ ᐃᔅᐸᔨᐦᒡ᙮ ᐅᑎᐯᔨᐦᒋᑫᐤ ᒋᔐᒪᓂᑑ, ᐊᓐ ᑳ ᒦᔮᑦ ᐅᒋᔅᒋᐌᐦᐄᒉᓲᐦ ᐎᔭ ᐅᑕᐦᒑᐦᑾ ᒉᒌ ᐲᐦᒋᔥᑳᑯᔨᒡ, ᒌ ᐯᒋ ᐃᑎᔕᐦᐌᐤ ᐅᑌᓐᒋᓚᒻ ᒉᒌ ᐙᐸᐦᑎᔮᔨᒡ ᐅᑖᐸᒋᐦᐋᑲᓐᐦ ᑖᓐ ᒉ ᐃᔅᐸᔨᔨᒡ ᔖᔥ ᐐᐸᒡ᙮
7 ᒌᓴᔅ ᒫᒃ ᐃᑌᐤ, ᓂᑐᐦᑕᒧᒄ, ᔖᔥ ᐐᐸᒡ ᓂᑲ ᑕᑯᔑᓐ᙮ ᑖᐺ ᑲᑕ ᔕᐌᔨᒫᑲᓅ ᐊᐌᓐ ᒉ ᓇᓂᐦᐄᐦᑕᐦᒃ ᐅᔫ ᐊᔨᒧᐎᓂᔫ ᑖᓐ ᑳ ᐃᔑ ᐙᐸᐦᑏᐌᔨᒡ ᒋᔐᒪᓂᑑ ᐅᑕᐦ ᒪᓯᓇᐦᐄᑲᓂᐦᒡ ᐁᔥᒄ ᒉ ᐃᔅᐸᔨᔨᒡ᙮
8 ᓂᔭ, ᒞᓐ, ᓂᔭ ᓂᒌ ᐯᐦᑌᓐ ᑲᔦ ᓂᒌ ᐙᐸᐦᑌᓐ ᒥᓯᐌ ᐅᔫᐦ ᒉᒀᔫ᙮ ᐃᔅᑯᑕᒃ ᒫᒃ ᑳ ᒌᔑᐸᔨᐦᒡ ᐁ ᐯᐦᑕᒫᓐ ᑲᔦ ᐁ ᐙᐸᐦᑕᒫᓐ ᐅᔫᐦ ᒉᒀᔫ ᐁᒄ ᑳ ᓅᒌᔥᑑᒃ ᐁ ᐅᒋᐦᒌᐦᑯᓂᐸᔨᐦᐅᔮᓐ ᐅᐦᒋᔥᑰ ᐁ ᐃᐦᑖᑦ ᐊᓐ ᐁᓐᒋᓪ ᑳ ᐙᐸᐦᑏᑦ ᐅᔫ ᒉᒀᔫ᙮
9 ᒥᒄ ᒫᒃ ᓂᒌ ᐃᑎᒄ, ᐁᑳ ᐯᒋ ᓅᒌᔥᑑᐦ᙮ ᐌᔥ ᑲᔦ ᓂᔭ ᓂᑕᑐᔥᑯᐙᐤ ᒋᔐᒪᓂᑑ ᒬᐦᒡ ᒌ ᐁ ᐃᐦᑎᔨᓐ ᑲᔦ ᒫᒃ ᒬᐦᒡ ᐁ ᐃᐦᑎᑣᐤ ᒌᒋᔖᓂᒡ, ᐊᓂᒌ ᑳ ᒋᔅᒋᐌᐦᐄᒉᑣᐤ ᐁᒄ ᒫᒃ ᐊᓂᒌ ᑳ ᓇᓂᐦᐄᐦᑕᐦᒀᐤ ᑖᓐ ᐁ ᐃᑕᔥᑌᔨᒡ ᐅᑕᐦ ᒪᓯᓇᐦᐄᑲᓂᐦᒡ᙮ ᒋᔐᒪᓂᑑ ᐁᐅᒄ ᓅᒌᔥᑑ᙮
10 ᐁᒄ ᒦᓐ ᑳ ᐯᒋ ᐄᔑᑦ, ᐁᑳᐐ ᒌᒨᑦ ᑲᓄᐌᔨᐦᑕᐦ ᑖᓐ ᐁ ᐃᔑ ᐋᔨᒨᑌᒡ ᐅᑕᐦ ᒪᓯᓇᐦᐄᑲᓂᐦᒡ ᐁᔥᒄ ᒉ ᐃᔅᐸᔨᐦᒡ᙮ ᐌᔥ ᔖᔥ ᐯᔓᓈᑯᓐ ᒉ ᐃᔅᐸᔨᐦᒀᐤ ᐅᔫᐦ ᒉᒀᔫ᙮
11 ᐁᒄ ᒫᒃ ᐊᓐ ᐊᐌᓐ ᑳ ᒪᒑᑎᓰᑦ ᐁᑯᔥ ᔮᐸᒡ ᒋᑲ ᒪᒑᑎᓯᔫ᙮ ᑲᔦ ᐊᓐ ᐊᐌᓐ ᓂᑕᐐᓐ ᑳ ᐃᐦᑎᑦ ᐁᑯᔥ ᔮᐸᒡ ᓂᑕᐐᓐ ᒋᑲ ᐃᐦᑑ᙮ ᐁᒄ ᐊᓐ ᐊᐌᓐ ᑳ ᑯᐃᔅᑯᑖᑎᓰᑦ ᐁᑯᔥ ᔮᐸᒡ ᑲᑕ ᑯᐃᔅᑯᑖᑎᓯᔫ᙮ ᑲᔦ ᐊᓐ ᐊᐌᓐ ᑳ ᐸᔦᐦᒋᓰᑦ ᔮᐸᒡ ᒉ ᐸᔦᐦᒋᓰᑦ᙮ ᐁᐅᒄ ᐅᔫ ᑳ ᐃᑗᑦ ᐊᓐ ᐁᓐᒋᓪ᙮
12 ᒌᓴᔅ ᐃᑌᐤ, ᓂᑐᐦᑕᒧᒄ, ᔖᔥ ᐐᐸᒡ ᓂᑲ ᑕᑯᔑᓐ᙮ ᓂᑲ ᐯᑖᓐ ᒫᒃ ᑖᓐ ᒉ ᐃᔑ ᑎᐸᐦᐊᒨᒃ ᒥᓯᐌ ᐊᐌᓐ ᒥᒄ ᑖᓐ ᑳ ᐃᐦᑎᑴ᙮
13 ᐁᐅᒄ ᓂᔭ ᔖᔥ ᑳ ᐃᐦᑖᔮᓐ ᐁᔥᒄ ᐁᑳ ᒥᑐᓐ ᒉᒀᓐ ᐅᐦᒋ ᐃᐦᑕᑯᐦᒡ ᑲᔦ ᐁᐅᒄ ᓂᔭ ᐁᔥᒄ ᒉ ᐃᐦᑖᔮᓐ ᐃᔅᑯᑕᒃ ᒥᓯᐌ ᒉᒀᓐ ᒌᔑᐸᔨᐦᒉ᙮ ᐁᐅᒄ ᓂᔭ ᓃᔥᑕᒻ ᑳ ᐃᐦᑖᔮᓐ ᑲᔦ ᐁᐅᒄ ᓂᔭ ᒫᐦᒋᔥᑕᐃ ᒉ ᐃᐦᑖᔮᓐ᙮ ᐁᐅᒄ ᓂᔭ ᒥᓯᐌ ᒉᒀᔫ ᑳ ᒋᐦᒋᐸᔨᐦᑖᑦ ᑲᔦ ᐁᐅᒄ ᓂᔭ ᒉ ᒌᔑᐦᑖᔮᓐ ᒥᓯᐌ ᒉᒀᓐ᙮
14 ᑖᐺ ᑲᑕ ᔕᐌᔨᐦᑖᑯᓲᒡ ᐊᓂᒌ ᑳ ᐸᔦᐦᒋᐦᑖᑣᐤ ᐅᒉᒀᓂᒧᐙᐤ᙮ ᐁᐅᒄ ᐅᒌ ᒉ ᑌᐱᒉᔨᐦᑖᑯᓯᑣᐤ ᒉᒌ ᐲᐦᒉᑣᐤ ᐊᓂᔫ ᐃᐦᑖᐎᓂᔫ ᑲᔦ ᒉᒌ ᐅᑎᓇᒫᓱᑣᐤ ᒦᓂᔕᐦ ᐊᓂᑌ ᐅᐦᒋ ᐊᓂᔫᐦ ᒥᔅᑎᒄ ᐊᓂᑦ ᐌᐦᒋ ᐊᔮᔨᒡ ᐊᐌᔫᐦ ᐱᒫᑎᓰᐎᓂᔫ᙮
15 ᐊᓂᒌ ᒫᒃ ᑳ ᐐᓂᓲ ᐱᒫᑎᓰᑣᐤ, ᐊᓂᒌ ᑳ ᒪᑌᐅᑣᐤ, ᐊᓂᒌ ᐐᓂᓱᐎᓂᐦᒡ ᑳ ᐃᔑ ᐱᒦᐦᑲᐙᑣᐤ ᐊᐌᔫᐦ, ᐊᓂᒌ ᑳ ᓂᐸᐦᐄᐌᑣᐤ ᐁᒄ ᒫᒃ ᐊᓂᒌ ᑳ ᓅᒌᔥᑐᐙᑣᐤ ᒪᓂᑑᐦᑳᓐᐦ, ᑲᔦ ᐊᓂᒌ ᑳ ᐐᐦᒡ ᓇᓇᑕᐃᑣᐤ ᓇᒧᐃ ᑲᑕ ᒌ ᐲᐦᒉᐅᒡ ᐊᓂᔫᐦ ᐃᐦᑖᐎᓂᔫ᙮
16 ᓂᔭ, ᒌᓴᔅ, ᓂᒌ ᐃᑎᔕᐦᐙᐤ ᓂᑌᓐᒋᓚᒻ ᑖᓂᑌ ᐁ ᐊᑎ ᐃᐦᑖᔦᒄ ᒉᒌ ᐐᐦᑕᒫᑖᒄ ᐅᔫᐦ ᒉᒀᔫᐦ, ᒋᔭᐙᐤ ᐅᒫᒨᐊᔨᒥᐦᐋᐅᑎᒄ᙮ ᑌᐱᑦ ᐁ ᐃᐦᑖᑦ ᓅᐦᒋ ᐋᓂᔅᒉ ᐱᒫᑎᓰᓐ᙮ ᐁᐅᒄ ᓂᔭ ᐊᓐ ᐙᐸᓐ ᐊᒐᐦᑯᔥ ᓈᔥᒡ ᑳ ᒌᐦᑳᔮᔥᑐᐌᑦ᙮ ᐁᐅᑯᔫ ᑳ ᐃᑗᑦ ᒌᓴᔅ᙮
17 ᑳ ᐸᔦᐦᒋᓰᑦ ᐊᐦᒑᐦᒄ ᐁᒄ ᒫᒃ ᐊᓐ ᐅᔅᒋᔅᑴᐙᓐ ᐃᑌᐅᒡ, ᐋᔥᑕᒻ᙮ ᑲᔦ ᐊᓐ ᐊᐌᓐ ᑳ ᐯᐦᑕᐦᒃ ᐁᑯᔥ ᑲᔦ ᐎᔭ ᒋᑲ ᐃᑌᐤ, ᐋᔥᑕᒻ᙮ ᒥᓯᐌ ᒋᔭᐙᐤ ᑳ ᓅᐦᑌᔮᐹᑴᔦᒄ ᐋᔥᑕᒧᒄ ᓭᐦᒉᐃ ᐯᒋ ᒥᓂᐦᑴᒄ ᐊᓐ ᓂᐲ ᐊᑎ ᐌᐦᒋ ᐊᔮᑦ ᐊᐌᓐ ᐱᒫᑎᓰᐎᓂᔫ᙮
ᒫᐦᒋᔥᑕᐃ ᐁ ᐃᔑ ᐋᔨᒨᑌᒡ
18 ᓂᔭ, ᒞᓐ, ᓂᑕᔮᒀᒥᒫᐤ ᒥᓯᐌ ᐊᐌᓐ ᑳ ᐯᐦᑕᐦᒃ ᑖᓐ ᐁ ᐃᔑ ᓃᑳᓐ ᐐᐦᑖᑲᓄᔨᒡ ᐅᑕᐦ ᒪᓯᓇᐦᐄᑲᓂᐦᒡ, ᐊᓐ ᐊᐌᓐ ᒉ ᐊᔨᐦᒋᔅᑖᑴ ᒉᒀᔫ ᑖᓐ ᐁ ᐃᑗᒪᑲᓂᔨᒡ ᐅᑕᐦ ᒪᓯᓇᐦᐄᑲᓂᐦᒡ, ᒋᔐᒪᓂᑑ ᒋᑲ ᐊᔨᐦᒋᔅᑖᔫ ᑲᔦ ᐎᔭ ᑖᓐ ᑳ ᐃᔑ ᐐᐦᑖᑯᓂᔨᒡ ᐅᑕᐦ ᒪᓯᓇᐦᐄᑲᓂᐦᒡ ᒉ ᐃᔑ ᓇᓀᐦᑳᑌᔨᒧᑦ᙮
19 ᐊᓐ ᒫᒃ ᐊᐌᓐ ᒉ ᐊᒎᓇᒧᑴ ᑖᓐ ᐁ ᐃᔑ ᓃᑳᓐ ᐐᐦᑖᑯᓂᔨᒡ ᐅᑕᐦ ᒪᓯᓇᐦᐄᑲᓂᐦᒡ ᒋᔐᒪᓂᑑ ᒋᑲ ᐅᑎᓇᒥᔫ ᑖᓐ ᑳ ᐃᔑ ᐊᔮᑦ ᒉᒌ ᐅᐦᒋ ᒦᒋᑦ ᒦᓂᔕ ᐊᓂᑦ ᐊᓂᔫᐦ ᒥᔅᑎᒄ ᑳ ᓂᐦᑖᐅᒋᓂᔨᒀᐤ, ᐊᑎ ᐌᐦᒋ ᐊᔮᔨᒡ ᐊᐌᔫ ᐱᒫᑎᓰᐎᓂᔫ ᑲᔦ ᓇᒧᐃ ᒋᑲ ᒌ ᐲᐦᒉᐤ ᐊᓂᑌ ᒋᔐᒪᓂᑑ ᐅᑎᐦᑖᐎᓃᐦᒡ᙮
20 ᐊᓐ ᒫᒃ ᐊᐌᓐ ᑳ ᐐᐦᑕᐦᒃ ᐁ ᑖᐺᒪᑲᓂᔨᒡ ᒥᓯᐌ ᐅᔫ ᑳ ᐃᔑ ᐐᐦᑖᑲᓄᔨᒡ ᐃᑌᐤ, ᒉᔥᑎᓈᔥ ᔖᔥ ᐐᐸᒡ ᒦᓐ ᓂᑲ ᑕᑯᔑᓐ᙮ ᐊᒣᓐ, ᐅᑎᐯᔨᐦᒋᑫᐤ ᒌᓴᔅ, ᐋᔥᑕᒻ᙮
21 ᒋᑲ ᐐ ᐊᔮᐙᓈᐙᐤ ᐅᑎᐯᔨᐦᒋᑫᐤ ᒌᓴᔅ ᒥᓯᐌ ᑖᓐ ᐁ ᐃᔑ ᔕᐌᔨᐦᒋᒉᑦ, ᒋᔭᐙᐤ ᑳ ᑖᐺᐦᑕᒣᒄ᙮ ᐊᒣᓐ᙮