24
1 Joacim Judá-yar-semaidgine, Babilonia-dulemar-rey-Nabucodonosor egi bila onononikid. A-bila-onosadgi, Nabucodonosor Joacimʼgi nakwisad. Geb agi, Judá-dulemar Nabucodonosor-sogedba birgapaa ibmar-imakdii gusad. Geb a-sorbali, Rey-Joacim, Nabucodonosor-sogedba bar ibmar-imakbisur gualid.
2 Agine, Bab-Jehová, Joacimʼgi, degi, Judá-dulemargi-gwisguegala, wemar-barmiar gusad:
Babilonia-sordamar, Siria-sordamar,
Moab-sordamar, degi, Amón-sordamar egi barmiar gusad.
Igi Bab-Jehová, ega-gayaburba-barsogmaladba ibmar-guoye sogsagusa, deyob gusad.
3 Bab-Jehová-sogedba Judá-dulemar sabsur-odurdaklesad.
Ar Judá-dulemar Manasés-isgusadba-nanasad-ulale,
Bab-Jehová egi Judá-dulemar-banguega imaksad.
4 Manasés, Jerusalénʼgi dulemar-ibmar-oakalossulid-oburgwisad-ulale,
Bab-Jehová egi Judá-dulemar-banguega imaksad.
Degisoggu, Bab-Jehová Judá-dulemarga, igi-barsaye gwen sogsasulid.
5 Joacim e-ibmar-imaksad, degi, ibmar-imaksad-baigan, Judá-e-reymar-ibmar-imaksad-gardagi narmakar maid.
6 Rey-Joacim burgwisgu, e-machi-Joaquín e-sorba yar sesad.
7 Babilonia-e-rey bela Egipto-yar-gasasoggu, Egipto-dulemar-e-rey bar Egipto-yargi nossulid. Ar ade, Babilonia-e-rey Egipto-diwar-maid-akale, Éufrates-diwar-maidse, Egipto-e-rey-yarmar-ganikidi, bela gasad.
Joaquín, Judá-yar-sesad
(2 Crónicas 36:9-10)
8 Joaquín birgambe-gakabaabak-nikadgi (18) yar sealid. Jerusalénʼgi nii-warbaa yar sesad. E-nan Nehustaʼye nugad, Elnatán-e-sisgwad. Nehustaʼde, Jerusalénʼginedid.
9 Joaquín Bab-Jehová-ibmar-abemaisulidi, Bab-Jehová-asabin imaksad. Ar e-bab-ibmar-imaksadba ibmar imaksamogad.
10 A-ibagangi, Babilonia-e-rey-Nabucodonosor-e-sorda-bila-onomalad, Jerusalén-neggwebur-ebilis ambikunonigusad.
11 Degi, Babilonia-Rey-Nabucodonosor, e-sordamar-Jerusalén-neggwebur-ebilis-bukwadgi, Jerusalénʼse nonikid.
12 Geb Judá-rey-Joaquín, e-nanmala, degi, ega-arbamaladmala, e-dule-dummaganmala, degine, e-sorda-bila-onomalad-e-dummaganmala, Babilonia-e-reyse galakunonimalad. Geb galesmalad. Deunni, Nabucodonosor birgabaabakgus (8) Babilonia-yargi negsemaid.
13 Ar igi Bab-Jehová sogsagusa, deyob ibmar gusad. Nabucodonosor, Bab-Jehováʼse-goled-neggi ibmar-nuegan-bukwad bela sesad, degi, reyneggi ibmar-nuegan-bukwadse-bakale, bela sesad. Nabucodonosor, Bab-Jehováʼse-goled-neggi-ibmar-ebulemalad bela goamaksabalid. We-ibmar Rey-Salomón orbi-sobsagusadid.
14 Deginbali, Nabucodonosor, bela dule Jerusalénʼginmalad-gasa sesa gusad:
Dule-dummagan,
dule-bila-onomalad-bulegan,
dule-ibmar-sobedgi-arbamalad,
degi, dule-esgoro-sobedgi-arbamalad, gasa sesad.
Belagwable miliambe (10,000) dulemar-gasa sesad. Unnila, dule-wileganabi napi obesad.
15 Degi, Rey-Nabucodonosor, wemar-gasa Babilonia-yarse sesa gusad:
Rey-Joaquín,
e-nan,
rey-e-omegan,
dule-dummagan,
degi, dule-bulegan-gasa sesa gusad.
16 A-ukinbali, bela sorda-bila-onomalad-bulegan,
miligugle-mergu (7,000) sesa gusbalid.
Dule-ibmar-sobedgi-arbamalad,
degi, dule-esgoro-sobedgi-arbamalad,
miligwen-mergu (1,000) sesa gusad.
Degine, Nabucodonosor, bela dulemar-bila-onolegedgi-urwemalad-gasa Babilonia-yarse sesa gusbalid.
17 Geb a-sorbali, Nabucodonosor, Joaquín-e-gilor Mataníasʼye nugad, Judá-e-reyga nug-imaksad. Geb ega nug ogwasad, Sedequíasʼye onugsasad.
Sedequías, Judá-yar-sesad
(2 Crónicas 36:11-16; Jeremías 52:1-3)
18 Sedequías birga-durgwen-gakagwensak-nikadgi (21) yar sealid. Jerusalénʼgi birgambe-gakagwensak (11) yar sesad. E-nandi, Hamutalʼye nugad, Jeremías-e-sisgwad. Hamutalʼde, Libnaʼginedid.
19 Sedequías Bab-Jehová-ibmar-abemaisulidi, Bab-Jehová-asabin imaksad. Ar ade, Sedequías, Joacim-ibmar-isgana-imaksadba ibmar imaksamogad.
20 Degidbali, Bab-Jehová Jerusalén-dulemargi, degi, Judá-dulemargi uluar gusad. Degisoggu, Bab-Dummad amar-obachasunnad. A-sorbali, Sedequías, Babilonia-e-reygi gwichigusad.